Computer man Computer man
ព័ត៏មានជាតិ

ឯកឧត្តម ហ៊ុន ម៉ានី៖ អង្គជំនុំជម្រះតុលាការកំពូល នៃអ.វ.ត.ក បានប្រកាសសាលដីកាលើសំណុំរឿង ០០២/០២ ដែលមានជនជាប់ចោទឈ្មោះ ខៀវ សំផន


ភ្នំពេញ៖ ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភាកម្ពុជា បានគូសបញ្ជាក់តាមបណ្តាញសង្គមហ្វេសប៊ុក នៅថ្ងៃទី២២ កញ្ញានេះថា ព្រឹកនេះ អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា បានប្រកាសសាលដីកាលើសំណុំរឿង ០០២/០២ ដែលមានជនជាប់ចោទឈ្មោះ ខៀវ សំផន។

ឯកឧត្តម បានបន្តថា នេះជាការផ្តល់នូវយុត្តិធម៌តាមផ្លូវច្បាប់ជាលក្ខណៈប្រវត្តិសាស្ត្រ ដល់ប្រជាជនកម្ពុជា ដែលបានឆ្លងកាត់របបប្រល័យពូជសាសន៍ខ្មែរក្រហមដ៏ឃោរឃៅ។ តាមរយៈការផ្តល់សច្ចធម៌ប្រវត្តិសាស្ត្រនាពេលនេះ ប្រជាពលរដ្ឋកម្ពុជា នឹងអាចសម្រាលនូវសេចក្តីឈឺចាប់ ភាពសោកសង្រេង និងការនឹករលឹករបស់ខ្លួនបន្តិចម្តងៗពីភាពដិតដាម និងរបួសផ្លូវចិត្តដែលបន្សល់ដោយរបបខ្មៅងងឹតអស់រយៈពេល ៣ឆ្នាំ ៨ខែ ២០ថ្ងៃ។

តែបើទោះបីសាលដីកាដែលត្រូវបានប្រកាសនេះបានបង្ហាញពីការបញ្ចប់នៃនីតិវិធីច្បាប់ក្តី ឯកឧត្តម ហ៊ុន ម៉ានី បាគូសរំលេចថា យើងទាំងអស់គ្នាមិនគួរណាភ្លេចទាំងស្រុង ដល់សោកនាដកម្មដែលប្រទេសជាតិ និងប្រជាជនយើងបានឆ្លងកាត់ ជាពិសេសទុក្ខវេទនា ការព្រាត់ប្រាស និងការឈឺចាប់នានាដែលបន្សល់ទុកដោយសារសង្រ្គាមឡើយ។

ទន្ទឹមនឹងនេះ ជាមួយនឹងពាក្យស្លោក «បំភ្លេចម្តេចបាន» ដែលយុវជនជំនាន់មុន (ជាថ្នាក់ដឹកនាំបច្ចុប្បន្ន) តែងបានក្រើនរំលឹក យើងទាំងអស់គ្នាឱ្យត្រូវតែចងចាំ និងរៀនសូត្រពីប្រវត្តិសាស្ត្រនៃឧក្រិដ្ឋកម្មក្នុងរយៈកាលរបបខ្មែរក្រហម ដែលប្រជាជនស្លូតត្រង់របស់កម្ពុជាបានឆ្លងកាត់ និងពលីយ៉ាងអយុត្តិធម៌ ហើយត្រូវប្តេជ្ញាការពារឱ្យបានដាច់ខាតកុំឱ្យរបបប្រល័យពូជសាសន៍កើតមានឡើងវិញ ទោះក្នុងតម្លៃណាក៏ដោយ៕


Click to comment

Leave a Reply

Your email address will not be published.

Most Popular

To Top