Computer man Computer man
ព័ត៏មានជាតិ

ឯកឧត្តម ចាយ បូរិន តំណាងដ៏ខ្ពង់ខ្ពស់ ឯកឧត្តមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី អញ្ជើញសួរសុខទុក្ខ ឯកឧត្តមនាយឧត្តមសេនីយ៍ ជា សារ៉ន ដល់គេហដ្ឋាន


ភ្នំពេញ៖ ប្រតិភូយុវជនគណបក្សប្រជាជនកម្ពុជាថ្នាក់កណ្តាលដឹកនាំដោយ ឯកឧត្តម ចាយ បូរិន សមាជិកគណៈកម្មាធិការកណ្តាលគណបក្សប្រជាជនកម្ពុជា-ប្រធានផ្នែកឃោសនាអប់រំនៃយុវជនគណបក្សថ្នាក់កណ្តាល តំណាងដ៏ខ្ពង់ខ្ពស់ឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា-ប្រធានយុវជនគណបក្សថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី នៅព្រឹកថ្ងៃទី១៧ ខែកញ្ញា ឆ្នាំ២០២២ បានចុះសួរសុខទុក្ខ ឯកឧត្តមនាយឧត្តមសេនីយ៍ ជា សារ៉ន សមាជិកគណៈកម្មាធិការកណ្តាលគណបក្សប្រជាជនកម្ពុជា រដ្ឋលេខាធិការក្រសួងការពារជាតិ ទីប្រឹក្សាបញ្ជាការដ្ឋានកងទ័ពជើងគោក និងជាទីប្រឹក្សាជាន់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម ចាយ បូរិន បានពាំនាំនូវការផ្តាំផ្ញើសួរសុខទុក្ខពីសំណាក់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃព្រះរាជាណាចក្រកម្ពុជា-សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេច លោកជំទាវ ឯកឧត្តម ដែលជាថ្នាក់ដឹកនាំគណបក្សប្រជាជនកម្ពុជាគ្រប់លំដាប់ថ្នាក់ រួមជាមួយឯកឧត្តមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនចំពោះ ឯកឧត្តមនាយឧត្តមសេនីយ៍ ជា សារ៉ន និងក្រុមគ្រួសារ។

ឯកឧត្តមប្រធានប្រតិភូបានលើកឡើងថា គណបក្សប្រជាជនកម្ពុជាតែងតែរក្សាចាស់បង្កើនថ្មី ហើយជានិច្ចជាកាលសម្តេចនិងថ្នាក់ដឹកនាំគណបក្សប្រជាជនកម្ពុជាគ្រប់ជាន់ថ្នាក់ តែងតែយកចិត្តទុកដាក់គិតគូរដល់សុខទុក្ខ និងជីវភាពរស់នៅរបស់ឯកឧត្តម លោកជំទាវ ចាស់ព្រឹទ្ធាចារ្យ សោធននិវត្តន៍ ទំាងអស់ដែលចូលរួមក្នុងការកសាងនិងស្តារប្រទេសជាតិមាតុភូមិ។

ឯកឧត្តមប្រធានប្រតិភូ បានសម្តែងនូវការកោតសរសើរ ចំពោះវិរភាពដ៏អង់អាចក្លាហានរបស់ ឯកឧត្តមនាយឧត្តមសេនីយ៍ ជា សារ៉ន ដែលបានចូលរួមបម្រើកងទ័ពដើម្បីបុព្វហេតុរំដោះប្រជាជនឲ្យរួចផុតពីរបបប្រល័យពូជសាសន៍ ប៉ុល ពត ព្រមទាំងការពារនិងអភិវឌ្ឍប្រទេសជាតិដោយជោគជ័យ។

ឯកឧត្តមនាយឧត្តមសេនីយ៍ ជា សារ៉ន បានរៀបរាប់ពីប្រវត្តិការងារថា៖ -បានចូលទៅប្រទេសវៀតណាម នៅឆ្នាំ១៩៧៥ បានចូលរួមជាមួយកម្លាំងកងទ័ពនៅអង្គភាពលេខ១២៥ របស់សម្តេចតេជោ ហ៊ុន សែន ថ្ងៃទី១២ ខែឧសភា ឆ្នាំ១៩៧៨ -ចូលរួមកម្លាំងចលនាតស៊ូរណសិរ្សសាមគ្គីសង្គ្រោះជាតិកម្ពុជានៅថ្ងៃទី២ ខែធ្នូ ឆ្នាំ១៩៧៨ ព្រមទាំងកម្លាំងតស៊ូចលនារំដោះជាតិផ្សេងៗទៀត បានវាយផ្តួលរំលំរបបកម្ពុជាប្រជាធិបតេយ្យដោយជោគជ័យនៅថ្ងៃទី៧ ខែមករា ឆ្នាំ១៩៧៩។ ហើយត្រូវបានក្រសួងការពារប្រទេសនិងរដ្ឋាភិបាលផ្តល់តួនាទីជាបន្តបន្ទាប់ដូចជា៖ -ប្រធានយោធាខេត្តកំពង់ស្ពឺ -នាយកសាលាវប្បធម៌កងទ័ព -ប្រធានវរសេនាធំលេខ២១ កងពលលេខ៨ ខេត្តកំពត -រងកងពលលេខ៦ណាំសាបទទួលបន្ទុកសេនាធិការ -សេនាធិការភូមិភាគ៤ -បញ្ជាការរងភូមិភាគ៥ ទទួលបន្ទុកសេនាធិការ -បញ្ជាការកងរថក្រោះ -ស្នងការប្រយុទ្ធនៃអគ្គសេនាធិការ -រាជរដ្ឋាភិបាលបានចាត់តាំងជាប្រតិបត្តិករអនុវត្តនយោបាយឈ្នះឈ្នះរបស់សម្តចតេជោ ហ៊ុន សែន -មេបញ្ជាការរងកងទ័ពជើគោក ទទួបន្ទុកសេនាធិការ។

ក្នុងឱកាសដ៏មានអត្ថន័យនេះដែរ ឯកឧត្តម ចាយ បូរិន រួមជាមួយសមាជិក សមាជិកា ប្រតិភូផ្នែកឃោសនាអប់រំ បានប្រគល់ជូនវត្ថុអនុស្សារីយ៍និងថវិកា ជាអំណោយរបស់ ឯកឧត្តមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនឯកឧត្តមនាយឧត្តមសេនីយ៍ ជា សារ៉ន និងបួងសួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិក្នុងលោក ទេវតាថែរក្សាព្រះរាជាណាចក្រកម្ពុជា សូមតាមជួយបីបាច់ថែរក្សា ឯកឧត្តម លោកជំទាវ មានសុខភាពល្អ កម្លាំងមាំមួន និងមានជន្មាយុយឺនយូរ ព្រមទាំងក្រុមគ្រួសារទទួលបានពរប្រាំប្រការ គឺអាយុ វណ្ណ: សុខ: ពល: និងបដិភាណ ។

ក្នុងឱកាសនោះដែរ ឯកឧត្ដម នាយឧត្តមសេនីយ៍ ជា សារ៉ន បានសម្តែងនូវការដឹងគុណយ៉ាងជ្រាលជ្រៅបំផុតគោរពជូនចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្តេច លោកជំទាវ ឯកឧត្តម ថ្នាក់ដឹកនាំគណបក្សប្រជាជនកម្ពុជាគ្រប់លំដាប់ថ្នាក់ ជាពិសេស ឯកឧត្តមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលតែងតែយកចិត្តទុកដាក់ពីសុខទុក្ខ ផ្តល់ភាពកក់ក្តៅ និងក្តីសង្ឃឹមជូនដល់ចាស់ព្រឹទ្ធាចារ្យ និងសុខុមាលភាពរបស់ប្រជាពលរដ្ឋ ដោយមិនប្រកាន់ពូជសាសន៍ ពណ៌សម្បុរ សាសនា ឬនិន្នាការនយោបាយ ស័កិ្កសមជាអ្នកបន្តវេន ពោរពេញដោយគុណធម៌ សមត្ថភាព ចំណេះដឹង វៀងវៃ ជាទំពំាងស្នងឫស្សីរបស់គណបក្សប្រជាជនកម្ពុជា និងប្រទេសជាតិទៅថ្ងៃអនាគត។

ឆ្លៀតក្នុងឱកាសពិធីបុណ្យភ្ជុំបិណ្ឌ ដែលជាពិធីបុណ្យប្រពៃណីជាតិ ឯកឧត្ដមនាយឧត្តមសេនីយ៍ ជា សារ៉ន ព្រមទាំងក្រុមគ្រួសារ បានបួងសួងជូនដល់សម្តេចទាំងទ្វេ ព្រមទាំងសម្តេច លោកជំទាវ ឯកឧត្តម ថ្នាក់ដឹកនាំគណបក្សប្រជាជនកម្ពុជាគ្រប់លំដាប់ថ្នាក់ ជាពិសេស ឯកឧត្តមបណ្ឌិត និងលោកជំទាវបណ្ឌិត ព្រមទាំងបុត្រាបុត្រី ទទួលបាននូវសុខភាពល្អបរិបូរ វិបុលសុខ ជោគជ័យគ្រប់ភារកិច្ច និងទទួលបាននូវពុទ្ធពរទាំងបួនប្រការគឺ អាយុ វណ្ណ: សុខ: ពល: កុំបីឃ្លៀងឃ្លាតឡើយ៕


Click to comment

Leave a Reply

Your email address will not be published.

Most Popular

To Top