រដ្ឋបាលខេត្តបន្ទាយមានជ័យ ចុះពិនិត្យមើលពីស្ថានភាពទឹក និងរៀបចំទីទួលសុវត្ថិភាព នៅផ្លូវវាងក្រុងសិរីសោភ័ណ
ភ្នំពេញ៖ ដើម្បីជម្លៀសប្រជាពលរដ្ឋរងគ្រោះដោយទឹកជំនន់ ក្នុងឃុំបត់ត្រង់ ស្នាក់នៅបណ្តោះអាសន្ន
អភិបាលខេត្តបន្ទាយមានជ័យ ឯកឧត្តម អ៊ុ រាត្រី និងប្រធានក្រុមប្រឹក្សាខេត្ត ឯកឧត្តម ខេង ស៊ុម បានចុះពិនិត្យមើលស្ថានភាពទឹក និងរៀបចំទីទួលសុវត្ថិភាពនៅផ្លូវវាងក្រុងសិរីសោភ័ណដែលអាជ្ញាធររៀបចំជូនពលរដ្ឋរងគ្រោះផលប៉ះពាល់ដោយសារជំនន់ទឹកភ្លៀងស្នាក់នៅបណ្ដោះអាសន្នចំនួន ៣៥គ្រួ សារដែលរស់នៅតាមមាត់ស្ទឹងមង្គលបូរី ក្នុងឃុំបត់ត្រង់ ស្រុកមង្គលបូរី ខណៈ:ស្ថានភាពទឹកស្ទឹងកើនឡើងជាបន្តបន្ទាប់។
គិតត្រឹមល្ងាចថ្ងៃទី២០ ខែកញ្ញា ក្នុងក្រុងសិរីសោភ័ណ្ឌ មានសង្កាត់ចំនួន២ ដែលកំពុងរងគ្រោះដោយសារទឹកជំនន់ទឹកភ្លៀងរួមមានសង្កាត់ព្រះពន្លា មានចំនួន ២៥គ្រួសារ ត្រូវបានឡើងទៅទីទួលសុវត្ថិភាព (ភូមិព្រៃឬស្សីចំនួន ៧គ្រួសារ ភូមិ៣ ចំនួន ១៨គ្រួសារ)។ ដោយឡែកសង្កាត់អូអំបិល ប្រជាពលរដ្ឋរងផលប៉ះពាល់ទឹកជំនន់ មានចំនួនសរុប ៧៣គ្រួសារ ក្នុងនោះ ភូមិសែសិន ចំនួន ១៩គ្រួសារ (ឡើងមកទួលសុវត្ថិភាព ៥គ្រួសារ) ភូមិគោរដ្ឋានចំនួន ១១គ្រួសារ (មិនទាន់ឡើងមកទួលសុវត្ថិភាពទេ) ភូមិរោងម៉ាស៊ីនចំនួន ២៥គ្រួសារ (មិនទាន់ឡើងមកទួលសុវត្ថិភាពទេ) ភូមិព្រហូតចំនួន ១៨គ្រួសារ (មិនទាន់ឡើងមកទួលសុវត្ថិភាព)
ជាមួយគ្នានោះ ឯកឧត្តមអភិបាលខេត្តបានក្រើនរំលឹកដល់មន្ត្រីពាក់ព័ន្ធ និងអាជ្ញាធរមូលដ្ឋានត្រូវ ផ្តល់កិច្ចសហការក្តាប់ព័ត៌មាន និងរាយការណ៍ជាប្រចាំឲ្យបានទាន់ពេលវេលាចំពោះករណីស្ថានភាពទឹកក្នុងករណីមានការហក់ឡើងខ្លាំង។
ទន្ទឹមនោះដែរ ឯកឧត្តម ក៏បានអំពាវនាដល់ប្រជាពលរដ្ឋថែរក្សាសុខភាពឲ្យបានល្អ ដោយរស់នៅមានអនាម័យ ហូបស្អាត ផឹកស្អាត ជាពិសេសអាណាព្យាបាលគ្រប់រូបត្រូវប្រុងប្រយ័ត្នចំពោះកូនចៅតូចៗ ក្រែងកើតមានករណីជាយថាហេតុ ណាមួយកើតមានឡើងដូចជាលង់ទឹកជាដើម ។មួយវិញទៀតត្រូវប្រុងប្រយ័ត្នចំពោះសត្វ អសិរពិស ទិច ឬខាំ។
ស្ថានភាពជាក់ស្តែងគិតត្រឹមថ្ងៃទី២០ ខែកញ្ញា នេះ ក្នុងភូមិសាស្ត្រខេត្តបន្ទាយមានជ័យ ពុំទាន់មានគ្រោះទឹកជំនន់កើតឡើងនោះទេ មានតែស្ថានភាពទឹកហូរស្រុងពីទីខ្ពស់មកកាន់តំបន់ទំនាប និងស្ទឹងដែលបានធ្វើឲ្យស្ថានភាពមានការកើនឡើង កន្លែងខ្លះមានការជនលិចផ្លូវ និងហូរកាត់ផ្លូវ៕
