ឯកឧត្តម អ៊ូច ភា ដឹកនាំគណៈកម្មការចុះពិនិត្យទីតាំងផ្ទាល់ត្រៀមរៀបចំប្រារព្ធអបអរសាទរព្រះរាជពិធីបុណ្យអ៊ុំទូក នៅទន្លេបាទី ស្រុកបាទី

ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ និងជាប្រធានគណៈកម្មការរៀបចំប្រារព្ធព្រះរាជពិធីបុណ្យអ៊ុំទូក បណ្តែតប្រទីប និងសំពះព្រះខែ អកបំបុក ខេត្ត នាព្រឹកថ្ងៃអាទិត្យ ទី៣០ ខែតុលា ឆ្នាំ២០២២ បានដឹកនាំ លោក លោកស្រី ប្រធានអនុគណៈកម្មការ និងសមាជិកទាំងអស់ ចុះពិនិត្យផ្ទាល់ទីតាំងត្រៀមរៀបចំប្រារព្ធព្រះរាជពិធីបុណ្យអ៊ុំទូក បណ្តែតប្រទីប និងសំពះព្រះខែ អកបំបុក នៅទន្លេបាទី ស្រុកបាទី ដែលរយៈពេល ០២ថ្ងៃ ចាប់ពីថ្ងៃទី ០៦ ដល់ថ្ងៃទី ០៧ ខែវិច្ឆិកាខាងមុខនេះ។

ពិធីនេះក៏មានការអញ្ជើញចូលរួមពីសំណាក់ លោក លោកស្រីអភិបាលរងខេត្ត ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣ អភិបាល អភិបាលរងស្រុកបាទី និងមន្រ្ទីជំនាញពាក់ព័ន្ធចូលរួមជាច្រើនរូបផងដែរ ។

ក្នុងឱកាសនោះដែរ ឯកឧត្តអភិបាលខេត្ត ក៏បានមានប្រសាសន៍ដោយធ្វើការណែនាំបន្ថែមទៀតទៅដល់អស់លោកលោកស្រី និងអ្នកពាក់ព័ន្ធនៅក្នុងគណៈកម្មការ និងអនុគណៈកម្មការខេត្តរៀបចំព្រះរាជពិធីបុណ្យអ៊ុំទូកនេះ សូមចូលរួមសហការគ្នាឱ្យបានល្អ ធ្វើយ៉ាងណាឱ្យដំណើរការនៃការរៀបចំព្រះរាជពិធីបុណ្យអ៊ុំទូក បណ្តែតប្រទីប និងសំពះព្រះខែ អកបំបុក នៅទន្លេបាទី ស្រុកបាទី រយៈពេល ០២ថ្ងៃនេះ ប្រព្រឹត្តទៅដោយរលូន ពិសេសសូមអាជ្ញាធរក្រុងស្រុក ក្នុងនាមគណៈបញ្ជាការឯកភាពរដ្ឋបាលក្រុងស្រុក និងកងកម្លាំងប្រដាប់អាវុធទាំង៣ ត្រូវតែពង្រឹងសន្តិសុខឱ្យបានល្អរឹងមាំ ដើម្បីធានាបាននូវសុខសុវត្ថិភាពជូនបងប្អូនប្រជាពលរដ្ឋ ដែលពួកគាត់អញ្ជើញមកទស្សនាពិធីបុណ្យអ៊ុំទូកនេះ ពិសេសក៏ត្រូវតែត្រៀមក្រុមគ្រូពេទ្យប្រចាំការផងដែរ ៕