ក្រសួងអប់រំ រៀបចំសិក្ខាសាលាស្តីពី តួនាទី និងភារកិច្ចគណៈកម្មការអប្បមាទ និងជំនួយការអប្បមាទទូទាំងប្រទេស

ភ្នំពេញ៖ ដើម្បីឱ្យដំណើរការប្រឡង សញ្ញាបត្រមធ្យមសិក្សាទុតិយភូមិ សម័យប្រឡង៖ ៥ ធ្នូ ២០២២ ប្រព្រឹត្តទៅស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ក្រសួងអប់រំ យុវជន និងកីឡា នាថ្ងៃទី២ វិច្ឆិកា បានរៀបចំសិក្ខាសាលាស្ដីពី តួនាទី និងភារកិច្ចគណៈកម្មការអប្បមាទ និងជំនួយការអប្បមាទទូទាំងប្រទេស នៅសាលប្រជុំនៃវិទ្យាស្ថានគរុកោសល្យរាជធានីភ្នំពេញ។

វគ្គសិក្ខាសាលានេះ បានប្រព្រឹត្តទៅក្រោមអធិបតីភាព ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយមានសមាជិកចូលរួមសរុបចំនួន៣៥០រូប។ ដោយឡែកសម្រាប់ សិក្ខាសាលាមួយផ្សេងទៀត បានប្រព្រឹត្តទៅក្រោមអធិបតីភាព ឯកឧត្តម លាង សេងហាក់ អនុរដ្ឋលេខាធិការក្រសួងអប់រំ យុវជន និងកីឡា ដោយមានសមាជិកចូលរួមចំនួន១០៨រូប។

ក្នុងឱកាសនោះ ឯកឧត្តមបណ្ឌិតសភាចារ្យ បានលើកឡើងថា នេះការប្រឡងលើកទី១០ នៃការអនុវត្តកំណែទម្រង់ក្នុងការប្រឡងសញ្ញាបត្រមធ្យមសិក្សាទុតិយភូមិ ដោយប្រព្រឹត្តទៅដោយមានការទទួលស្គាល់ និងសាទរពីសំណាក់ថ្នាក់ដឹកនាំរាជរដ្ឋាភិបាល ឪពុកម្តាយ អាណាព្យាបាល ប្អូនៗសិស្សានុសិស្ស ដែលបានខិតខំចំណាយពេល១២ឆ្នាំក្នុងការសិក្សា ដោយទទួលបានលទ្ធផលមួយធានាបាននូវការគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។

ឯកឧត្តមរដ្ឋមន្ត្រីបានលើកទឹកចិត្ត ឱ្យថ្នាក់ដឹកនាំក្រសួង មន្ត្រីរាជការអនុវត្តការងារពាក់ព័ន្ធដំណើរការប្រឡង ពិសេសដំណើរការសំណេរដែលនឹងចាប់ផ្តើមនៅដើមខែធ្នូខាងមុខ ដោយបន្តបំពេញការងារប្រកបដោយស្មារតីទទួលខុសត្រូវខ្ពស់ បង្ការកុំឱ្យមានឧប្បតិ្តវហេតុណាកើតឡើង បន្តរក្សានូវវិធានការសុខភាព ទោះបីជាស្ថានភាពជំងឺកូវីដ-១៩ បានធូរស្រាលក្តី។

អង្គសិក្ខាសាលាបានធ្វើបទបង្ហាញ និងពិភាក្សាទៅលើប្រធានបទចំនួន៤៖
១.ការរៀបចំយន្តការដំណើរការមណ្ឌលសំណេរ
២.តួនាទី និងភារកិច្ចរបស់គណៈកម្មការអប្បមាទទូទាំងប្រទេស
៣.តួនាទី និងភារកិច្ចរបស់ជំនួយការអប្បមាទទូទាំងប្រទេស
៤.បទប្បញ្ញត្តិ និងកម្រិតវិន័យចំពោះបុគ្គលិកអប់រំ ក្នុងការប្រឡងសញ្ញាបត្រមធ្យមសិក្សាទុតិយភូមិ។

សូមជម្រាបថា ទោះបីស្ថានភាពជំងឺកូវីដ-១៩ បានធូរស្រាលក្តី ក្រសួងអប់រំ យុវជន និងកីឡា នៅតែបន្តអនុវត្តវិធានការការពារការចម្លង ដោយបានដាក់ចេញសេចក្តីណែនាំប្រតិបត្តិស្ដីពី វិធានការសុខភាព និងសុវត្ថិភាពសម្រាប់ការប្រឡងសញ្ញាបត្រមធ្យមសិក្សាទុតិយភូមិ ដើម្បីធានាបាននូវការការពារសុខភាព និងសុវត្ថិភាពជូនបុគ្គលិកអប់រំ និងសិស្សានុសិស្សទាំងអស់៕