ឯកឧត្តម ឈួរ សុបញ្ញា ផ្តាំផ្ញើដល់មន្រ្តីប្រតិបត្តិទទួលបន្ទុកអនុវត្តកម្មវិធីឧបត្ថមសាច់ប្រាក់ ជូនគ្រួសារងាយរងហានិភ័យ នៅមូលដ្ឋានឱ្យមានតម្លាភាពត្រឹមត្រូវ និងច្បាស់លាស់
ភ្នំពេញ៖ ឯកឧត្តម ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមូលនិធិជាតិជំនួយសង្គម បានផ្តាំផ្ញើដល់មន្រ្តីប្រតិបត្តិទទួលបន្ទុកអនុវត្តកម្មវិធីឧបត្ថមសាច់ប្រាក់ ជូនគ្រួសារងាយរងហានិភ័យក្នុងអំឡុងពេលមានសម្ពាធអតិផរណា និងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យដែលរងផលប៉ះពាល់ធ្ងន់ធ្ងរដោយទឹកជំនន់ នៅមូលដ្ឋានឱ្យមានតម្លាភាពត្រឹមត្រូវ និងច្បាស់លាស់។
ឯកឧត្តមបានផ្តាំផ្ញើបែបនេះ នៅក្នុងពិធីបិទវគ្គបណ្តុះបណ្តាលស្តីពី ការអនុវត្តន៍កម្មវិធីឧបត្ថមសាច់ប្រាក់ ជូនគ្រួសារងាយរងហានិភ័យក្នុងអំឡុងពេលមានសម្ពាធអតិផរណា និងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យដែលរងផលប៉ះពាល់ធ្ងន់ធ្ងរដោយទឹកជំនន់ នារសៀលថ្ងៃទី១៧ ខែវិច្ឆិកា ឆ្នាំ២០២២ នៅសាលាខេត្តកណ្តាល ដោយមានការអញ្ជើញចូលរួមជាគណៈអធិបតីពីឯកឧត្តម ប្រាក់ សារ៉ាត់ អភិបាលរងខេត្តកណ្ដាល។
ឯកឧត្តម ឈួរ សុបញ្ញា បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវកម្មវិធីថ្មី ក្នុងចំណោមកម្មវិធីជំនួយសង្គមផ្សេងទៀត នោះគឺកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងអំឡុងពេលមានសម្ពាធអតិផរណា និងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ដែលរងផលប៉ះពាល់ដោយទឹកជំនន់ ក្នុងឆ្នាំ២០២២នេះ ដើម្បីជួយលើកកម្ពស់កម្រិតជីវភាព សុខមាលភាពរបស់ប្រជាពលរដ្ឋបន្ទាប់ពីទទួលរងផលប៉ះពាល់ដោយសម្ពាធអតិផរណា ដែលមានសមាជិក ជាមនុស្សវ័យចាស់ ជនមានពិការភាពជាដើម ។
ក្នុងឱកាសនោះ ឯកឧត្តមបានជំរុញដល់មន្ត្រីជំនាញ ក្រុង ស្រុក មេឃុំ ចៅសង្កាត់ និង មន្ត្រីទទួលបន្ទុកអនុវត្តកម្មវិធីនៅឃុំ សង្កាត់ និង មណ្ឌលសុខាភិបាលសាធារណតាមមូលដ្ឋានទាំងអស់ ត្រូវយកចំណេះដឹង និងបទពិសោធន៍ដែលបានមកពីវគ្គបណ្ដុះបណ្ដាលនៃថ្ងៃនេះទៅបម្រើប្រជាពលរដ្ឋរបស់យើងដោយអនុវត្តតាមស្ថានភាពជាក់ស្ដែង នៅមូលដ្ឋានរបស់ខ្លួន ការងារសំខាន់គឺត្រូវខិតខំបម្រើសេវាជូនប្រជាពលរដ្ឋឱ្យបានល្អប្រសើរ និងយកចិត្តទុកដាក់ក្នុងការបំពេញតួនាទី ភារកិច្ចរបស់ខ្លួនឱ្យបានល្អ សំដៅជួយសម្រួលដល់ជីវភាពរស់នៅរបស់គ្រួសារក្រីក្រ ប្រកបដោយប្រសិទ្ធភាព៕
