ឯកឧត្តម ជា ចាន់តូ ចូលរួមសន្និសីទអន្តរជាតិ ស្តីពីការប្រឆាំងហិរញ្ញប្បទានភេរវកម្ម នៅឥណ្ឌា

ភ្នំពេញ៖ ឯកឧត្តម ជា ចាន់តូ ទេសាភិបាលធនាគារជាតិ នៃកម្ពុជា និងជាអនុប្រធានប្រចាំការ គណ:កម្មាធិការសម្របសម្រួលថ្នាក់ជាតិ ប្រឆាំងការសម្អាតប្រាក់និងហិរញ្ញប្បទានភេរវកម្មនិងហិរញ្ញប្បទាន ដល់ការរីកសាយភាយអាវុធមហាប្រល័យ (គ.ស.ហ.) តំណាងឱ្យសម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ស.ហ. ចាប់ពីថ្ងៃទី១៨-១៩ ខែវិច្ឆិកា ឆ្នាំ២០២២ បានដឹកនាំប្រតិភូ ចូលរួមសន្និសីទអន្តរជាតិស្តីពីការប្រឆាំងហិរញ្ញប្បទានភេរវកម្ម ក្រោមប្រធានបទ “No Money for Terror” នៅរាជធានីញូដេលី សាធារណរដ្ឋឥណ្ឌា។

សន្និសីទនេះមានការចូលរួមពីរដ្ឋមន្ត្រីមហាផ្ទៃ តំណាងអង្គទូត មកពី ៨៩ប្រទេស និងប្រធាននិងតំណាងអង្គការអន្តរជាតិសំខាន់ៗដែលពាក់ព័ន្ធជាង ២០អង្គការ ។

នាឱកាសនៃសន្និសីទនោះ ឯកឧត្តម ទេសាភិបាល បានថ្លែងបទអន្តរាគមន៍ ដើម្បីចូលរួមគាំទ្រសន្និសីទប្រឆាំងហិរញ្ញប្បទានភេរវកម្ម និងបានបញ្ជាក់ជូនអង្គសន្និសីទអំពីការប្តេជ្ញាចិត្តខ្ពស់របស់កម្ពុជាក្នុងការចូលរួមជាមួយសហគមអន្តរជាតិប្រឆាំងហិរញ្ញប្បទានភេរវកម្ម ដោយការដាក់ចេញនូវក្របខ័ណ្ឌច្បាប់ ការវាយតម្លៃហានិភ័យថ្នាក់ជាតិដើម្បីប្រើប្រាស់ក្នុងការដាក់ចេញនូវយុទ្ធសាស្ត្រជាតិប្រឆាំងការសម្អាតប្រាក់និងហិរញ្ញប្បទានភេរវកម្ម ក៏ដូចជាយន្តការក្នុងស្រុកនានាសម្រាប់អនុវត្តឱ្យមានប្រសិទ្ធភាព ក្រោមការដឹកនាំសម្របសម្រួលរបស់ គ.ស.ហ. ៕