ឯកឧត្ដម ហ៊ុន ម៉ានី បានដឹកនាំគណៈប្រតិភូ សមាជិកសភាវ័យក្មេងអាយប៉ា ចូលជួបសម្តែងការគួរសម សម្តេចពញាចក្រី ហេង សំរិន ប្រធានរដ្ឋសភាកម្ពុជា

ភ្នំពេញ៖ សមាជិកសភាវ័យក្មេងអាយប៉ា [YPA] ឯក ឧត្ដមហ៊ុន ម៉ានី ក៏បានអញ្ជើញដឹកនាំគណៈប្រតិភូ នៃកិច្ចប្រជុំសមាជិកសភាវ័យក្មេងអាយប៉ា ចូលគោរពសម្តែងការគួរសម សម្តេចអគ្គមហាពញាចក្រី ហេង សំរិន ប្រធានរដ្ឋសភា និងជាប្រធានមហាសន្និបាតអន្តរសភាអាស៊ានលើកទី៤៣ នៅព្រឹកថ្ងៃទី២១ ខែវិច្ឆិកា ឆ្នាំ២០២២នេះ។

ចាប់ផ្តើមកម្មវិធី ឯកឧត្ដម ហ៊ុន ម៉ានី ក៏បានគោរពថ្លែងអំណរគុណយ៉ាងជ្រាលជ្រៅចំពោះ សម្តេចប្រធាន ដែលបានចំណាយពេលវេលាដ៏មមាញឹក ក្នុងឱកាសនៃមហាសន្និបាតអាយប៉ាលើកទី៤៣ បានទទួលជួបគណៈប្រតិភូសមាជិកសភាវ័យក្មេងអាយប៉ា នៅព្រឹកនេះ។ សមាជិកសភាវ័យក្មេងអាយប៉ា នឹងធ្វើឡើងលើកទី១ នារសៀលថ្ងៃនេះ នៅក្នុងអំឡុងពេលនៃមហាសន្និបាតអាយប៉ាលើកទី៤៣ ដែលសភាកម្ពុជាធ្វើជាម្ចាស់ផ្ទះនៅឆ្នាំ២០២២នេះ។

នាឱកាសនេះ សម្តេចអគ្គមហាពញាចក្រី ហេង សំរិន ក៏បានលើកឡើងដល់គណៈប្រតិភូ [YPA ]ថា {យុវជន គឺជាធនធានប្រកបដោយថាមពលខ្ពស់ ក្នុងដំណើរការកិច្ចការនយោបាយ និងការអភិវឌ្ឍសេដ្ឋកិច្ច ដើម្បីថែរក្សានូវសុខសន្តិភាព ស្ថិរភាពនយោបាយ ក្នុងតំបន់ និងសកល}។

នៅក្នុងជំនួបនេះ តំណាងឲ្យគណៈប្រតិភូសមាជិកសភាវ័យក្មេងអាយប៉ាទាំងអស់ ឯក ឧត្ដមហ៊ុន ម៉ានី ក៏បានបង្ហាញសុទិដ្ឋិនិយមថា៖ /ជាការចូលរួមបន្ថែមពីសមាជិកសភាវ័យក្មេងអាយប៉ា ដែលឆ្លុះបញ្ចាំងអំពីការតាំងចិត្តរបស់សភា នៃប្រទេសសមាជិកអាយប៉ា និងអាស៊ានជារួម យើងនឹងឈានទៅសម្រេចបានការកសាងសហគមន៍អាស៊ានពោរពេញទៅដោយកាលានុវត្តភាព នៅប្រទេសក្នុងតំបន់អាស៊ាន។។