ឯកឧត្តម ប៉ែន ស៊ីម៉ន អញ្ជើញសំណេះសំណាល ជាមួយសិស្សានុសិស្ស ថ្នាក់ទី១២ ត្រៀមប្រឡងបាក់ឌុប មកពីវិទ្យាល័យទូទាំងខេត្តកំពត
ភ្នំពេញ៖ ចាប់ពីថ្ងៃទី៣០ វិច្ឆិកា ដល់ថ្ងៃទី១ ខែធ្នូ ឆ្នាំ២០២២ ឯកឧត្តមបណ្ឌិត ប៉ែន ស៊ីម៉ន តំណាងរាស្រ្តមណ្ឌលខេត្តកំពត និងជាប្រធានគណៈកម្មការទី១០ នៃរដ្ឋសភា បានអញ្ជើញចុះជួបសំណេះសំណាលជាមួយសាស្រ្តាចារ្យ លោកគ្រូ អ្នកគ្រូ និងសិស្សានុសិស្ស ថ្នាក់ទី១២ ត្រៀមប្រឡងសញ្ញាប័ត្រមធ្យមសិក្សាទុតិយភូមិ ឆ្នាំសិក្សា២០២១-២០២២ មកពីវិទ្យាល័យនានា នៅទូទាំងខេត្តកំពត សរុបជាង ៥០០០នាក់។
ពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវសមាជិក សមាជិកា ព្រឹទ្ធសភា រដ្ឋសភា ឯកឧត្តមប្រធានក្រុមប្រឹក្សាខេត្ត ឯកឧត្តម លោកជំទាវ ជាសមាជិក សមាជិកាក្រុមប្រឹក្សាខេត្ត អភិបាលរងខេត្ត លោកនាយករដ្ឋបាលសាលាខេត្ត ប្រធានមន្ទីរ អង្គភាពជុំវិញខេត្ត និងលោកគ្រូ អ្នកគ្រូ មកពីវិទ្យាល័យនានាទូទាំងខេត្ត។
ក្នុងឱកាសដ៏មានសារៈសំខាន់នេះ លោកប្រធានមន្ទីរអប់រំ យុវជន និងកីឡា ខេត្តកំពត បានជម្រាបរាយការណ៍ជូន ឯកឧត្តមបណ្ឌិត បានជ្រាបថា សម្រាប់ឆ្នាំសិក្សា ២០២១-២០២២ នេះនៅខេត្តកំពត មានបេក្ខជន ដែលត្រូវប្រឡងយកសញ្ញាប័ត្រមធ្យមសិក្សាទុតិយភូមិ មានចំនួន៥,៣៤៦នាក់ ស្រី ២,៧៩៥នាក់ ចែកចេញជា ១០មណ្ឌលស្មើនឹង២១៦បន្ទប់។ ជាមួយគ្នានោះដែរ លោកប្រធានមន្ទីរអប់រំ យុវជន និងកីឡា ខេត្តកំពត បានថ្លែងអំណរគុណដ៏ជ្រាលជ្រៅបំផុតចំពោះ ឯកឧត្តមបណ្ឌិត និងលោកជំទាវ ដែលបានឧបត្ថម្ភគាំទ្រ លើកស្ទួយវិស័យអប់រំសិក្សាធិការខេត្ត ជាបន្តបន្ទាប់តាមរយៈការផ្តល់អគារសិក្សា អាហារូបករណ៍ដល់សិស្សានុសិស្សនៅក្នុងខេត្តកំពត។
ក្នុងពិធីសំណេះសំណាលដ៏វិសេសវិសាលនេះ ឯកឧត្តមបណ្ឌិត បានសម្តែងការកោតសរសើរ និងវាយតម្លៃខ្ពស់ ចំពោះការយកចិត្តទុកដាក់ខិតខំរៀនសូត្ររបស់ចៅៗ សិស្សានុសិស្សទាំងអស់ ដោយមានជំនឿយ៉ាងមុតមាំថា លទ្ធផល នៃការប្រឡងសញ្ញាប័ត្រធម្យមសិក្សាទុតិយភូមិ ឆ្នាំសិក្សា ២០២១-២០២២ នេះពិតជាមានភាពប្រសើរជាងឆ្នាំមុនៗជាក់ជាពុំខាន។ នាឱកាសនោះដែរ ឯកឧត្តមបណ្ឌិត បានលើកឡើងពីបទពិសោធន៍ នៃការសិក្សារៀនសូត្រ ផ្តល់ពុទ្ធិជាមូលដ្ឋានគ្រឹះ និងអនុសាសន៍សំខាន់ៗជាច្រេីន ក្នុងការសិក្សារៀនសូត្រសម្រាប់ចៅៗ គឺត្រូវជឿជាក់លើខ្លួនឯង ព្រោះការជឿជាក់នាំមកនូវភាពជោគជយ័។
ទន្ទឹមនោះផងដែរ ឯកឧត្តមបណ្ឌិត បានអនុញ្ញាតអោយនិស្សិតអាហារូបករណ៍របស់ឯកឧត្តមបណ្ឌិត ដែលកំពុងសិក្សានៅមហាវិទ្យាលយ័ និងសកលវិទ្យាលយ័នានា ក្នុងរាជធានីភ្នំពេញ បានឡើងធ្វើបទបង្ហាញគន្លឹះសំខាន់ចែកជូនដល់ប្អូនៗសិស្សានុសិស្សថ្នាក់ទី១២ទាំងអស់ទុកជាទុនសម្រាប់ជាបទពិសោធន៍ក្មុងការរៀនសូត្រ ចូលរួមប្រឡងសញ្ញាប័ត្រមធ្យមសិក្សាទុតិយភូមិ នាថ្ងៃទី៥ ខែធ្នូ ឆ្នាំ២០២២ នាពេលដ៏ខ្លីខាងមុខនេះ។
ឯកឧត្តមបណ្ឌិត បានជូនពរអោយចៅៗសិស្សានុសិស្សទាំងអស់ប្រឡងជាប់និទ្ទេសល្អគ្រប់ៗគ្នា ដើម្បីបង្ហាញជាកិត្តិយស ជូនលោកគ្រូអ្នកគ្រូ ជូនសាលាយើង គ្រួសារយើង ស្រុកយើង និងខេត្តយើងផងដែរ។
ក្នុងឱកាសនោះ ឯកឧត្តមបណ្ឌិត បានឧបត្ថម្ភថវិកាលើកទឹកចិត្តដល់បេក្ខជនមកពីវិទ្យាល័យនានាក្នុងខេត្តកំពត សរុបចំនួន ៤,៤៣៧នាក់ ម្នាក់ៗទទួលបានថវិកា ៥ម៉ឺនរៀល លោកគ្រូ អ្នកគ្រូ ចំនួន២៤៣នាក់ ម្នាក់ៗ ១០ម៉ឺនរៀល គណៈគ្រប់គ្រងសាលាសរុបចំនួន៦៥នាក់ ម្នាក់ៗ ១០ម៉ឺនរៀល គរុសិស្សជំនាន់ទី៣៩ ចំនួន៥០នាក់ ម្នាក់ៗ៥ម៉ឺនរៀល គ្រូឧទ្ទេស ២៥នាក់ គណ:គ្រប់គ្រងសាលាគរុកោសល្យ ៣នាក់ សរុប២៨នាក់ ម្នាក់ៗ ១០ម៉ឺនរៀល កងកម្លាំងប្រដាប់អាវុធ ៤លានរៀល ពេទ្យប្រចាំការ ១៦នាក់ម្នាក់ៗ ១០ម៉ឺនរៀល និងកសាងក្លោងទ្វារវិទ្យាល័យទូកមាសអស់ថវិកាចំនួន ១៥.៣០០ដុល្លារផងដែរ ៕
