ដើម្បីផ្សារភ្ជាប់រវាងមន្ត្រីនគរបាលជំនាន់មុន និងជំនាន់ក្រោយ ឧត្តមសេនីយ៍ទោ សិទ្ធិ ឡោះ ត្រៀមប្រារព្ធពិធីជួបសំណេះសំណាល និងហូបបាយសាមគ្គី ជាមួយមន្ត្រីនគរបាលចូលនិវត្តន៍ជាង ៦០០នាក់
ភ្នំពេញ៖ ដើម្បីផ្សារភ្ជាប់រវាងមន្ត្រីនគរបាលជំនាន់មុន និងមន្ត្រីនគរបាលជំនាន់ក្រោយ ឲ្យកាន់តែមានភាពស្និតស្នាលនោះ នៅថ្ងៃទី៥ ខែវិច្ឆិកា ឆ្នាំ២០២២ម្សិលមិញនេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានប្រជុំផ្សព្វផ្សាយផែនការ ដោយមានការចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង លោកនាយការិយាល័យ លោកអធិការនគរបាល ក្រុង ស្រុកទាំង៩ និងលោកមេបញ្ជាការ វរសេនាតូចការពារព្រំដែនគោកទាំង៤ ស្តីពីកាត្រៀមប្រារព្ធពិធីជួបជុំសំណេះសំណាល ជាមួយមន្ត្រីនគរបាលនិវត្តន៍ជន ជាង៦០០នាក់ នៅថ្ងៃទី១៤ ខែធ្នូ ឆ្នាំ២០២២ ឆាប់ៗខាងមុខនេះ។
លោកឧត្តមសេនីយ៍ទោ សិទ្ធិ ឡោះ បានលើកឡើងថា៖ យើងមានអ្វីៗមកទល់ពេលនេះ ក៏អាស្រ័យដោយមានមន្ត្រីនគរបាល ដែលជារៀមច្បងជំនាន់ បានបង្ហាត់បង្ហាញអំពី កិច្ចការងារស្នូលទាំងឡាយ ដល់យើងទាំងអស់គ្នាដែលជា មន្ត្រីនគរបាលជំនាន់ក្រោយ ។ ដូច្នេះដើម្បីរំលឹកពីគុណបំណាច់ដ៏ធំធេង របស់ពួកគាត់និងដើម្បីផ្សារភ្ជាប់រវាងមន្ត្រីនគរ បាលជំនាន់មុន និងមន្ត្រីនគរបាលជំនាន់ក្រោយឲ្យកាន់តែ មានភាពស្និតស្នាលនិងជាមហាគ្រួសារនគរ បាលនោះ ។
ស្នងការដ្ឋានបានត្រៀមរៀបចំ ធ្វើពិធីជួបសំណេះសំណាល ជាមួយមន្ត្រីនគរបាលចូលនិវត្តន៍មានប្រមាណជា ៦០០នាក់ ដោយកំណត់ធ្វើនៅថ្ងៃទី១៤ ខែធ្នូ ឆ្នាំ២០២២ នៅបរិវេណស្នងការដ្ឋាននគរបាល ខេត្តបន្ទាយមានជ័យ។ មួយវិញទៀតដើម្បីផ្សារភ្ជាប់ជាមួយនឹងពិធីនេះផងដែរ ស្នងការដ្ឋានក៏មានការចែកជូនអំណោយ និងពិសារបាយសាមគ្គីជាមួយគ្នាផងដែរ ៕
