ឯកឧត្តម កើត រិទ្ធ អនុញ្ញាតឱ្យនិស្សិតអាហារូបករណ៍ រដ្ឋាភិបាលនូវែលសេឡង់ ចូលជួបសម្តែងការគួរសម និងទទួលយកអនុសាសន៍ណែនាំដ៏ខ្ពង់ខ្ពស់

ភ្នំពេញ៖ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ នាថ្ងៃទី២១ ខែធ្នូ ឆ្នាំ២០២២ នេះ បានអនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលនូវែលសេឡង់ ឆ្នាំសិក្សា ២០២៣-២០២៤ ចូលជួបសម្តែងការគួរសម និងទទួលយកអនុសាសន៍ណែនាំដ៏ខ្ពង់ខ្ពស់ពីឯកឧត្តមរដ្ឋមន្ត្រី ដើម្បីជាឧត្តមប្រយោជន៍នៅក្នុងការសិក្សារៀនសូត្រនាពេលខាងមុខនេះ។
នៅក្នុងជំនួបនេះ ក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ដែលជាថា្នក់ដឹកនាំ ព្រមទាំងមន្ត្រីរាជការនៃក្រសួងយុត្តិធម៌ ជាច្រើនរូបផ្សេងទៀត។

ក្នុងឱកាសនេះ ឯកឧត្តមរដ្ឋមន្ត្រី បានលើកឡើងថា កត្តាសុខសន្តិភាពបានធ្វើឱ្យប្រទេសកម្ពុជាមានការអភិវឌ្ឍលើគ្រប់វិស័យ ហើយក្នុងនោះដែរ ក៏បានផ្តល់ឱកាសដល់យុវជនកម្ពុជាអាចទទួលបានការសិក្សា មិនថាទាំងក្នុង ឬក្រៅប្រទេសឡើយ។

ឯកឧត្តមរដ្ឋមន្ត្រី ក៏បានផ្តល់អនុសាសន៍ដល់និស្សិតជ័យលាភីទាំងអស់ត្រូវចាប់យកឱកាសមាសនេះ តាមរយៈការខិតខំសិក្សារៀនសូត្រ ក្រេបជញ្ជក់យកចំណេះដឹង និងបទពិសោធន៍ល្អៗ ដើម្បីយកចំណេះដឹង និងបទពិសោធន៍ទាំងនោះ មកចូលរួមបម្រើជាផលប្រយោជន៍សង្គមជាតិកម្ពុជាវិញ។ បន្ថែមពីនេះ, ឯកឧត្តមរដ្ឋមន្ត្រី ក៏បានផ្តាំផ្ញើដល់និស្សិតជ័យលាភីត្រូវចេះរួមសាមគ្គី និងចេះជួយយកអាសារគ្នាទៅវិញទៅមក ដូចពាក្យស្លោកខ្មែរដែលបានលើកឡើងថា «នៅផ្ទះម្តាយទីទៃ នៅព្រៃម្តាយតែមួយ» ព្រមទាំងជូនពរដល់និស្សិតជ័យលាភីទាំងអស់ ទទួលបានជោគជ័យក្នុងការសិក្សាផងដែរ ។