លោក ចេង ស្រុង ប្រធានក្រុមការងារចុះជួយមូលដ្ឋានឃុំអណ្តូងថ្ម អញ្ជើញបើកបវេសន កាលឆ្នាំសិក្សាថ្មី ២០២២-២០២៣ នៅអនុវិទ្យាល័យ ហ៊ុន សែន អណ្តូងថ្ម ស្រុកព្រៃនប់
ព្រះសីហនុ៖ នាព្រឹកថ្ងៃទី២ ខែមករា ឆ្នាំ២០២៣នេះ ឯកឧត្តម ទឹង គឹមហេង សមាជិកក្រុមប្រឹក្សាខេត្តព្រះសីហនុ និងលោក ចេង ស្រុង ប្រធានមន្ទីររៀបចំដែនដី នគរូបនីយកម្ម សំណង់ និងសុរយោដីខេត្តព្រះសីហនុ និងជាប្រធានក្រុមការងារចុះជួយមូលដ្ឋានឃុំអណ្តូងថ្ម និងលោកអនុប្រធានក្រុមការងារចុះជួយមូលដ្ឋានឃុំអណ្តូងថ្ម អញ្ជើញជាអធិបតីភាពក្នុងពិធីបើកបវេសន កាលឆ្នាំសិក្សាថ្មី២០២២-២០២៣ និងចែករង្វាន់សិស្សពូកែ បណ្ណណសរសើរ ដល់សិស្សជាប់ ជ័យលាភី ក្នុងឆ្នាំ២០២១-២០២២ ទាំងសាលាបឋមសិក្សា និងអនុវិទ្យាល័យ ស្ថិតក្នុងក្នុងអនុវិទ្យាល័យ ហ៊ុន សែន អណ្តូងថ្ម ស្ថិតនៅភូមិត្រពាំងស្អុយ២ ឃុំអណ្តូងថ្ម ស្រុកព្រៃនប់ ខេត្តព្រះសីហនុ និងមានការចូលរួមពីសំណាក់លោកមេឃុំ សមាជិកក្រុមប្រឹក្សាឃុំ នាយប៉ុស្តិ៍ឃុំ សប្បុរសជននានា លោកមេភូមិ អនុភូមិ និងលោកគ្រូ អ្នកគ្រូ សិស្សានុសិស្សយ៉ាងច្រើនកុះករ។
ក្នុងពិធីបើកបវេសនកាលឆ្នាំសិក្សា២០២២-២០២៣ លោក ចេង ស្រុង ប្រធានក្រុមការងារចុះជួយ មូលដ្ឋានឃុំអណ្តូងថ្ម បានអានសារលិខិត សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងឱកាសបើកបវេសនកាលឆ្នាំសិក្សា ២០២២ – ២០២៣។
ក្នុងឱកាសនោះដែរ លោក ចេង ស្រុង មានប្រសាសន៍ថា សូមចូលរួមអបអរសាទរចំពោះប្អូនៗនឹងក្មួយសិស្សានុសិស្សទាំងអស់ ដែលមានឱកាសបានចូលរៀន ទទួលយកចំណេះដឹងនាពេលនេះ ហើយក៏សង្ឃឹម និងជឿជាក់ថាប្អូនៗនិងក្មួយៗទទួលបានចំណេះដឹងពីលោកគ្រូ អ្នកគ្រូរួចហើយ ប្អូនៗ ក្មួយៗ សិស្សានុសិស្ស អាចកសាងអនាគតផ្ទាល់ខ្លួន អោយក្លាយជាទំពាំងស្នងឬស្សីដែរដុះលូតបានល្អក្នុងសង្គមជាតិ ហើយអភិវឌ្ឍខ្លួនក្លាយទៅជាធនធានមនុស្សដ៏សំខាន់ក្នុងការរួមចំណែកកសាង និងអភិវឌ្ឍន៍ប្រទេសជាតិយើងផងដែរ ។
លោកបានបន្ថែមទៀតថា សូមឲ្យក្មួយៗសិស្សានុសិស្សបេ្តជ្ញាចិត្តខ្ពស់ខិតខំប្រឹងប្រែងរៀនសូត្រ និងគោរពវិន័យរបស់សាលារៀន ដើម្បីប្រែក្លាយជាសិស្សល្អ កូនល្អ មិត្តល្អ ពលរដ្ឋល្អ។ សរុបមកកូនល្អ សិស្សល្អ មិត្តល្អ និងពលរដ្ឋល្អ ពិតជាលក្ខណៈសម្បត្តិប្រសើរ ថ្លៃថ្នូរ គួរឲ្យស្ងប់ស្ងែង ដូចនេះ យើងត្រូវខិតខំធ្វើខ្លួនឯង ប្រតិបត្តិលក្ខណៈសម្បត្តិទាំងនេះ ឲ្យខាងតែបាន ដើម្បីក្លាយខ្លួនជាកូនល្អ សិស្សល្អ មិត្តល្អ ពលរដ្ឋល្អ សម្រាប់សង្គមដ៏ផូរផង់នៃយើង ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
បន្ថែមពីនេះ លោកប្រធានក្រុមកាងារ ក៏ថ្លែងអំណរគុណចំពោះអាជ្ញាធរដែនដី មាតាបិតា អាណាព្យាបាល សប្បុរជន គណៈគ្រប់គ្រង គ្រឹះស្ថានសិក្សា ជាពិសេសលោកគ្រូ អ្នកគ្រូ ដែលបានពុះពារឧបសគ្គគ្រប់បែបយ៉ាងប្រកបដោយស្មារតី ទទួលខុសត្រូវខ្ពស់ ក្នុងការធានាបាននូវដំណើរការរៀន និងបង្រៀនប្រកបដោយប្រសិទ្ធភាព តាមគ្រប់រូបភាពក្នុង អំឡុងពេលនៃការប្រយុទ្ធប្រឆាំងនឹងជំងឺកូវីដ១៩ នាពេលកន្លងមកនេះ។
តាមរបាយការណ៍បញ្ជាក់ជូនដោយលោកនាយកអនុវិទ្យាល័យ ហ៊ុន សែន អណ្តូងថ្ម សាលាបឋមសិក្សា ហ៊ុន សែន អណ្តូងថ្ម មានអាគារចំនួន ៤ខ្នង ស្មើនឹង១៧បន្ទប់ សរុបសិស្សចំនួន ៥៥០នាក់ ស្មើនឹង១៥ថ្នាក់ លោកគ្រូ អ្នកគ្រូចំនួន ២២នាក់ ស្រីចំនួន១៣នាក់។
ក្នុងពិធីនោះដែរ លោកប្រធានក្រុមការងារចុះជួយមូលដ្ឋានឃុំអណ្តូងថ្ម និងលោកអនុប្រធាន បានឧបត្ថម្ភនូវថវិការមួយចំនួន ជូនដល់សាលាបឋមសិក្សាអណ្តូងថ្ម និងអនុវិទ្យាល័យ ហ៊ុន សែនអណ្តូងថ្ម ក្នុងឱកាសពិធីបើបវេសនកាលឆ្នំាសិក្សាថ្មីនេះ៕
