គណៈមេធាវីនៃព្រះរាជាណាចក្រកម្ពុជា រៀបចំកម្មវិធីបណ្តុះបណ្តាលផ្នែករដ្ឋប្បវេណី លើកទី៦

ភ្នំពេញ៖ នៅថ្ងៃទី១០ ខែមករា ឆ្នាំ២០២៣ នៅទីស្នាក់ការគណៈមេធាវីនៃព្រះរាជាណាចក្រកម្ពុជា បានរៀបចំកម្មវិធីបណ្តុះបណ្តាលផ្នែករដ្ឋប្បវេណីលើកទី៦ ស្របតាមអនុស្សារណៈនៃការយោគយល់រវាងគណៈមេធាវីនៃព្រះរាជាណាចក្រកម្ពុជា និងវិភាគទានច្បាប់ ដែលមានប្រធានបទស្តីពី «ការសរសេរពាក្យបណ្តឹង ឯកសារចម្លើយ និងឯកសារត្រៀមក្នុងសំណុំរឿងរដ្ឋប្បវេណី»។

កម្មវិធីបណ្ដុះបណ្ដាលនេះបានធ្វើឡើងក្រោមអធិបតីភាព ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា និងមានការអញ្ជើញចូលរួមជាវាគ្មិនកិត្តិយសពីលោកស្រីមេធាវី ទេព បូផល ជាស្ថាបនិកវិភាគទានច្បាប់ និងលោកមេធាវី អ៉ីវ ប៉ូលី ប្រធានគណៈកម្មការកិច្ចការរដ្ឋប្បវេណីនៃគណៈមេធាវី ព្រមទាំងសិក្ខាកាមជាមេធាវីចូលរួមសរុបចំនួន ៦២ នាក់។

នាឱកាសនោះផងដែរ ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានចូលរួមថ្លែងសុន្ទរកថាបិទកម្មវិធី និងបានថ្លែងអំណរគុណដល់សិក្ខាកាមជាមេធាវីដែលបានត្រងត្រាប់ស្តាប់ និងកត់ត្រានូវចំណុចសំខាន់ៗ ដែលវាគ្មិនកិត្តិយសទាំងពីររូបបានធ្វើបទបង្ហាញ ដើម្បីលើកកម្ពស់ឧត្តមភាព និងកិត្យានុភាពនៃវិជ្ជាជីវៈមេធាវី។

ក្នុងឱកាសនោះក៏មានការចែកនូវវិញ្ញាបនបត្របញ្ជាក់ការបណ្តុះបណ្តាលជូនសិក្ខាកាមដែលបានចូលរួមផងដែរ៕