ឯកឧត្តម រស់ វណ្ណា ដឹកនាំកិច្ចប្រជុំស្ដីពីកិច្ចសហប្រតិបត្តិការលើការគ្រប់គ្រងអនាម័យ និងការងារទឹកកខ្វក់សម្រាប់ទាំងអស់គ្នា

ភ្នំពេញ៖ នាថ្ងៃទី១៣ ខែមករា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្ដីពីកិច្ចសហប្រតិបត្តិការនាពេលអនាគតលើវិស័យអនាម័យ និងការងារទឹកកខ្វក់ ជាមួយលោក Jean Antoine FABY នាយកវិទ្យាស្ថានបារាំង AgroParisTech ដោយមានការអញ្ជើញចូលរួមពីថ្នាក់ដឹកនាំអគ្គនាយកដ្ឋានប្រព័ន្ធចម្រោះទឹកកខ្វក់ វិទ្យាស្ថានតេជោសែន សាធារណការ និងដឹកជញ្ជូន និងមន្ត្រីជំនាញពាក់ព័ន្ធ ។

កិច្ចប្រជុំនេះធ្វើឡើងក្នុងគោលបំណងបន្តពិភាក្សាលើកិច្ចសហប្រតិបត្តិការស្ដីពីការគ្រប់គ្រងអនាម័យ និងការងារទឹកកខ្វក់សម្រាប់ទាំងអស់គ្នា រវាងអគ្គនាយកដ្ឋានប្រព័ន្ធចម្រោះទឹកកខ្វក់ វិទ្យាស្ថានតេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន និងវិទ្យាស្ថានបារាំង AgroParisTech ដោយផ្តោតជាសំខាន់លើការគ្រប់គ្រងអនាម័យ និងការងារទឹកកខ្វក់នៅរាជធានីភ្នំពេញ និងរាជធានី-ខេត្តមួយចំនួនផងដែរ។

អង្គប្រជុំបានពិភាក្សាលើផែនការរៀបចំវគ្គបណ្ដុះបណ្ដាលរយៈពេលខ្លីដល់មន្ត្រីអគ្គនាយកដ្ឋានប្រព័ន្ធចម្រោះទឹកកខ្វក់លើជំនាញមួយចំនួនដូចជា៖ ការងារបច្ចេកទេស ការងារគ្រប់គ្រងអភិបាលកិច្ច និងការងារសេដ្ឋកិច្ចពាក់ព័ន្ធវិស័យប្រព័ន្ធទឹកកខ្វក់ ដែលគ្រោងរៀបចំក្នុងខែមិថុនា ខាងមុខ និងកម្មវិធីសិក្សាដើម្បីត្រៀមរៀបចំកិច្ចសហការចុះអនុស្សរណៈយោគយល់ រវាងវិទ្យាស្ថាន បារាំង AgroParisTech និងវិទ្យាស្ថានតេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន នៅឆ្នាំ២០២៣ ខាងមុខនេះ។

ថ្លែងនៅក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានសម្តែងអំណរគុណយ៉ាងជ្រាលជ្រៅដល់ភាគីបារាំង និងបានបង្ហាញការប្តេជ្ញាយ៉ាងមុតមាំលើកិច្ចសហប្រតិបត្តិការលើការគ្រប់គ្រងអនាម័យ និងការងារទឹកកខ្វក់ ជាមួយវិទ្យាស្ថាននេះ។

ជាមួយគ្នានោះដែរ ភាគីខាងវិទ្យាស្ថាន AgroParisTech បានស្នើសុំឯកឧត្តមប្រធានអង្គប្រជុំផ្ញើលិខិតផ្លូវការទៅវិទ្យាស្ថានបារាំង AgroParisTech លើចំណុចដែលបានពិភាក្សាគ្នា។ ជាការឆ្លើយតប ឯកឧត្តមរដ្ឋលេខាធិការ បានទទួលយកសំណើរបស់ភាគី AgroParisTech និងបានស្នើឱ្យវិទ្យាស្ថាននេះពន្លឿនកិច្ចសហប្រតិបត្តិការឱ្យបានឆាប់រហ័ស ដើម្បីត្រៀមលទ្ធភាពចុះអនុស្សរណៈយោគយល់ រវាងវិទ្យាស្ថានបារាំង Agro Paris Tech និងវិទ្យាស្ថានតេជោសែន សាធារណការ និងដឹកជញ្ជូន នៅក្នុងពេលឆាប់ៗខាងមុខនេះ៕