តំណាងរាស្រ្តខេត្តកំពង់ចាម អញ្ជើញចូលរួមក្នុងពិធីព្យាបាលជំងឺដោយឥតគិតថ្លៃជូនប្រជាពលរដ្ឋ ស្ថិតនៅក្នុងឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម
ភ្នំពេញ៖ តំណាងរាស្រ្តមណ្ឌលខេត្តកំពង់ចាម រួមមាន លោកជំទាវ កុល ធារិន សមាជិកាគណៈកម្មការទី២ នៃរដ្ឋសភា លោកជំទាវ ខុង ស៊ុនអេង សមាជិកាគណៈកម្មការទី៤ នៃរដ្ឋសភា លោកជំទាវ ស្រី គឹមឆយ សមាជិកាគណៈកម្មការទី១ នៃរដ្ឋសភា ឯកឧត្តម ច្រឹង គឹមស្រ៊ាន សមាជិកព្រឹទ្ធសភាភូមិភាគ២ ឯកឧត្តមវេជ្ជបណ្ឌិត គីមសួរ ភីរុណ ទីប្រឹក្សាក្រសួងសុខាភិបាល ប្រធានក្រុមការងារ ចុះជួយឃុំទួលព្រះឃ្លាំង និងអាជ្ញាធរស្រុក នាព្រឹកថ្ងៃទី១៥ ខែមករា ឆ្នាំ២០២៣ បានអញ្ជើញចូលរួមជាមួយក្រុមគ្រូពេទ្យស្ម័គ្រចិត្តចំនួន៥៥នាក់របស់ សម្ដេចឧត្ដមទេពញាណ ហ៊ុន ណេង បានចុះពិនិត្យព្យាបាលជំងឺជូនបងប្អូនប្រជាពលរដ្ឋដោយឥតគិតថ្លៃចំនួន៣៤៣នាក់ ស្ថិតនៅក្នុងឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម។
ក្នុងឱកាសនោះ សមាជិក សមាជិកា រដ្ឋសភា ព្រឹទ្ធសភា បានឧបត្ថម្ភថវិកាចំនួន ១០.៩០០.០០០ រៀល និងថវិកា លោកជំទាវ លាង វួចឆេង សម្តេចឧត្តមទេពញាណ ហ៊ុន ណេង ចំនួន ៥០០.០០០រៀល ដោយឡែក ឯកឧត្តម ច្រឹង គឹមស្រ៊ាន សមាជិកព្រឹទ្ធសភា ភូមិភាគ២ បានផ្តល់សម្ភារៈតេស្តកូវីតរហ័សដែលជាអំណោយរបស់ សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា ចំនួន១៣៦០តេស្ត ជូនដល់មន្ទីរពេទ្យខេត្តកំពង់ចាម ជូនដល់ការិយាល័យសុខាភិបាលស្រុកប្រតិបត្តិ មន្ទីរពេទ្យបង្អែកស្រុកស្ទឹងត្រង់ចំនួន១៣៥០តេស្ដ និងជូនដល់សាលាស្រុកចំនួន១០០តេស្ត ផងដែរ ៕
