សម្ដេចតេជោ សង្ឃឹមថា អង្ករកម្ពុជាដែលជាប់លេខ១ លើពិភពលោក នឹងទទួលបានការពេញនិយម ពីប្រជាជនម៉ាល់ឌីវ
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានថ្លែងដោយសង្ឃឹមថា អង្កររបស់កម្ពុជា ដែលជាប់លេខ១ លើពិភពលោកចំនួន ៥ដង ហើយកំពុងស្ថិតនៅជាប់ចំណាត់ថ្នាក់លេខ១ នឹងទទួលបានការពេញនិយមពីប្រជាជនម៉ាល់ឌីវ និងអ្នកទេសចរណ៍ដែលមកទស្សនកិច្ចនៅម៉ាល់ឌីវ ។
ក្នុងសន្និសីទសារព័ត៌មានរួមគ្នា ជាមួយប្រធានាធិបតីម៉ាល់ឌីវ នៅថ្ងៃទី១៦ ខែមករា សម្ដេចតេជោ ហ៊ុន សែន បានមានប្រសាសន៍ថា យើងពិតជាមានលទ្ធភាព ដើម្បីពង្រឹងទំហំពាណិជ្ជកម្មរវាងប្រទេសទាំងពីរ ដោយសារតែកម្ពុជា មាននូវទិន្ន័យនាំចូលមកម៉ាល់ឌីវ ដូចជា៖ អង្ករ និងវិស័យកសិកម្មដទៃទៀត ដែលមិនមែនគ្រាន់តែ សម្រាប់ប្រជាជនម៉ាល់ឌីវ នោះទេ ប៉ុន្ដែសម្រាប់វិស័យទេសចរណ៍ ដែលមកទស្សនកិច្ចនៅម៉ាល់ឌីវ ដោយសារអង្ករកម្ពុជា ស្ថិតជាអង្ករដែលជាប់លេខ១ លើពិភពលោកចំនួន ៥ដង ហើយកំពុងស្ថិតនៅជាប់ចំណាត់ថ្នាក់លេខ១ នៅឡើយ ។