ឯកឧត្តម លី ច័ន្ទតុលា អញ្ជើញបិទវគ្គបណ្តុះបណ្តាល និងចែកវិញ្ញាបនបត្រស្តីពី «ការផ្តល់សេវាផ្លូវច្បាប់បែបកុមារមេត្រី» ស្របតាមកិច្ចព្រមព្រៀងរវាងគណៈមេធាវីនៃព្រះរាជាណាចក្រកម្ពុជា និងអង្គការ UNICEF
ភ្នំពេញ៖ ឯកឧត្តម លី ច័ន្ទតុលា ប្រធានគណ:មេធាវីនៃព្រះរាជាណាចក្រកម្ពុជា នៅថ្ងៃទី១៦ ខែមករា ឆ្នាំ២០២៣ បានចូលរួមជាអធិបតីភាពក្នុងពិធីបិទវគ្គបណ្តុះបណ្តាល និងចែកវិញ្ញាបនបត្រស្តីពី «ការផ្តល់សេវាផ្លូវច្បាប់បែបកុមារមេត្រី» ស្របតាមកិច្ចព្រមព្រៀងរវាងគណៈមេធាវីនៃព្រះរាជាណាចក្រកម្ពុជា និងអង្គការ UNICEF។
វគ្គបណ្តុះបណ្តាលនេះ មានរយ:ពេល ៧២ម៉ោង ប្រព្រឹត្តទៅរៀងរាល់ថ្ងៃសុក្រថ្ងៃសៅរ៍ និងថ្ងៃអាទិត្យចាប់ពីថ្ងៃទី១៦ ខែធ្នូ ឆ្នាំ២០២២ ដោយមានគ្រូបង្គោលដែលមានចំណេះដឹង បទពិសោធន៍ និងជំនាញពាក់ព័ន្ធនឹងកិច្ចការពារកុមារ រួមមានៈ
-ឯកឧត្តម លីវ សុវណ្ណា អគ្គលេខាធិការគណ:មេធាវី
-លោក លឹម វណ្ណា មន្ត្រីកិច្ចការពារកុមារ ទទួលបន្ទុកយុត្តិធម៌កុមារនៃអង្គការ UNICEF
-លោកបណ្ឌិតមេធាវី មាស បូរ៉ា ប្រធានគណៈកម្មការសិទ្ធិមនុស្សនិងច្បាប់អន្តរជាតិនៃគណៈមេធាវីនៃព្រះរាជាណាចក្រកម្ពុជា
-លោកមេធាវី មាស សំណាង សមាជិកគណ:កម្មការសិទិ្ធមនុស្សនិងច្បាប់អន្តរជាតិនៃគណ:មេធាវីនៃព្រះរាជាណាចក្រកម្ពុជា។ វគ្គនេះបណ្តុះបណ្តាលដល់សហភាតាមេធាវីចំនួន ៨៧រូប (ស្រី ចំនួន ៣៣រូប)ដែលជាមេធាវីមានទីតាំងប្រកបវិជ្ជាជីវៈនៅរាជធានីភ្នំពេញ និងតាមបណ្តាខេត្តផងដែរ។
វគ្គបណ្ដុះ បណ្ដាល នេះក៏បង្ហាញផងដែរ អំពីការចូលរួមដ៏សកម្មរបស់គណៈមេធាវីជាមួយរាជរដ្ឋាភិបាលកម្ពុជា និងអង្គការ អន្ដរជាតិ នានា ជាដៃគូរ ជាពិសេសគឺអង្គការ UNICEF ក្នុងការផ្សព្វផ្សាយច្បាប់ស្ដីពីយុត្តិធម៌អនីតិជន សន្ធិសញ្ញា និងកតិកាសញ្ញាអន្ដរជាតិនានាពាក់ព័ន្ធនឹងសិទ្ធិ កុមារ ដល់សហភាតាមេធាវីដែលផ្ដល់សេវាការពារក្ដីពាក់ព័ន្ធនឹងកុមារ។
នាឱកាសនោះផងដែរ ឯកឧត្តម លី ច័ន្ទតុលា ប្រធានគណៈមេធាវី នៃព្រះរាជាចក្រកម្ពុជាបានថ្លែងអំណរគុណ ដល់ អង្គការ UNICEF ដែលមានកិច្ចសហការល្អជាមួួយគណ:មេធាវី ក្នុងការរៀបចំវគ្គបណ្តុះបណ្តាលនេះឡើង ហើយ ក៏សូម ថ្លែង អំណរគុណដល់គ្រូបង្គោលទាំងអស់ ដែលបានចំណាយពេលវេលាដ៏មានតម្លៃនិងបទពិសោធន៍ចូលរួមផ្ដល់ បទឧទ្ទេសនាមក្នុងវគ្គបណ្ដុះបណ្ដាលជូនដល់សហភាតាមេធាវី។
ឯកឧត្តមប្រធានសង្ឃឹមថា សហភាតាទាំងអស់នឹង យក ចំណេះ ដឹង និងបទពិសោធន៍ ដែលទទួលបានពីវគ្គ បណ្ដុះ បណ្ដាលនេះទៅអនុវត្តក្នុងការផ្ដល់សេវាការពារក្ដីជូនកុមារ ដើម្បីធានាឱ្យបាននូវការការពារសិទ្ធិ ឧត្ដមប្រយោជន៍របស់ កុមារ និងធ្វើយ៉ាងណាឲ្យពួកគាត់អាចទទួល បានយុត្តិធម៌ការស្ដារ នីតិសម្បទារវិធានការបង្វែនិងធ្វើសមាហរណកម្មទៅក្នុងសហគមន៍ និងសង្គម ជាតិទាំងមូលនិងដេីម្បីលើកកម្ពស់ឧត្តមភាពនិងកិត្យានុភាពនៃវិជ្ជាជីវៈមេធាវី៕
