នាយករដ្ឋមន្ត្រីកម្ពុជា កំពុងពិចារណាផ្តល់ការបណ្តុះបណ្តាល វិជ្ជាជីវៈដល់ពលរដ្ឋក្រីក្រ ដោយមិនគិតថ្លៃ ហើយផ្តល់ប្រាក់ឧបត្ថម្ភថែមទៀត
ភ្នំពេញ៖ ក្នុងពិធីប្រគល់សញ្ញាបត្រដល់ និស្សិតសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់ ដែលបានបញ្ចប់ការសិក្សាដោយជោគជ័យ នាថ្ងៃទី២៣ មករានេះ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងថា សម្តេច កំពុងពិចារណាផ្តល់ការបណ្តុះបណ្តាលវិជ្ជាជីវៈដល់ប្រជាពលរដ្ឋក្រីក្រ ដោយមិនគិតថ្លៃ ហើយផ្តល់ប្រាក់ឧបត្ថម្ភថែមទៀត។
សម្តេចតេជោ បន្តថា ចំពោះការផ្ដល់នេះ សម្ដេចគ្រោងអនុវត្តន៍ នៅចុងឆ្នាំ២០២៣ ឬឆ្នាំ២០២៤ ។
សម្តេចតេជោ បានមានប្រសាសន៍ថា មានប្រទេសជាច្រើនបានធ្វើបដិវត្តន៍ តែមិនដូចការធ្វើបដិវត្តន៍នៅកម្ពុជានោះទេ។ ខុសត្រង់ថា ការធ្វើបដិវត្តន៍របស់ប្រទេសទាំងនោះ បានបន្តជាមួយសមិទ្ធផលរបបចាស់ ឬគ្រាន់តែកែលំអចំណុចដែលរបបថ្មីយល់ថាមិនល្អ ប៉ុន្តែនៅកម្ពុជា ត្រូវចាប់ផ្តើមឡើងវិញលើគ្រប់វិស័យ។
សម្តេចតេជោ បញ្ជាក់ថា អ្នកខ្លះទទួលបានការបណ្តុះបណ្តាល ពីក្រោមដំបូលសាលារបស់កម្ពុជា ប៉ុន្តែគេបែរជាមើលស្រាលគុណភាពអប់រំនៅកម្ពុជា។
សម្ដេចបន្ថែមថា សម្តេចនៅតែមានមោទនភាព ចំពោះការសម្រេចឱ្យវិស័យឯកជនចូលរួមវិនិយោគលើវិស័យអប់រំ។ សម្តេចថា បើមិនឱ្យវិស័យឯកជនចូលរួមវិនិយោគលើវិស័យអប់រំទេ កម្ពុជានឹងជួបបញ្ហាផ្តល់ការអប់រំ ៕
