មន្ទីររៀបចំដែនដីខេត្តព្រះសីហនុ ផ្ដល់បណ្ណកម្មសិទ្ធដីធ្លី ដល់ប្រជាពលរដ្ឋនៅភូមិអូរចំណារ ឃុំអូរឧកញ៉ាហេង ស្រុកព្រៃនប់
ព្រះសីហនុ៖ មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តព្រះសីហនុ សហការជាមួយរដ្ឋបាលខេត្តព្រះសីហនុ នៅរសៀលថ្ងៃទី២៤ ខែមករា ឆ្នាំ២០២៣ បានផ្ដល់ប័ណ្ណកម្មសិទ្ធដីធ្លីជូនដល់ប្រជាពលរដ្ឋ នៅភូមិអូរចំណារ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ប្រមាណជាង៥០០បណ្ណ បន្ទាប់ពីដំណើរចុះបញ្ជីរួចរាល់ជាស្ថាពរ។
ពិធីនេះធ្វើឡើងនៅបរិវេណសាលាឃុំអូរឧកញ៉ាហេង នារសៀលថ្ងៃទី២៤ ខែមករា ឆ្នាំ២០២៣ ក្រោមអធិបតីភាពលោក លៀម សុដា អភិបាលរង នៃគណៈអភិបាលខេត្តព្រះសីហនុ និងលោក ចេង ស្រុង ប្រធានមន្ទីររៀបចំដែនដី នរូបនីយកម្ម សំណ់ង និងសុរិយោដីខេត្តព្រះសីហនុ ដែលមានការចូលរួមពីលោកអភិបាលរងស្រុក ប្រធានភូមិបាលស្រុក អាជ្ញាធរដែនដី និងបងប្អូនប្រជាពលរដ្ឋយ៉ាងច្រើន។
លោក សំ សុមុនោ អនុប្រធានមន្ទីររៀបចំដែនដី នគរូបនីយកម្ម សំណង់ និង សុរិយោដី ខេត្តព្រះសីហនុ បានអានរបាយការណ៍ អំពីការចុះបញ្ជី ជាលទ្ធផលដែលទទួលបានពីការចុះបញ្ជីភូមអូរចំណារ ឃុំអូរឧកញ៉ាហេង ក្បាលដីដែលគណៈកម្មការរដ្ឋបាលបានលើកសំណើផ្តល់កម្មសិទ្ធិលើដីធ្លីក្នុងការចេញវិញ្ញាបនបត្រសម្គាល់ម្ចាស់អចលវត្ថុ (ប័ណ្ណកម្មសិទ្ធិ) សរុបចំនួន ៥០៤ក្បាលដី នៃចំនួនក្បាលដីសរុប ៥៧៣ ក្នុងនោះរួមមាន៖
ទ្រព្យប្តីប្រពន្ធ ចំនួន ៣៦៧ក្បាលដី
ទ្រព្យខាងប្រពន្ធ ១៣ក្បាលដី
ទ្រព្យខាងប្តី ១១ ក្បាលដី
ទ្រព្យនៅលីវ ១០៥ក្បាលដី
ទ្រព្យកម្មសិទ្ធិអវិភាគ ៦ក្បាលដី
ទ្រព្យរដ្ឋ ១ក្បាលដី
និងទ្រព្យនីតិបុគ្គលផេ្សងពីរដ្ឋ ចំនួន១ក្បាលដី។
លោកបន្តទៀតថា ការចេញប័ណ្ណកម្មសិទ្ធិដីធ្លីជូនបងប្អូន គឺធានារបាននូវភាពកក់ក្តៅ និងសុវត្ថិភាពដីធ្លី មានសិទ្ធិកាន់កាប់ដីធ្លីពេញលេញ តាមរយៈវិញ្ញបនបត្រសម្គាល់ម្ចាស់អចលវត្ថុ ជាភស្តុតាងនូវការកាន់កាប់ដីធ្លីរបស់ខ្លួន និងជៀសវាង នូវការរំលោភបំពាន់លើដីធ្លី ។ ដូចនេះ ប័ណ្ណកម្មសិទ្ធិនេះ គឺជាភស្តុតាង បញ្ជាក់ពីកម្មសិទ្ធិស្របច្បាប់ដែលត្រូវបានការពារដោយច្បាប់ និងធានាដោយរដ្ឋ មិនមានជនណាមួយអាចក្លែងបន្លំ ឫធ្វើការដកហូតដីនោះបានឡើយ លើកលែងតែក្នុងករណីដែលរដ្ឋត្រូវការដើម្បីផលប្រយោជន៍សារធារណៈ ហើយត្រូវទូទាត់ជាមុននូវសំណងដោយសមរម្យ និង យុត្តិធម៌។
ក្នុងពិធីនោះលោក លៀម សុដា អភិបាលរងខេត្តព្រះសីហនុ បានមានប្រសាសន៍ថា តាំងនាមអោយអាជ្ញាធរខេត្ត សូមចូលរួមអបអរសាទរ ពិធីចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) នៅភូមិអូរចំណា ដែលបានធ្វើការចុះបញ្ជីដីធ្លីកន្លងមក តាមអនុក្រឹត្យលេខ ៤៦ អនក្រ.បក ចុះថ្ងៃទី៣១ ខែឧសភា ឆ្នាំ២០០២ និងអនុក្រឹត្យលេខ ១២២ អនក្រ.បក ចុះថ្ងៃទី០៩ ខែមិថុនា ឆ្នាំ២០០២ ស្តីពីនិតិវិធីនៃការកសាងប្លង់សុរិយោដី និងសៀវភៅគោលបញ្ជីដីធ្លី និងសារាចរណែនាំលេខ ០០១ ដនស.សដ ចុះថ្ងៃទី១៩ ខែសីហា ឆ្នាំ២០០២ ស្តីពីនីតិវិធីនៃការសាងប្លង់សុរិយោដី និងសៀវភៅគោលបញ្ជីដីធ្លី ប្រកបដោយតម្លាភាព និងបច្ចេកវិជ្ជាទំនើប ដែលប្រទេសជឿនលឿន លើពិភពលោកកំពុងអនុវត្ត និងមានប្រសិទ្ធិភាពលើការគ្រប់គ្រងដីធ្លី នេះជាការសមស្របបំផុត ដែលបានកំណត់ក្នុងគោលនយោបាយដីធ្លី របស់ប្រមុខរាជរដ្ឋាភិបាលកម្ពុជា ដើម្បីលើកស្ទួយដល់ការអភិវឌ្ឍន៍របស់ប្រទេសជាតិ ជាប្រយោជន៍រាជរដ្ឋាភិបាល និងប្រជាពលរដ្ឋជាម្ចាស់ដីផង ។
លោកអភិបាលរងខេត្តបន្តទៀតថា នេះគឺជាខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណចក្រកម្ពុជា តែងគិតគូដល់សុខទុក្ខបងប្អូនប្រជាពលរដ្ឋគ្រប់ពេលវេលា ព្រោះនេះគឺជាទិសដៅរបស់រាជរដ្ឋាភិបាល មានដីត្រូវតែចុះបញ្ជី ដើម្បីប្រែក្លាយឲ្យជាទម្លាប់ និងប្រពៃណី គឺបង្កើតបាននូវវប្បធម៌ចុះបញ្ជីដីធ្លី សម្រាប់ប្រទេសកម្ពុជានាពេលខាងមុខ ។
លោកបន្ថែមទៀតថា ដើម្បីសម្រេចបានដល់ការចេញវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) នីមួយៗ គឺមានការងារច្រើនណាស់ ដែលទាមទារនូវការខិតខំប្រឹងប្រែងរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ មន្ទីរ ស្ថាប័នពាក់ព័ន្ធ រួមទាំងអាជ្ញាធរមូលដ្ឋាន និងការចូលរួមពីសំណាក់បងប្អូនប្រជាពលរដ្ឋដែលជាម្ចាស់ដី និងអ្នកកាន់កាប់ដីទាំងអស់ ទាំងដីរដ្ឋ និងដីឯកជនផងដែរ៕
