ឯកឧត្តម រស់ វណ្ណា ដឹកនាំកិច្ចប្រជុំពិភាក្សា លើការងាររៀបចំពង្រឹង ស្ថាប័នគ្រប់គ្រងទឹកកខ្វក់ និងផែនការសិក្សាតម្លៃសេវាទឹកកខ្វក់ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ

ភ្នំពេញ៖ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន នាថ្ងៃទី៣១ ខែមករា ឆ្នាំ២០២៣ បានអញ្ជើញដឹកនាំ កិច្ចប្រជុំពិភាក្សាជាមួយក្រុមការងារធនាគារពិភពលោក(World Bank) ដើម្បីពិភាក្សាលើការងាររៀបចំ ពង្រឹងស្ថាប័នគ្រប់គ្រងទឹកកខ្វក់ និងផែនការការងារអនុវត្តសម្រាប់ការសិក្សាតម្លៃសេវាទឹកកខ្វក់ នៃ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមហិរញ្ញប្បទានឥណទានរបស់ ធនាគារពិភពលោក ដោយមានការចូលរួមពីថ្នាក់ដឹកនាំក្រសួងទទួលបន្ទុក មន្ត្រីបច្ចេកទេស នៃអគ្គ នាយកដ្ឋានចម្រោះទឹកកខ្វក់ជាច្រើនរូបផងដែរ។

អង្គប្រជុំបានពិភាក្សាលើការប្រកាសសមាសភាពក្រុមការងារនៃគម្រោងការរៀបចំផែនការសិក្សាតម្លៃសេវាទឹកកខ្វក់ និងកិច្ចព្រមព្រៀងសម្រាប់វិក័យបត្ររួមរបស់រដ្ឋាភិបាល ដើម្បីសម្រេចបាននូវលទ្ធភាពផ្ដល់ សេវាមូលដ្ឋាន ទាក់ទងនឹងអនាម័យ ការផ្គត់ផ្គង់ទឹកស្អាតតាមបំពង់ទៅក្នុងលំនៅដ្ឋាន និងការគ្រប់គ្រងទឹកសំណល់ (ជាពិសេសនៅតំបន់ទីក្រុង) ប្រកបដោយប្រសិទ្ធភាព សុវត្ថិភាព និងគ្រប់ជ្រុងជ្រោយ។

ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការ បានណែនាំឱ្យសមាជិកក្រុមការងារទាំងអស់ សហការឱ្យបានជិតស្និទ្ធជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីពិភាក្សាលើការងារពង្រឹងស្ថាប័នគ្រប់គ្រង និងការងារប្រើប្រាស់វិក្កយបត្ររួម សម្រាប់តម្លៃនៃការចំណាយលើសេវា ប្រើប្រាស់ទឹកស្អាត ក៏ដូចជាពិនិត្យលើសេវាពាក់ព័ន្ធផ្សេងទៀតជាមួយស្ថាប័នពាក់ព័ន្ធ និងបានជំរុញលើកទឹកចិត្តឱ្យក្រុមការងារសហការជាមួយអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដើម្បីបង្កភាពងាយស្រួលលើការបង់ប្រាក់តាមប្រព័ន្ធអនឡាញ និងការប្រមូលចំណូលលើសេវាទាំងនោះផងដែរ៕