សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ឧបត្ថម្ភនូវគ្រឿងឧបភោគបរិភោគ ជូនអតីតយុទ្ធជន មានជីវភាពទីទ័លក្រ ២០០គ្រួសារ នៅខេត្តបាត់ដំបង

ភ្នំពេញ៖ ឧត្តមសេនីយ៍ត្រី ហួម ខ្វែក មេបញ្ជាការ តំបន់ប្រតិបត្តិការសឹករង បាត់ដំបង ជាអនុប្រធាន សមាគមអតីតយុទ្ធជនកម្ពុជាខេត្ត នៅថ្ងៃទី៩ ខែកុម្ភៈ ឆ្នាំ២០២៣ បានអញ្ជើញចូលរួមសំណេះសំណាលសួរសុខទុក្ខ អតីតយុទ្ធជនទីទ័លក្រ ចំនួន ២០០គ្រួសារ ក្នុងពិធីក្រុងពាលីបញ្ចុះបឋមសិលាសាងសង់អគារទីស្នាក់ការ សមាគមអតីតយុទ្ធជនកម្ពុជាខេត្តបាត់ដំបង ក្រោមអធិបតីភាព ឯកឧត្តម នាយឧត្តមសេនីយ៍ កិត្តិ​សង្គហ​បណ្ឌិត គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស អនុប្រធាន និងជាអគ្គលេខាធិការ សមាគមអតីតយុទ្ធជនកម្ពុជា ស្ថិតក្នុងសង្កាត់ព្រែកព្រះស្តេច ក្រុងបាត់ដំបង។

សូមបញ្ជាក់ថាអគារស្នាក់ការសមាគមអតីតយុទ្ធជនខេត្តបាត់ដំបងដែលរដ្ឋបាលខេត្តផ្តល់ដីសម្រាប់កសាងក្នុងគោលបំណងបម្រើការងារសមាគមអតីតយុទ្ធជនដែលរយៈពេលកន្លងមកជួបការលំបាកនៅពេលជួបប្រជុំការងារសមាគមអតីតយុទ្ធជនខេត្តត្រូវសុំទីតាំងកន្លែងផ្សេងៗ ខណៈអតីតយុទ្ធជនទូទាំងខេត្តបាត់ដំបងមានប្រមាណជាង១ម៉ឺននាក់ ហើយអគារស្នាក់ការសមាគមអតីតយុទ្ធជនខេត្តបាត់ដំបង ជាអំណោយដ៍ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលទទួលសាងសង់ដោយឯកឧត្តម អ្នកឧកញ៉ាបណ្ឌិត ម៉ម វណ្ណឌី ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយ ដែលស្នាក់ការនេះមានបណ្តោយ២៨ម៉ែត្រ និងទទឹង២១.៦០ម៉ែត្រ ស្មើនឹងចំនួន ៦បន្ទប់។

ក្នុងឱកាសនោះដែរ ឯកឧត្តម នាយឧត្តមសេនីយ៍ កិត្តិ​សង្គហ​បណ្ឌិត គន់ គីម ក៏បានប្រគល់នូវអំណោយឧបត្ថម្ភរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់បងប្អូនអតីតយុទ្ធជនទាំង ២០០គ្រួសារ ដោយក្នុងមួយគ្រួសារទទួលបានថវិកា ៥០.០០០រៀល អង្ករ ២៥គីឡូក្រាម និងគ្រឿងឧបភោគ បរិភោគមួយចំនួនផងដែរ៕