បេីកម៉ូតូលឿនដូចហោះ ខ្វះការប្រុងប្រយ័ត្ន បណ្ដាលឲ្យដួលស្លាប់ម្នាក់ របួសធ្ងន់ម្នាក់ នៅស្រុកស្វាយចេក

ភ្នំពេញ៖ យុវជន២នាក់ ជិះម៉ូតូឌុបគ្នាក្នុងល្បឿនយ៉ាងលឿនមិនប្រយ័ត្នបណ្តាលឲ្យដួលរងរបួសធ្ងន់២នាក់ ក្រោយមកយុវជនម្នាក់បានស្លាប់។ ហេតុការណ៍គ្រោះថ្នាក់ចរាចរណ៍បង្កដោយខ្លួនឯងនេះ បានកើតឡើង កាលពីយប់ថ្ងៃទី១៣ ខែកុម្ភៈ ឆ្នាំ២០២៣ លើកំណាត់ផ្លូវលេខ ២៥៦៤ ពីភូមិផ្គាំទៅភូមិស្វាយស ត្រង់ចំណុចចុងអាងផ្គាំ ស្ថិតក្នុងឃុំផ្គាំ ស្រុកស្វាយចេក ខេត្តបន្ទាយមានជ័យ ។

នគរបាលស្រុកស្វាយចេក បានឲ្យដឹងថា ដំបូងមានម៉ូតូ១គ្រឿងម៉ាក វ៉េវអាវកាច់ សេរីឆ្នាំ២០០០ គ្មានស្លាកលេខ បើកបរដោយឈ្មោះ ឆេក លីផាត់ ភេទប្រុសអាយុ ១៨ឆ្នាំ នៅភូមិតាវង ឃុំពន្លៃ និងអ្នករួមដំណើរឈ្មោះ ក្បឹប ភារ: ភេទប្រុស អាយុ ១៧ឆ្នាំនៅភូមិគោកតាសុខ ឃុំពន្លៃស្រុកភ្នំស្រុក ខេត្តបន្ទាយមានជ័យ បានបើកបរពីទិសខាងលិច ទៅទិសខាងកើតតាមបណ្តោយផ្លូវលេខ២៥៦៤ ពីភូមិផ្គាំទៅភូមិស្វាយស ត្រង់ចំណុចចុងអាងផ្គាំ បានដួលដោយពុំដឹងមូលហេតុបណ្តាល អ្នកបើកបរម៉ូតូនិងអ្នករួមដំណើរ រងរបួសធ្ងន់ទាំង០២នាក់ ក្រោយមកឈ្មោះ ឆេក លីផាត់ បានស្លាប់ក្រោយពេលបញ្ជូនដល់មន្ទីពេទ្យបង្អែកស្រុកថ្មពួក។

នគរបាលបានបញ្ជាក់ថា៖មូលហេតុ ដែលបង្កឲ្យកើតមានគ្រោះថ្នាក់នេះ បណ្តាលមកពីអ្នកបើកបរម៉ូតូក្នុងល្បឿនលឿន ខ្វះការប្រុងប្រយ័ត្ន ៕