អភិបាលខេត្តរតនគិរី អញ្ជើញជាអធិបតីក្នុងពិធីសម្ពោធអគារស្នាក់នៅ១ខ្នង និងបន្ទប់ទឹក១ខ្នងរបស់អង្គការពន្លឺអនាគត

ភ្នំពេញ៖ ឯកឧត្តម ញ៉ែម សំអឿន អភិបាលខេត្តរតនគិរី នាព្រឹកថ្ងៃទី១៤ ខែកុម្ភៈ ឆ្នាំ២០២៣ បានអញ្ជើញជាអធិបតីក្នុងពិធីសម្ពោធអគារស្នាក់នៅ១ខ្នង និងបន្ទប់ទឹក១ខ្នងរបស់អង្គការពន្លឺអនាគតដែលមានទីតាំងស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុង។

ពិធីនេះក៏មានការអញ្ជើញចូលរួមពីសំណាក់ ឯកឧត្តមជាអភិបាលរងខេត្ត មេបញ្ជាការកងកម្លាំងទាំង៣ លោក លោកស្រី ប្រធាន អនុប្រធានមន្ទីរអង្គភាពជាច្រើនរូបទៀតផងដែរ។

លោក នួន សុថេរ៉ូ ប្រធានអង្គការពន្លឺអនាគត បានលើកឡើងថា អង្គការពន្លឺអនាគតមានការផ្តល់សេវាថែទាំបានល្អប្រសើរ ដោយយកចិត្តទុកដាក់ខ្ពស់ ក្នុងការថែទាំ កុមារកំព្រា កុមារក្រីក្រ និងកុមារងាយរងគ្រោះកម្ពុជា តាមរយៈការផ្ដល់ អន្តេវាសិកដ្ឋាន ការហូបចុក ថែទាំសុខភាព និងការអប់រំនៅក្នុងមណ្ឌលដោយមានភាសារអង់គ្លេស ជំនាញកុំព្យូទ័រ ជំនាញអេឡិចត្រូនិច សិល្បៈបុរាណ ព្រមទាំងបញ្ជូនទៅរៀននៅសាលារៀនរដ្ឋ ពីថ្នាក់បឋមសិក្សា រហូតដល់ មហាវិទ្យាល័យ ដើម្បីឲ្យពួកគេមាន សមត្ថភាព ក្នុងការប្រកបមុខរបរចិញ្ចឹមជីវិតបានដោយខ្លួនឯងនាពេល អនាគត និងមិនមានការរើសអើងកុមារ ផ្តោតលើការគោរពសិទ្ធិកុមារ និងអនុវត្តតាមបទដ្ឋានថែទាំជំនួស អប្បរមា របស់ក្រសួងសង្គមកិច្ច។

ប្រធានអង្គការរូបនេះបានបន្តថា អង្គការពន្លឺអនាគត សាខាខេត្តរតនគិរីបានចាប់ផ្តើមទទួលយកកុមារមកចិញ្ចឹមបីបាច់ថែរក្សាចាប់តាំង ពីឆ្នាំ២០០៩ រហូតមកដល់ពេលបច្ចុប្បន្ននេះ សរុបចំនួន៩៦នាក់ ដែលក្នុងនោះកុមារ ចំនួន ៣១នាក់ បានរៀនចប់ និងមានការងារធ្វើអាចរស់នៅដោយឯករាជ្យ។ហើយទិសដៅអនុវត្តជាប្រចាំគឺអង្គការពន្លឺអនាគតបន្តទទួលយកកុមារកំព្រា និងកុមារងាយរងគ្រោះ មកចិញ្ចឹមបីបាច់ថែរក្សា និងស្វែងរកសេវាបន្ត ដើម្បីជួយគាំទ្រពួកគេអោយមាន ចំណេះ ជំនាញពិត ប្រាកដសំរាប់អនាគតរបស់ពួកគេ។

មានប្រសាសន៍សំណេះសំណាលនាឱកាសនេះឯកឧត្តម ញ៉ែម សំអឿន បានថ្លែងអំណរគុណចំពោះ លោកស្រីប៉ាស្កាល់ ជាស្ថាបនិក និងជាប្រធានអង្គការ គ្លេនហេស្សិន នៅប្រទេសអូទ្រីស និងជាតំណាងដៃគូរ អភិវឌ្ឍន៍ ព្រមទាំងក្រុមគ្រួសារ ដែលមានទឹកចិត្តសប្បុរសជ្រះថ្លា និង យកចិត្តទុកដាក់ចំពោះ សេចក្តីស្រែកឃ្លានក្នុងការចាប់យកចំណេះដឹង របស់ក្មួយៗនៅក្នុងមណ្ឌលនេះ និងកុមារក្នុង សហគមន៍ ដែលបានឧបត្ថម្ភថវិកាក្នុងការសាងសង់សមិទ្ធិផលខាងលើ បំពាក់ឧបករណ៍ និង គ្រឿងសង្ហារឹមក្នុងការថែទាំ និងដើម្បីលើកស្ទួយការបណ្តុះបណ្តាល ផ្នែកធនធានមនុស្សអោយកាន់តែសំបូរបែប ប្រកបដោយ សមត្ថភាព និង គុណភាព។

ឯកឧត្តមអភិបាលខេត្ត បានចាត់ទុកអំណោយដ៏ថ្លៃថ្លានេះគឺជាការចូលរួមដ៏ធំធេងក្នុងការកាត់ បន្ថយភាព លំបាករបស់កុមារកំព្រា កុមារក្រីក្រ និងកុមារងាយរងគ្រោះ ជាពិសេសកុមារ ដែលជាកូន ជាចៅ របស់បងប្អូនជនជាតិដើមភាគតិច ដែលស្ថិតនៅក្នុងសហគមន៍ទាំងមូលក្នុងខេត្តរតនគិរី។ហើយបានចាត់ទុកវិស័យអប់រំជាកូនសោរដ៏សំខាន់ក្នុងការកាត់បន្ថយភាព ក្រីក្ររបស់ប្រជាពលរដ្ឋ និងកិច្ចអភិវឌ្ឍន៍សេដ្ឋកិច្ច និង សង្គមប្រទេសកម្ពុជា។

សូមបញ្ជាក់ថា នៅក្នុងឱកាសនេះ ឯកឧត្តមអភិបាលខេត្ត បានឧត្ថម្ភ អង្ករ១តោន សម្ភារៈសិក្សា៧០ឈុត និងថវិកា ៤លានរៀលដើម្បីសម្រួលក្នុងការហូបចុកនិងការសិក្សារៀនសូត្ររបស់ក្មួយៗក្នុងមណ្ឌលនេះ។ដោយឡែកលោក ចាន់ រតនា បានឧត្ថម្ភសាប៊ូដុសខ្លួនចំនួន១២កេស និងអង្គការគ្លេនហេស្សិន ប្រទេសអូទ្រីសក៏បានផ្តល់កង់ចំនួន៤១ គ្រឿងផងដែរ ៕