ឯកឧត្តម តូច ចាន់នី ចូលរួមក្នុងកិច្ចប្រជុំលើកដំបូង នៃក្រុមការងារបច្ចេកទេសរៀបចំស្ថាប័ននីយកម្មវិជ្ជាជីវៈសង្គមកិច្ច និងវិជ្ជាជីវៈនីយកម្មកម្លាំងសេវាសង្គម

ភ្នំពេញ៖ ឯកឧត្តម តូច ចាន់នី អគ្គនាយក នៃអគ្គនាយកដ្ឋានសេវាសង្គមកិច្ច នាព្រឹកថ្ងៃអង្គារ ២កើត ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២១ ខែកុម្ភៈ ឆ្នាំ២០២៣ បានអញ្ជើញចូលរួមក្នុងកិច្ចប្រជុំលើកដំបូង នៃក្រុមការងារបច្ចេកទេសរៀបចំស្ថាប័ននីយកម្មវិជ្ជាជីវៈសង្គមកិច្ច និងវិជ្ជាជីវៈនីយកម្មកម្លាំងសេវាសង្គម ក្រោមអធិបតីភាព ឯកឧត្តមបណ្ឌិត អុល រ៉ូ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងដ៏ខ្ពង់ខ្ពស់ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងមានការអញ្ជើញចូលរួមពីសំណាក់ ឯកឧត្តមអនុរដ្ឋលេខាធិការ ឯកឧត្តមអគ្គនាយក ឯកឧត្តមនាយកវិទ្យាស្ថាន តំណាងយូនីសេហ្វ លោក លោកស្រី ប្រធាន អនុប្រធាននាយកដ្ឋាន លោក លោកស្រី ប្រធាន អនុប្រធានការិយាល័យ និងមន្រ្តីប្រមាណចំនួន ៣០នាក់។

គោលបំណងនៃកិច្ចប្រជុំនេះ គឺប្រកាសសមាសភាពក្រុមការងារបច្ចេកទេសរៀបចំស្ថាប័ននីយកម្មវិជ្ជាជីវៈសង្គមកិច្ច និងវិជ្ជាជីវៈនីយកម្មកម្លាំងសេវាសង្គម និងប្រមូលធាតុចូលលើការកសាងផែនការសម្រាប់ឆ្នាំ២០២៣ ក្នុងការកំណត់តម្រូវការកម្លាំងសេវាសង្គម និងភាពខ្វះចន្លោះប្រហោងប្រព័ន្ធសុខុមាលភាពសង្គម និងធានាថាច្បាប់ គោលនយោបាយ ការចុះឈ្មោះ ការទទួលស្គាល់ និងមានប្រព័ន្ធផ្តល់អាជ្ញាប័ណ្ណ ឬលិខិតបញ្ជាក់ពីវិជ្ជាជីវៈសម្រាប់កម្លាំងសេវាសង្គមប្រកបដោយប្រសិទ្ធភាព ៕