មន្ទីរការងារខេត្តបន្ទាយមានជ័យ រៀបចំពិធីផ្សព្វផ្សាយការងារ គ្រប់គ្រងហត្ថពលកម្មបរទេស
ភ្នំពេញ៖ មន្ទីរការងារ និងបណ្តុះបណ្តាលវិជ្ជាជីវៈខេត្តបន្ទាយមានជ័យ រៀបចំពិធីផ្សព្វផ្សាយការងារគ្រប់គ្រងហត្ថពលកម្មបរទេស ធ្វើឡើងក្រោមអធិបតីភាពលោក យឹម សំណាង អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ រួមនឹងមានការចូលរួម លោក នួន ស៊ីណា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត លោក-លោកស្រី សមត្ថកិច្ច លោក-លោកស្រីអ្នកពាក់ព័ន្ធ តំណាងសហគ្រាសគ្រឹះស្ថាន ធ្វើឡើងនៅសាលប្រជុំ ធំ សាលាខេត្តបន្ទាយមានជ័យ ថ្ងៃទី២១ ខែកុម្ភៈ ឆ្នាំ២០២៣។
លោក នួន ស៊ីណា ប្រធានមន្ទីរការងារ បានឱ្យដឹងថា ក មន្ទីរការងារ និងបណ្ដុះបណ្ដាលវិជ្ជាជីវៈខេត្តបន្ទាយមានជ័យ បានដើរតួនាទី ជាមន្ត្រីត្រួតពិនិត្យការ ស្នើសុំកូតាប័ណ្ណ និងសៀភៅការងារជនបរទេសតាមប្រព័ន្ធស្វ័យប្រវត្តិកម្ម FWCMs កម្រិតទី១ (Adminថ្នាក់ខេត្ត) សម្រាប់ខេត្តបន្ទាយមានជ័យ។ ជាលទ្ធផលការងារសម្រេចបាន ក្នុងឆ្នាំ២០២២ បានផ្តល់លិខិតអនុញ្ញាត ប្រើប្រាស់ហត្ថពលកម្មបរទេស (កូតា) បានចំនួន២៨ក្រុមហ៊ុន, ផ្តល់ប័ណ្ណការងារ និងសៀវភៅការងារជនបរទេស បានចំនួន ៣៤៤៨ នាក់ (ស្រី១០៤៣នាក់), ផ្តល់ប័ណ្ណការងារ និងសៀវភៅការងារជនបរទេស (ស្នាក់នៅអចិន្ត្រៃយ៍)ចំនួន ម្នាក់។
លោក យឹម សំណាង អភិបាលរងខេត្តបន្ទាយមានជ័យបានមានប្រសាសន៍ថា ៖ បន្ទាប់ពីទទួលបានអនុសាសន៍ និងការចង្អុលបង្ហាញដឹកនាំដ៏ខ្ពង់ខ្ពស់ពី សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គណៈកម្មការអន្តរក្រសួង និងបានដាក់ចេញនូវយុទ្ធនាការត្រួតពិនិត្យ ការងារអធិការកិច្ចហត្ថពលកម្មបរទេស ដែលមានរយៈពេល ៦ខែ ចាប់ពីខែមករា ដល់ខែមិថុនា ឆ្នាំ២០២៣ ដោយបែងចែកជា ២ ដំណាក់កាល ៖ ដំណាក់កាលទី១ មានរយៈពេល ៣ខែ ចាប់ពីខែមករា ដល់បំណាច់ខែមីនា ឆ្នាំ២០២៣ គឺជាដំណាក់កាល ធ្វើការផ្សព្វផ្សាយឲ្យបានទូលំទូលាយ ដល់សហគ្រាសគ្រឹះស្ថាន ដែលមានប្រើប្រាស់ហត្ថពលករបរទេស និងគ្រប់ភាគីពាក់ព័ន្ធ ដើម្បីយល់ជ្រួតជ្រាប និងចូលរួមអនុវត្ត ព្រមទាំងផ្សព្វផ្សាយបន្តនូវគោលការណ៍ វិធានការដែលច្បាប់ បានកំណត់អំពីការងារអធិការកិច្ចហត្ថពលកម្មបរទេស។ ក្នុងដំណាក់កាលផ្សព្វផ្សាយ តម្រូវឲ្យសហគ្រាស គ្រឹះស្ថាន ដែលប្រើប្រាស់ហត្ថពលកម្មបរទេស បំពេញរបាយការណ៍ស្វ័យប្រកាស អំពីការប្រើប្រាស់ហត្ថពលករបរទេស ដូចដែលមានគំរូផ្តល់ជូន និងត្រូវបញ្ជូនមកវិញ តាមរយៈក្រុមការងារអធិការកិច្ចហត្ថពលកម្មបរទេស ឲ្យបានមុនថ្ងៃទី ១៥ ខែមីនា ឆ្នាំ២០២៣។
លោក យឹម សំណាង បានបន្តថា ៖ ដំណាក់កាលទី២ មានរយៈពេល៣ខែ ចាប់ពីខែមេសា ដល់បំណាច់ខែមិថុនា ឆ្នាំ២០២៣ គឺជាដំណាក់កាល ចុះប្រតិបត្តិការអធិការកិច្ចជាក់ស្តែង នៅតាមគ្រប់សហគ្រាស គ្រឹះស្ថាន ដែលមានប្រើប្រាស់ហត្ថពលកម្មបរទេស ដោយផ្អែកតាមស្វ័យរបាយការណ៍ និងប្រតិទិនរបស់ក្រុមការងារ។ ក្នុងកំឡុងពេលប្រតិបត្តិការ ម្ចាស់ ឬនិយោជក ត្រូវបង្ហាញវត្តមានពលករបរទេសគ្រប់រូប និងឯកសារពាក់ព័ន្ធរបស់ពួកគេម្នាក់ៗ ដល់ក្រុមអធិការកិច្ចហត្ថពលកម្ម បរទេស ស្របតាមខ្លឹមសារដូចដែលបានកំណត់ក្នុងប្រកាសអន្តរក្រសួង រវាងក្រសួងមហាផ្ទៃ និងក្រសួងការងារ និងប ណ្តុះបណ្តាលជីវៈ លេខ៧១៩ប្រក ចុះថ្ងៃទី១៩ ខែកុម្ភៈ ឆ្នាំ២០១៨ ស្តីពីការពង្រឹងការងារអធិការកិច្ចហត្ថពលកម្ម បរទេសក្នុងព្រះរាជាណាចក្រកម្ពុជា៕
