ឧត្តមសេនីយ៍ឯក ឌី វិជ្ជា អនុញ្ញាតឱ្យប្រតិភូនគរបាលភូមិន្ទថៃ ចូលជួបសម្តែងការគួរសម និងជួបពិភាក្សាការងារ

ភំ្នពេញ៖ ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ នាព្រឹកថ្ងៃសុក្រ ៥កើត ខែផល្គុន ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២៤ ខែកុម្ភៈ ឆ្នាំ២០២៣ បានអនុញ្ញាតឱ្យ ប្រតិភូនគរបាលភូមិន្ទថៃ ដឹកនាំដោយ ឯកឧត្តម នាយឧត្តមសេនីយ៍ Roy Inkapairoj អគ្គស្នងការរងនគរបាលភូមិន្ទថៃ ចូលជួបសំដែងការគួរសម និងពិភាក្សាការងារ នៅអគ្គស្នងការដ្ឋាននគរបាលជាតិ។

ក្នុងជំនួបពិភាក្សាគ្នានេះ នគរបាលជាតិកម្ពុជា និងនគរបាលភូមិន្ទថៃ បានផ្លាស់ប្ដូរយោបល់ និងបទពិសោធន៍ពីគ្នាទៅវិញទៅមក ពាក់ព័ន្ធការពង្រឹង និងពង្រីកកិច្ចសហប្រតិបត្តិការរក្សាស្ថិរភាព សន្តិសុខ សុវត្ថិភាព និងបង្ក្រាបបទល្មើស ពិសេសបទល្មើសឧក្រិដ្ឋកម្មឆ្លងដែន និងបទល្មើសគ្រឿងញៀនឆ្លងដែន ៕