នាយឧត្តមសេនីយ៍ ម៉ឹង សំផន អញ្ជើញជាអធិបតីក្នុងពីធីបុណ្យឆ្លងនិងសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលនានានៅក្នុងវត្តសុវណ្ណសាមគ្គីរង្សី
ភ្នំពេញ៖ ឯកឧត្តម នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិនិងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកចន្ទ្រា ខេត្តស្វាយរៀង អមដំណើរដោយសមាជិក ក្រុមការងារជាច្រើនរូបទៀត នាព្រឹកថ្ងៃទី២៧ ខែកុម្ភៈ ឆ្នាំ២០២៣នេះ បានអញ្ជើញជាអធិបតីក្នុងពីធីបុណ្យឆ្លងនិងសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលនានានៅក្នុងវត្តសុវណ្ណសាមគ្គីរង្សី (ហៅវត្តកោះគោ)ស្ថិតនៅក្នុងភូមិកោះគោ ឃុំព្រៃគគី ស្រុកចន្ទ្រា ខេត្តស្វាយរៀង។
សមិទ្ធផលដែលត្រូវបានដាក់សម្ពោធ រួមមាន៖ ព្រះវិហារ កុដិថ្ម(២ខ្នង) កប្បិយកុដិ(ផ្ទះបាយ) របង ខ្លោងទ្វារ បន្ទប់ទឹក រួមនិងសមិទ្ធផលនានាជាច្រើនទៀត
ដែលចំណាយអស់ថវិកាអស់ចំនួន ២៦៣,៤២៨,២០០ ៛ (ពីររយហិកសិបបីលានបួនរយម្ភៃប្រាំបីពាន់ពីររយរៀល) និង ១៣៤,២៧៨$ (មួយរយសាមសិបបួនពាន់ពីរយចិត្តសិបប្រាំបីដុល្លារសហរដ្ឋអាមេរិក) ហើយនៅខ្វះថវិកាចំនួន ២៨,១២៣,៨០០៛ (ម្ភៃប្រាំបីលានមួយរយ ម្ភៃបីពាន់ប្រាំបីរយរៀល) មិនទាន់បានទូទាត់ ។
ថ្លែងនៅក្នុងពីធីបុណ្យឆ្លងនិងសម្ពោធសមិទ្ធផលនានា នៅក្នងវត្តសុវណ្ណសាមគ្គីរង្សី(ហៅកោះគោ)នាពេលនោះ ឯកឧត្ដម នាយឧត្ដមសេនីយ៍ ម៉ឹង សំផន បានពាំនាំនូវការផ្តាំផ្ញើសាកសួរសុខទុក្ខ ពីសំណាក់សម្តេចតេជា ហ៊ុន សែននិង សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ផ្ញើជូនដល់បងប្អូនប្រជាពលរដ្ឋស្រុកចន្ទ្រា និងពុទ្ធបរិសទ្ធ័ចំណុះជើងវត្តទាំងអស់ ក្នុងមនោសញ្ចេតនានឹករលឹក និងការយកចិត្តទុកដាក់ខ្ពស់ ពីការសុខទុក្ខនិងជីវភាពរស់នៅរបស់បងប្អូន។
ឯកឧត្ដម នាយឧត្ដមសេនីយ៍ បានសម្តែងនូវការចូលរួមអបអរសាទរចំពោះសមិទ្ធផលថ្មី ក្នុងវិស័យព្រះពុទ្ធសាសនា ដែលប្រជាពលរដ្ឋក្នុងឃុំព្រៃគគី ស្រុកចន្ទ្រា ទទួលបាននាពេលនេះ គឺមិនអាចកាត់ផ្តាច់បាន ពីការខិតខំប្រឹងប្រែងរបស់សម្តេចតេជា នាយករដ្ឋមន្ត្រីដែលបានខិតខំដឹកនាំប្រទេសជាតិ នាំមកនូវសុខសន្តិភាព មានស្ថេរភាពនយោបាយពេញលេញទូទាំងប្រទេស ជាពិសេស សម្តេចបានខិតខំកសាងហេដ្ឋារចនាសម្ព័នសង្គមជាតិ ឲ្យមានការរីកចំរើនលើគ្រប់វិស័យទូទាំងប្រទេស ដើម្បីនាំមកនូវការលើកកំពស់ជីភាព រស់នៅរបស់ប្រជាពលរដ្ឋ ឲ្យបានកាន់តែល្អប្រសើរ។
ឯកឧត្តម នាយឧត្តមសេនីយ៍ បានបន្តថា បច្ចុប្បន្ននេះរាជរដ្ឋភិបាលសម្រេចបាននូវសមិទ្ធផលធំៗជាច្រើនទាំងកិច្ចការជាតិនិងអន្តរជាតិ ដែលធ្វើអោយកំណើនសេដ្ឋកិច្ច ការអភិវឌ្ឍន៍ហេដ្ឋារចនាសម្ព័ន្ធ វិស័យកសិកម្ម ពាណិជ្ជកម្ម វិស័យការងារ សុខុមាលភាពសាធារណៈ ជាពិសេសការគ្រប់គ្រងបាននូវវិបត្តិនៃការរីករាលដាលជំងឺកូវីដ១៩ ដោយជោគជ័យ ដែលសមិទ្ធផលទាំងនេះអាចសម្រេចបានលុះត្រាតែមានកត្តាសំខាន់បំផុតគឺសន្តិភាព។
ក្នុងឱកាសនោះ ឯកឧត្តម នាយឧត្តមសេនីយ៍ ក៏បានបំពាក់គ្រឿងឥស្សរយយសនៃកម្ពុជា ជូនដល់សម្បុរសជននានា ដែលបានចូលរួមកសាងសមិទ្ធផល នៅក្នុងវត្ត និងបានប្រគេនបច្ច័យ ដល់ព្រះសង្ឃ ព្រមទាំងបានចែកអំណោយ របស់សម្តេចតេជោហ៊ុន សែននិងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជូនដល់ប្រជាពលរដ្ឋចូលរួមក្នុងពិធីបុណ្យឆ្លងនិងសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលនានា ក្នុងវត្តសុវណ្ណសាមគ្គីរង្សី(ហៅវត្តកោះគោ)ផងដែរ ៕
