នាយឧត្តមសេនីយ៍ ម៉ក់ ជីតូ អញ្ជើញជាអធិបតីបិទវគ្គបណ្តុះបណ្តាលបំប៉ន ស្តីពីការអនុវត្តន៍ច្បាប់ និងជំនាញ ដល់កងកម្លាំងនគរបាលស្រុកកញ្ជ្រៀច
ភ្នំពេញ៖ នៅសាលាស្រុកកញ្ជៀច នាព្រឹកថ្ងៃទី១ ខែមីនា ឆ្នាំ២០២៣ ឯកឧត្ដម នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្ដម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញជាអធិបតី ក្នុងពិធីបិទវគ្គបណ្តុះបណ្តាលបំប៉ន ស្តីពីការអនុវត្តន៍ច្បាប់ និងជំនាញ ដល់កងកម្លាំងនគរបាលស្រុកកញ្ជ្រៀច។
បន្ទាប់ពីបានស្តាប់របាយការណ៍បូកសរុបលទ្ធផលការសិក្សារយៈពេល៣ថ្ងៃរបស់ ឯកឧត្តម ឧត្តមសេនីយ៍ឯក ជា ប៊ុនថុល អនុប្រធាននាយកដ្ឋានកណ្តាលនគរបាលយុត្តិធម៌ ក៏ដូចជាប្រសាសន៍របស់លោកអភិបាលនៃគណៈអភិបាលស្រុក និងលោកប្រធានក្រុមប្រឹក្សាស្រុក រួចមក ឯកឧត្ដម នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ បានថ្លែងការកោតសរសើរ និងវាយតម្លៃខ្ពស់ដល់គណៈរៀបចំវគ្គ និងសិក្ខាកាម ចំនួន ៣ចំនុច៖
ទី១-មានការចាត់តាំងចូលរួមរៀនសូត្របានល្អ, ទី២-គោរពតាមបទបញ្ជាផ្ទៃក្នុង ក្នុងការរៀនសូត្របានល្អ និងទី៣-សិក្ខាកាមត្រងត្រាប់ស្តាប់គ្រូឧទ្ទេសនាម ហើយសិក្ខាកាមមានសកម្មភាពផុលផុសក្នុងការសាកសួរនូវអ្វីដែលពួកគាត់ឆ្ងល់ ។ ទន្ទឹមនឹងចំនុចល្អទាំង ៣ខាងលើ ឯកឧត្តម នាយឧត្តមសេនីយ៍ បានគូសបញ្ជាក់ថា ប៉ុន្តែអ្វីដែលសំខាន់មួយទៀតនោះ គឺការចុះអនុវត្តផ្ទាល់នៅក្នុងមូលដ្ឋាន ការអនុវត្តបានល្អ ឬមធ្យមនោះ គឺអាស្រ័យលើយើង ហើយត្រូវចងចាំថាពេលដែលចុះអនុវត្តផ្ទាល់មានចម្ងល់ត្រង់ណា គឺអាចទូរស័ព្ទទៅសួរគ្រូបង្គោលបន្ថែមទៀតបាន។
ឯកឧត្ដម នាយឧត្តមសេនីយ៍ អគ្គស្នងការរងនគរបាលជាតិ បន្តថា ក្នុងនាមយើងជាថ្នាក់ដឹកនាំដូចជា លោកអធិការ លោកនាយប៉ុស្តិ៍ កាលណាបងប្អូនធ្វើការងារដែលកើតហេតុណាមួយហើយគឺមិនមែនចប់នោះទេ គឺយើងត្រូវសាកសួរបងប្អូន ពីលទ្ធផលដែលរាយការណ៍មកនោះថាវាយ៉ាងម៉េច វាត្រូវខ្វះអ្វី ប្រឈមអ្វី ប្រតិកម្មអ្វីខ្លះ រួចក្តាប់របាយការណ៍ច្បាស់លាស់អស់ហើយ ទើបយើងដាក់ផែនការបន្តទៀត។ តែអ្វីដែលសំខាន់បំផុតនោះអ្នករាយការណ៍ គឺជាអ្នកចុះអនុវត្តផ្ទាល់ត្រូវរាយការណ៍ដោយស្មោះត្រង់ ត្រឹមត្រូវពិតប្រាកដ ទើបថ្នាក់ដឹកនាំចេញបញ្ជាទៅត្រឹមត្រូវច្បាស់លាស់។
ឯកឧត្ដម នាយឧត្តមសេនីយ៍ ម៉ក់ ជីតូ បានបន្តទៀតថា តួនាទីជានគរបាល គឺអនុវត្តការងារ៣សំខាន់ ទី១-ច្បាប់, ទី២-ជំនាញ, ៣-សិទ្ធិមនុស្ស ។
ឯកឧត្តម បានដាក់ជាសំណួរថា ដើម្បីការពារកន្លែងកើតហេតុមួយត្រូវធ្វើអ្វីខ្លះ? ទី១-គឺការពារវត្ថុតាង គឺមិនឲ្យមនុស្សចូលទៅន្លែងកើតហេតុប្រមូលវត្ថុតាង, ទី២-ធ្វើឲ្យផ្លាស់ប្តូរកន្លែងកើតហេតុ ហើយអ្វីដែលសំខាន់មួយទៀតនោះ គឺសង្គ្រោះ សង្គ្រោះទាំងជនរងគ្រោះ និងទាំងជនល្មើស។ ចុះហេតុអ្វីក៏ត្រូវសង្គ្រោះជនរងគ្រោះ និងជនល្មើស? ការសង្គ្រោះជនរងគ្រោះ គឺដើម្បីឲ្យគាត់និយាយបំភ្លឺអំពីការកើតហេតុ ។ រីឯការសង្គ្រោះជនល្មើស គឺដើម្បីស្រាវជ្រាវសាកសួររកចម្លើយ រកវត្ថុតាងដែលជនល្មើសលាក់ទុកដើម្បីយកមកដាក់បន្ទុក ឬក៏បន្តនីតិវីធី។
ឯកឧត្តមអគ្គស្នងការរងនគរបាលជាតិ បានបន្តថា ដើម្បីអនុវត្តគោលនយោបាយភូមិ-ឃុំសង្កាត់មានសុវត្ថិភាពរបស់រាជរដ្ឋាភិបាល មន្ត្រីនគរបាលត្រូវធ្វើជាសេនាធិការជូនគណៈបញ្ជាការឯកភាពខេត្ត-ស្រុកនិងឃុំ ដូច្នេះ ទី១-មន្ត្រីនគរបាលត្រូវអនុវត្តច្បាប់ឲ្យបានម៉ឺងម៉ាត់, ទី២-មន្ត្រីនគរបាលត្រូវខិតខំពន្យល់អប់រំឃោសនាឲ្យប្រជាពលរដ្ឋបានយល់ដឹង ដើម្បីឲ្យពួកគាត់ចូលរួមសហការជាមួយយើង។
ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិ បានថ្លែងអំណរគុណយ៉ាងជ្រាលជ្រៅដល់ គ្រូបង្គោល និងក្រុមការងារដែលបានរៀបចំពិធីបើក-បិទវគ្គបណ្តុះបណ្តាលបំប៉ន ស្តីពីការអនុវត្តន៍ច្បាប់ និងជំនាញ នេះប្រកបដោយជោគជ័យ៕
