ស្នងការខេត្តតាកែវ រៀបចំពីធីបើកព្រឹត្តិការណ៍ប្រកួតកីឡាបាល់ទះដណ្តើមពានរង្វាន់ ឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវលើកទី២

ភ្នំពេញ៖ ស្នងការដ្ឋាននគរបាលខេត្តតាកែវ នៅព្រឹកថ្ងៃទី ០៤ ខែមីនា ឆ្នាំ ២០២៣ បានរៀបចំពីធីបើកនូវព្រឹត្តិការណ៍ប្រកួតកីឡាបាល់ទះដណ្តើមពានរង្វាន់លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវលើកទី២ ដែលក្នុងនោះមានក្រុមកីឡាករចូលរួមប្រកួតចំនួន ១២ក្រុម ដែលមកពីបណ្តារអធិការនគរបាលស្រុក ក្រុង និងអង្គភាពមន្ទីរជុំវិញខេត្តផងដែរ ។

ថ្លែងក្នុងពិធីបើកវគ្គប្រកួតកីឡាបាល់ទះនេះដែរ លោកឧត្តមសេនីយទោ ឈាង ផាន់ណារ៉ា ស្នងការនគរបាលខេត្តតាកែវបានលើកឡើងថា ការរៀបចំនៅព្រឹត្តិការណ៍ប្រកួតកីឡាបាល់ទះនេះ គឺធ្វើឡើងក្នុងគោលបំណងចង់ជំរុញដល់វិស័យកីឡានៅក្នុងប្រទេស ក៏ដូចជាវិស័យកីឡាបាល់ទះនៅតាមបណ្តាខេត្ត អោយកាន់តែមានការផុលផុសដល់ស្មារតីយុវជនជំនាន់ក្រោយ រួមគ្នាលេងកីឡាដើម្បីសុខភាពមិត្តភាព និងការសាម្គីភាព និងជៀសឆ្ងាយពីគ្រឿងញៀន ខណៈដែលប្រទេសកម្ពុជាយើងកំពុងមានការរីកចម្រើនខ្លាំង ក៏ដូចជាការត្រៀមរៀបចំខ្លួនធ្វើជាម្ចាស់ផ្ទះនៃព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី ១២ នៅក្នុងឆ្នាំ២០២៣នេះផងដែរ ។

លោកស្នងការក៏បានណែនាំដល់ក្រុមកីឡាករទាំងអស់ដែលបានចូលរួមក្នុងការប្រកួតកីឡាបាល់ទះនេះ ត្រូវតែព្យាយ៉ាមយល់ដឹងពីកំរិតបច្ចេកទេសនៃច្បាប់ល្បែងកីឡាបាល់ទះមួយនេះអោយបានល្អ ដោយមានការណែនាំបានត្រឹមត្រូវពីក្រុមគ្រូបង្វឹក និងគ្រូជំនួយ ដើម្បីធ្វើយ៉ាងណាអោយវិស័យកីឡាបាល់ទះរបស់យើងនៅតាមបណ្តាខេត្ត ស្របតាមស្តង់ដាបច្ចេកទេសនៃការលេង ។

បើតាមការបញ្ជាក់ពីលោកឧត្តមសេនីយ៍ត្រី ឆឹង រតនៈ ស្នងការរងទទួលផែនការងារធនធានមនុស្ស និងជាអនុប្រធានគណៈកម្មការអចិន្ត្រៃយ៍រៀបចំព្រឹត្តិការប្រកួតកីឡាបាល់ទះ បានអោយដឹងថា នៅក្នុងថ្ងៃបើកវគ្គនេះដែរ គឺកម្មវីធីប្រកួតមានចំនួន ៣ក្រុម ក្នុងនោះ គូរបើកវគ្គ ក្រុមកីឡាបាល់ទះអធិការនគរបាលស្រុកបូរីជលសារ ជួបជាមួយក្រុមកីឡាបាល់ទះហត្ថា ដោយលទ្ធផល ក្រុមកីឡាបាល់ទះអធិការនគរបាលស្រុកបូរីជលសារ យកឈ្នះនិងក្រុមកីឡាបាល់ទះហត្ថា ០៣សិត ទល់នឹង ០សិត ។ ហើយនៅរសៀលថ្ងៃដដែល មានពីរប្រកួត ដោយគូរទី១ ក្រុមអធិការនគរបាលស្រុកអង្គរបូរី ជួបជាមួយនិងក្រុមអធិការនគរបាលស្រុកបាទី និងគូរទី២ ក្រុមកីឡាបាល់ទះ សសយក ខេត្តតាកែវ ជួបជាមួយ ក្រុមកីឡាបាល់ទះវត្តក្រាំងធំ៕