ឧត្តមសេនីយ៍ទោ សោម ស៊ុន នាំយកស៊ីម៉ងត៍ គ្រឿងឧបភោគបរិភោគ និងថវិកា ជាអំណោយរបស់ឯកឧត្តម ហ៊ុន ម៉ាណែត និងលោកជំទាវ ទៅប្រគេនព្រះសង្ឃនៅវត្តឥន្ទកុមារ ក្នុងស្រុកកំពង់ស្វាយ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី៥ ខែមីនា ឆ្នាំ២០២៣បានដឹកនាំសហការី នាំយកស៊ីម៉ងត៍ចំនួន ៣តោន អង្ករចំនួន ១២៥ គីឡូក្រាម មីជាតិចំនួន៥កេស ទឹកត្រីចំនួន៥យួរ ទឹកស៊ីអ៊ីវចំនួន៥យួរ ត្រីខចំនួន៥យួរ ព្រមទាំងថវិកាមួយចំនួន ដែលជាអំណយរបស់ឯកឧត្តម ឧត្ដមសេនីយ៍ឯក ហ៊ុន ម៉ាណែត និង លោកជំទាវ ពេជ ចន្ទមុន្នី ទៅប្រគេនព្រះសង្ឃនៅវត្តឥន្ទកុមារ ស្ថិតនៅក្នុងឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។
ព្រះតេជគុណ យាន ស្រេង ព្រះគ្រូចៅអធិការវត្តឥន្ទកុមារបានមានសង្ឃដីកាថា កន្លងមកនេះឯកឧត្តម ហ៊ុន ម៉ាណែត និងលោកជំទាវ ពេជ ចន្ទមុន្នី តាមរយៈឧត្តមសេនីយ៍ទោ សោម ស៊ុន និងសហការី បានជួយឧបត្ថម្ភស៊ីម៉ងត៍ចំនួន៤ តោនរួចមកហើយ ក្នុងការកសាងរបងនិងក្លោងទ្វារវត្តនៅទិសខាងកើតនិងទេយ្យទានមួយចំនួន តែបច្ចុប្បន្ននេះនៅមានការខ្វះខាតមិនទាន់បានបញ្ចប់នៅការសាងសង់នៅឡើយ ហើយបច្ចុប្បន្ននេះព្រះសង្ឃក៏មានការខ្វះខាតចង្ហាន់ប្រចាំថ្ងៃ និង បានជួយដោះស្រាយដល់ការលំបាកខ្វះខាតជីវភាពរបស់ក្រុមជាងសំណង់ផងដែរ។
ឧត្តមសេនីយ៍ទោ សោម ស៊ុន បានបញ្ជាក់ថា ដោយមើលឃើញពីការលំបាកខ្វះខាតនេះ ឯកឧត្តមបាននាំយកស៊ីម៉ងត៍ចំនួន៣តោនបន្ថែមទៀត និងគ្រឿងឧបភោគបរិភោគ ព្រមទាំងថវិកាមួយចំនួន ដែលជាអំណោយដ៏ថ្លៃថ្លារបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោកនិងលោកជំទាវ ពេជ ចន្ទមុន្នី ដើម្បីជួយសម្រួលដល់ការលំបាកខ្វះខាតក្នុងដំណើរការសាងសង់របងនិងក្លោងទ្វារវត្ត។ ព្រមជាមួយនោះក៏បាននាំយកនូវទេយ្យទានមានគ្រឿងឧបភោគបរិភោគ និងបច្ច័យមួយចំនួនបន្ថែមទៀត ដើម្បីចូលរួមចំណែកក្នុងការផ្គត់ផ្គង់ដល់ចង្ហាន់ព្រះសង្ឃនៅក្នុងទីអារាមវត្តឥន្ទកុមារនេះ។
ព្រះតេជគណ យាន ស្រេង ព្រះគ្រូចៅអធិការវត្តបានសូមថ្លែងអំណរគុណដ៏ជ្រាលជ្រៅជាទីបំផុត ចំពោះឯកឧត្តមបណ្ឌិត ហ៊ុន ម៉ាណែត និងលោកជំទាវតាមរយៈឧត្តមសេនីយ៍ទោសោម ស៊ុនមេបញ្ជាការតំបន់ប្រតិបត្តិការសឹករងកំពង់ធំនិងសហការី ដែលតែងតែបានផ្សារភ្ជាប់នូវសកម្មភាពមនុស្សធម៌ជួយដល់ព្រះសង្ឃ អតីតយុទ្ធជននិងប្រជាជន ដែលមានជីវភាពលំបាកខ្វះខាត នៅតាមមូលដ្ឋាននានាក្នុងខេត្តកំពង់ធំ ពិសេសបានជួយឧបត្ថម្ភជាច្រើនលើករួចមកហើយ នៅទីអារាមវត្តឥន្ទកុមារនេះ និងសូមជូនពរដល់ឯកឧត្តម លោកជំទាវ លោក លោកស្រីទាំងអស់ សូមបានប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈនិងពលៈកុំបីឃ្លៀងឃ្លាតឡើយ៕
