អង្គភាពអ្នកនាំពាក្យរាជរដ្ឋាភិបាល រៀបចំសិក្ខាសាលាស្តីពី “ទិសដៅនៃការពង្រឹងយន្តការ និងគោលនយោបាយព័ត៌មាន”

ភ្នំពេញ៖ ​នាព្រឹកថ្ងៃចន្ទ ទី៦ ខែមីនា ឆ្នាំ២០២៣ អង្គភាពអ្នកនាំពាក្យរាជរដ្ឋាភិបាលបានបើកសិក្ខាសាលាស្តីពី “ទិសដៅនៃការពង្រឹងយន្តការ និងគោលនយោបាយព័ត៌មាន” ក្រោមការដឹកនាំរបស់ឯកឧត្តម ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល រួមជាមួយឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគីរី ជាគណៈអធិបតីកិត្តិយស។

នៅក្នុងសិក្ខាសាលានេះ ឯកឧត្តម ផៃ ស៊ីផាន មានប្រសាសន៍ផ្តើមចេញពីការដឹងគុណយ៉ាងអនេកចំពោះអគ្គស្ថាបនិកសន្តិភាពសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងផ្តោតសំខាន់លើកិច្ចខិតខំប្រឹងប្រែងអនុវត្តន៍របស់រដ្ឋបាលខេត្តនីមួយៗក្នុងការផ្តល់សេវាសាធារណៈជូនប្រជាពលរដ្ឋប្រកបដោយការទទួលខុសត្រូវខ្ពស់ជាមួយកិត្យានុភាព និងឧត្តមភាព។ ជាមួយគ្នានោះ ការបញ្រ្ជាបព័ត៌មាននៃសមិទ្ធផលរឹង រួមមានហេដ្ឋារចនាសម្ព័ន្ធរួម និងផលប្រយោជន៍សួនតួក៏ត្រូវបានផ្តោតការយកចិត្តទុកដាក់។

ជាមួយគ្នាផងដែរ ឯកឧត្តម ផៃ ស៊ីផាន គូសបញ្ជាក់អំពីអភិបាលកិច្ចល្អក្នុងវិស័យព័ត៌មាន ដែលបាន និងកំពុងជំរុញប្រសិទ្ធភាពនៃការផ្សព្វផ្សាយ ដើម្បីបញ្ជ្រាប និងបំផុសព័ត៌មាននូវអភិបាលកិច្ចល្អ ដល់គ្រប់ស្រទាប់មហាជន តាមរយៈវេទិកាសន្ទនា និងឆ្លើយឆ្លងរវាងមន្ត្រីព័ត៌មានជាមួយនឹងមន្ទីរជំនាញគ្រប់វិស័យជុំវិញរដ្ឋបាលខេត្ត។

ដោយឡែក ឯកឧត្តម ឱម ច័ន្ទតារ៉ា ជំនួយការអមទីស្តីការគណៈរដ្ឋមន្ត្រី និងជាទីប្រឹក្សាអង្គភាពអ្នកនាំពាក្យរាជរដ្ឋាភិបាលបានធ្វើបទបង្ហាញស្តីពី “យុទ្ធសាស្ត្រនយោបាយបាយព័ត៌មាន”។ ចំណុចសំខាន់ គឺឯកឧត្តម ឱម ច័ន្ទតារ៉ា បានពន្យល់លម្អិតអំពីគោលបំណងនៃបដិវត្តព័ណ៌ ការចងក្រងបណ្តាញសង្គមដើម្បីផ្សព្វផ្សាយព័ត៌មានដល់ថ្នាក់ក្រោមជាតិ ការប្រើប្រាស់បណ្តាញសារព័ត៌មាន និងចលកម្ម ព្រមទាំងអភិបាលកិច្ចល្អក្នុងវិស័យព័ត៌មាន។

សូមបញ្ជាក់ជូនថា សិក្ខាសាលារៀបចំដោយអង្គភាពអ្នកនាំពាក្យរាជរដ្ឋាភិបាលមានការចូលរួមពីអភិបាលរងខេត្តទទួលបន្ទុកអ្នកនាំពាក្យ អភិបាលស្រុកទូទាំងខេត្តចំនួន៤ គឺខេត្តក្រចេះ ខេត្តស្ទឹងត្រែង ខេត្តរតនគីរី និងខេត្តមណ្ឌលគីរី។៕

អត្ថបទដោយ៖ ​ស្ទីវិន សាន់