សម្ដេចតេជោ ហ៊ុន សែន សុំការយោគយល់ពីពលរដ្ឋ ចំពោះផលប៉ះពាល់កើតចេញ ពីការធ្វើវារីអគ្គិសនីស្ទឹងពោធិ៍សាត់១
ភ្នំពេញ៖ ក្នុងពិធីជួបសំណេះសំណាល ជាមួយប្រជាពលរដ្ឋ ដែលបានផ្លាស់ប្តូរទីលំនៅទៅទីតាំងថ្មី និងត្រួតពិនិត្យការដ្ឋានសាងសង់ វារីអគ្គិសនីស្ទឹងពោធិ៍សាត់១ ស្ថិតនៅឃុំប្រម៉ោយ ស្រុកវាលវែង ខេត្តពោធិ៍សាត់ នាថ្ងៃទី១៤ មីនានេះ សម្ដេចជោ ហ៊ុន សែន នាយករដ្ឋមន្ត្រី នៃកម្ពុជា បានសុំការយោគយល់ពីប្រជាពលរដ្ឋ ចំពោះផលប៉ះពាល់កើតចេញពីការធ្វើវារីអគ្គសិសនីស្ទឹងពោធិ៍សាត់១។
នាឱកាសនោះដែរសម្តេចតេជោ ហ៊ុន សែន មានប្រសាសន៍ថា ប្រជាពលរដ្ឋដែលភ្ជាប់ជាមួយ បណ្តាញអគ្គិសនីមានរហូតដល់ទៅ ៩០ភាគរយ។ សម្តេចថា សម័យនេះប្រជាពលរដ្ឋប្រើអគ្គិសនី មិនមែនសម័យប្រើភ្លើងចន្លុះទៀតនោះទេ។
សម្តេចតេជោបន្ថែមថា បច្ចុប្បន្នថាមពលអគ្គិសនីរបស់កម្ពុជា ទទួលបានពីប្រភពកកើតឡើងវិញរហូតដល់ទៅ ៦២ភាគរយ។ សម្តេចថា វារីអគ្គិសនីជាប្រភពថាមពលដ៏ល្អមួយ។ សម្ដេចតេជោរំលឹកថា កាលពីទសវត្សរ៍៩០ កម្ពុជា ប្រើអគ្គិសនីត្រឹមប្រមាណ ៣០មេហ្គាវ៉ាត់ប៉ុណ្ណោះ តែបច្ចុប្បន្នប្រើរហូតដល់ទៅជា ២២០០មេហ្គាវ៉ាត់។
សម្តេចតេជោគូសបញ្ជាក់ថា បច្ចុប្បន្នរាជធានីភ្នំពេញត្រូវការ ថាមពលអគ្គិសនីរហូតដល់ទៅ ១ពាន់មេហ្គាវ៉ាត់។ ខណៈកាលពីមុនត្រូវការតែត្រឹម៣០មេហ្គាវ៉ាត់ ៕