ព្រះអង្គម្ចាស់ នរោត្តម ចក្រាវុធ ថ្លែងអំណរគុណចំពោះរដ្ឋាភិបាលជប៉ុន ដែលតែងតែផ្តល់ជំនួយក្នុងការរួមចំណែក ដល់ការអភិវឌ្ឍនៅកម្ពុជា

ភ្នំពេញ៖ ព្រះអង្គម្ចាស់ នរោត្តម ចក្រាវុធ ព្រះប្រធានគណបក្ស ហ៊្វុនស៊ិនប៉ិច មានព្រះបន្ទូលថ្លែងអំណរគុណចំពោះរាជរដ្ឋាភិបាលជប៉ុន តាមរយៈស្ថានទូតជប៉ុនប្រចាំកម្ពុជា ដែលតែងតែបានផ្តល់ជំនួយនានា ក្នុងការរួមចំណែក ដល់ការអភិវឌ្ឍន៍នៅកម្ពុជានាពេលកន្លងមក។

ព្រះអង្គមានព្រះបន្ទូលបែបនេះ នៅរសៀលថ្ងៃទី១៤ខែមីនា ឆ្នាំ២០២៣ ខណៈព្រះអង្គម្ចាស់ អនុញ្ញាតឱ្យលោកស្រី អូនិស៊ី អៃ និងកញ្ញា ហត្ថតុរី យូកា ដើម្បីជួបពិភាក្សាការងារមួយចំនួន​ អំពីស្ថានភាពទូទៅ ដំណើរការងារឆ្ពោះទៅរកការបោះឆ្នោតជាតិ នៅព្រះរាជាណាចក្រកម្ពុជា នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ។

កិច្ចពិភាក្សាក៏បានផ្តោតលើ ស្ថានភាពទូទៅនៃការបោះឆ្នោតជាតិខាងមុខ និងវត្តមានរបស់គណបក្ស ហ៊្វុនស៊ិនប៉ិច ក្នុងការចូលរួមអនុវត្តលទ្ធិប្រជាធិបតេយ្យ សេរីពហុបក្ស ឱ្យកាន់តែល្អប្រសើរ ។

ព្រះអង្គម្ចាស់នរោត្តម ចក្រាវុធ ក៏បានរំលឹកនូវអនុស្សាវរិយ៍ និងទំនាក់ទំនងដ៏ល្អ រវាងប្រទេសជប៉ុន និងប្រទេសកម្ពុជា រហូតដល់ពេលបច្ចុប្បន្ន ហើយ ក្នុងនាមជាគណបក្សរាជានិយម ព្រះអង្គ នឹងបន្តទំនាក់ទំនងនេះឱ្យបានល្អ ដើម្បីផលប្រយោជន៍ប្រជារាស្ត្រ និងប្រទេសជាតិ៕