សម្តេចតេជោ៖ ភរិយាខ្ញុំ និងភរិយានាយករដ្ឋមន្រ្តីម៉ាឡេស៊ី មានជោគវាសនាប្រហាក់ប្រហែលគ្នា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ភរិយាសម្ដេច និងភរិយានាយករដ្ឋមន្ត្រីម៉ាឡេស៊ី គឺមានជោគវាសនាប្រហាក់ប្រហែលគ្នា ។
ក្នុងសន្និសីទសារព័ត៌មាន ជាមួយឯកឧត្ដម ដាតុ ស៊េរី អាន់វ៉ា ប៊ីន អ៊ីប្រាហ៊ីម នាយករដ្ឋមន្រ្តីម៉ាឡេស៊ី នាថ្ងៃទី២៧ មីនានេះ សម្តេចតេជោ ហ៊ុន សែន បានបញញជាក់ថា «ខ្ញុំ និងឯកឧត្តម អាន់វ៉ា និងលោកជំទាវ មិនមែនទើបតែស្គាល់គ្នា នៅត្រឹមថ្ងៃនេះទេ អនុស្សាវរីយ៍ដែលគួរឲ្យចងចាំបំផុត គឺការរៀបចំនូវបាយមួយពេល នៅឯទីក្រុងកូឡាឡាំពួរ ក្នុងឆ្នាំ១៩៩៦ រយៈពេល២៧ឆ្នាំក្រោយ យើងបានជួបគ្នាឡើងវិញ នៅទីក្រុងភ្នំពេញ ដែលខ្ញុំសុំយកឱកាសនេះ អបអរសាទរ សាជាថ្មីម្តងទៀត ជាមួយនឹងឯកឧត្តមនាយករដ្ឋមន្ត្រី ហើយតាមរយៈឯកឧត្តមនាយករដ្ឋមន្ត្រី អនុញ្ញាតឲ្យភរិយាខ្ញុំ ផ្តាំផ្ញើសួរសុខទុក្ខចំពោះភរិយាឯកឧត្តម ដែលឯកឧត្តមមានភរិយាដ៏គួរឲ្យគោរព ហើយភរិយារបស់ឯកឧត្តម និងភរិយារបស់ខ្ញុំមាន ជោគវាសនាប្រហាក់ប្រហែលគ្នា នៅពេលដែលប្តីកំពុងជួបការលំបាកភរិយាត្រូវទទួលនូវអំរែកទាំងឡាយ ខ្ញុំជាមួយនឹងភរិយារបស់ខ្ញុំបែកគ្នារហូតដល់កូនហៅពូ រឿងនេះជាអនុស្សាវរីយ៍ ដែលគួរឲ្យចងចាំហើយជាមិត្តភាពសម្រាប់យើង»។
ជាមួយគ្នានោះឯកឧត្ដមនាយករដ្ឋមន្រ្តីម៉ាឡេស៊ី ក៏បានថ្លែងពីទំនាក់ទំនងជាមិត្តភក្តិ ជាមួយសម្តេចតេជោ ហ៊ុន សែន ដែលមានរយៈពេល២៧ឆ្នាំមកហើយ ដោយលោកអះអាងថា រូបលោក និងសម្តេចតេជោ ហ៊ុន សែន មានបទពិសោធន៍ និងជោគវាសនាស្រដៀងគ្នា។ ជាពិសេសនៅពេលជួបការលំបាកទាំងរូបលោក និងសម្តេចតេជោ ហ៊ុន សែន មានឥរិយាបទរឹងប៉ឹង ហើយសុទ្ធតែមានភរិយា ជាសរសេរទ្រូងគ្រួសារដូចគ្នា។
នាយករដ្ឋមន្រ្តីម៉ាឡេស៊ីថ្លែងថា «ខ្ញុំមានអារម្មណ៍រំភើប ពេលដែលខ្ញុំត្រូវបានជាប់ឃុំឃាំង ហើយសម្តេចបានផ្តាំផ្ញើការសាកសួរសុខទុក្ខ តាមរយៈភរិយាខ្ញុំ នេះជាអ្វីដែលផ្តល់តម្លៃសារសំខាន់សម្រាប់មិត្តភាពរបស់យើង» ៕
