ក្រសួងប្រៃសណីយ៍ បញ្ចេញថវិកា ២០លានដុល្លារ ដើម្បីជំរុញការសិក្សាបច្ចេកវិទ្យាឌីជីថលនៅកម្ពុជា
ភ្នំពេញ៖ ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានប្រកាសថា ដើម្បីជំរុញលើជំនាញបច្ចេកវិទ្យាឌីជីថល ឲ្យកាន់តែទូលំទូលាយដល់សិស្សានុសិស្ស, ក្រសួងនឹងដាក់បញ្ជូលថវិកា ២០លានដុល្លារ បូកបន្ថែម ៣លានដុល្លារក្នុងមួយឆ្នាំ ដើម្បីជំរុញការសិក្សាបច្ចេកវិទ្យាឌីជីថល។
ការលើកឡើងរបស់លោក ជា វ៉ាន់ដេត ធ្វើឡើងក្នុងកម្មវិធីក្នុងពិធីបិទទិវាជាតិ «វិទ្យាសាស្ត្រ បច្ចេកវិទ្យា និងនវានុវត្តន៍» នាល្ងាចថ្ងៃ២៩ ខែមីនា ឆ្នាំ២០២៣ នៅសណ្ឋាគារភ្នំពេញ។
ឯកឧត្ដម ជា វ៉ាន់ដេត បានថ្លែងថា វិស័យបច្ចេកវិទ្យាឌីជីថលពិតជាសំខាន់ ហើយឆាប់ៗនេះសាកលវិទ្យាល័យទាំងអស់ នឹងមានប្រព័ន្ធគ្រប់គ្រងតាមបែបឌីជីថល ដែលមានទិន្នន័យមួយផ្ដល់ជូនដល់ក្រសួងអប់រំ ងាយដឹង និងគ្រប់គ្រងព័ត៌មានបានល្អ។
ឯកឧត្ដមបានបន្ដថា វិស័យបច្ចេកវិទ្យាឌីជីថល នៅក្នុងប្រទេសវៀតណាម មានអ្នកបញ្ចប់ការសិក្សារហូតដល់ ១៥ម៉ឺននាក់ក្នុងមួយឆ្នាំ ប៉ុន្ដែកម្ពុជាយើងវិញមានអ្នកបញ្ចប់ការសិក្សាត្រឹមតែជាង ១ពាន់នាក់ នេះជាតួលេខមិនជាក់លាក់ ដែលអាចក្រោមនេះ ឬ លើសនេះតិចតួចតែប៉ុណ្ណោះ។
ឯកឧត្ដមបានបញ្ជាក់ថា «កត្តាទាំងនេះហើយទើប ធ្វើឲ្យក្រសួងខិតខំផ្ដល់អាហាររូបករណ៍ ផ្នែកបច្ចេកវិទ្យាឌីជីថល រហូតជាង១ពាន់នាក់ដល់និស្សិត ហើយបន្ថែមពីនេះ ក្រសួងបានរៀបចំកម្មវិធីមួយ ដែលតម្រូវឲ្យសិស្សអាចមកទទួលថវិកាយកទៅសិក្សាសាលា ឬសាកលវិទ្យាល័យណាក៏ដោយ ឲ្យតែពួកគេបានប្រឡងជាប់ ក្នុងនោះក្រសួងបានដាក់ថវិកា ២០លានដុល្លារ បូក៣លានដុល្លារក្នុងមួយឆ្នាំបន្ថែម ដើម្បីទ្រទ្រង់ការងារសិក្សាផ្នែកបច្ចេកវិទ្យាឌីជីថល»។
ឯកឧត្ដមបន្តថា កម្មវិធីថវិកានេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក៏អាចស្នើសុំមូលនិធិខ្លះ ដើម្បីស្រាវជ្រាវ និងបណ្ដុះបណ្ដាលបច្ចេកវិទ្យាផ្សេងៗទៀតផងដែរ៕
