គណៈប្រតិភូយុវជនគណបក្សប្រជាជនកម្ពុជាថ្នាក់កណ្ដាល ធ្វើទស្សនកិច្ចសិក្សានៅក្រុមហ៊ុន CIIC និងទស្សនាការសម្តែងសៀកនៅរោងល្ខោនក្រហម

ភ្នំពេញ៖ ឯកឧត្តមបណ្ឌិត ស៊ាន បូរ៉ាត សមាជិកគណៈកម្មាធិការកណ្តាល និងជាអនុប្រធានយុវជនគណបក្សថ្នាក់កណ្ដាល នៅរសៀលថ្ងៃទី៣០ ខែមីនា ឆ្នាំ ២០២៣ បានអញ្ជើញដឹកនាំគណៈប្រតិភូយុវជនគណបក្សថ្នាក់កណ្ដាល ធ្វើទស្សនកិច្ចសិក្សា នៅក្រុមហ៊ុន China International Intellectech Co., Ltd (CIIC)។

ក្រុមហ៊ុន CIIC ត្រូវបានបង្កើត ឡើងក្នុងឆ្នាំ១៩៨៧ គឺជាសហគ្រាសរដ្ឋដ៏សំខាន់ដែលគ្រប់គ្រងដោយរដ្ឋាភិបាលកណ្ដាលចិន ហើយតែមួយគត់ដែលទទួលយកសេវាធនធានមនុស្សជាអាជីវកម្មស្នូលរបស់ខ្លួន។

ក្រុមហ៊ុន CIIC មានទីស្នាក់ការកណ្ដាលនៅរដ្ឋធានីប៉េកាំង សាធារណរដ្ឋប្រជាមានិតចិន ដែលបានបង្កើតក្រុមហ៊ុនបុត្រសម្ព័ន្ធ ចំនួន ១២៦ទាំងក្នុង និងក្រៅប្រទេស ហើយបានចូលរួមក្នុងកិច្ចសហប្រតិបត្តិការសេដ្ឋកិច្ច បច្ចេកវិទ្យា និងទេពកោសល្យ ក្នុងប្រទេស និងតំបន់ ចំនួន ៧៦។

ក្រុមហ៊ុន CIIC ជាក្រុមហ៊ុន ដែលមានយីហោឈានមុខគេក្នុងសេវាកម្មធនធានមនុស្សរបស់ប្រទេសចិន ក្នុងចំណោមសហគ្រាសចិន កំពូលទាំង ៥០០សហគ្រាស និងសហគ្រាសសេវាកម្មចិនកំពូល ទាំង១០០សហគ្រាស និងជាអ្នកផ្ដល់ផលិតផលសេវាកម្មធនធានមនុស្សគ្រប់ជ្រុងជ្រោយរបស់ប្រទេសចិន។ សមិទ្ធិផលដែលគួរឱ្យកត់សំគាល់ ក្នុងការអនុវត្តការផ្លាស់ប្តូរនៅក្នុងបរិយាសកាសទីផ្សារផ្ទៃក្នុង ចាប់តាំងពីសមាជជាតិលើកទី១៩ នៃបក្សកុម្មុយនីស្តចិន ជាពិសេសក្នុងរយៈពេល ៣ឆ្នាំចុងក្រោយនេះ ក្រុមហ៊ុន CIIC បានប្រកាន់ខ្ជាប់នូវការទស្សនៈណែនាំរបស់ឯកឧត្ដម ស៊ី ជីងភីង ស្តីពីគំនិតសង្គមនិយមបែបចិនសម្រាប់យុគសម័យថ្មី ដោយបានអនុវត្តយ៉ាងម៉ឺងម៉ាត់នូវការសម្រេចចិត្ត និងការបើកចំហររបស់ប្រទេសចិន។

បន្ទាប់ពីបញ្ចប់ទស្សនកិច្ចនៅក្រុមហ៊ុន CIIC គណៈប្រតិភូយុវជនគណបក្សថ្នាក់កណ្តាល ក៏បានអញ្ជើញចូលរួមទស្សនាទស្សនីយភាពការសម្តែងសៀកនៅរោងល្ខោនក្រហម ក្នុងរដ្ឋធានីប៉េកាំង៕