មន្ត្រីជំនាញ ពន្យល់អំពីកំហុសបច្ចេកទេសក្នុងអត្តសញ្ញាណប័ណ្ណសញ្ជាតិខ្មែរ ការកែតម្រូវឯកសារយោង ទីកន្លែងដាក់ពាក្យ និងរយៈពេលទទួលបាន
ភ្នំពេញ៖ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម តាមរយៈបណ្ដាញសង្គមហ្វេសប៊ុក នៅថ្ងៃទី៥ ខែមីនា ឆ្នាំ២០២៣នេះ បានចេញមកពន្យល់អំពី កំហុសបច្ចេកទេសក្នុងអត្តសញ្ញាណប័ណ្ណសញ្ជាតិខ្មែរ គឺការវាយបញ្ចូលទិន្នន័យក្នុងអត្តសញ្ញាណប័ណ្ណ ខុសពីទិន្នន័យនៃឯកសារយោង ដែលសាមីខ្លួនបានភ្ជាប់មកជាមួយពេលថតធ្វើ។
ឯកឧត្តម ឧត្តមសេនីយ៍ឯក បានបន្តថា ក្រោយទទួលបានអត្តសញ្ញាណប័ណ្ណភ្លាម សាមីខ្លួនត្រូវពិនិត្យ ផ្ទៀងផ្ទាត់មើលទិន្នន័យទាំងអស់ រួមមាន ឈ្មោះ អក្សរឡាតាំង ភេទ កំពស់ ទីកន្លែងកំណើត អាសយដ្ឋាន ភិនភាគ។ល។
ឧត្តមសេនីយ៍ឯកបន្ថែមថា ក្នុងករណីពិនិត្យឃើញថា មានព័ត៌មានខុសពីព័ត៌មានក្នុងឯកសារ ឬភស្តុតាងផ្លូវការនានាដែលសាមីខ្លួនបានផ្តល់ជូនអាជ្ញាធរមានសមត្ថកិច្ច នៅពេលបំពេញបែបបទស្នើសុំធ្វើអត្តសញ្ញាណប័ណ្ណ សាមីខ្លួនត្រូវតវ៉ាទៅនាយប៉ុស្តិ៍នគរបាលរដ្ឋបាល ឬអធិការដ្ឋាននគរបាលក្រុង ស្រុក ខណ្ឌ នៃលំនៅដ្ឋានរបស់ខ្លួន ឬនៅសាខាអត្តសញ្ញាណប័ណ្ណសញ្ជាតិខ្មែរផ្សារអ៉ីអន២ ឬនៅនាយកដ្ឋានអត្តសញ្ញាណប័ណ្ណសញ្ជាតិខ្មែរក្រោយវត្តនិរោធ ដោយភ្ជាប់ជាមួយអត្តសញ្ញាណប័ណ្ណដែលមានព័ត៌មានខុស និងឯកសារភស្តុតាងផ្លូវការនានា ដែលផ្តល់ជូនអាជ្ញាធរមានសមត្ថកិច្ចនៅពេលបំពេញបែបបទស្នើសុំធ្វើអត្តសញ្ញាណប័ណ្ណ។
ឯកឧត្តម ឧត្តមសេនីយ៍ឯកបបញ្ជាក់ថា ការកែតម្រូវព័ត៌មានអត្តសញ្ញាណប័ណ្ណសញ្ជាតិខ្មែរ មានរយៈពេល ៣០ថ្ងៃនៃថ្ងៃធ្វើការ គិតពីថ្ងៃដែលបានទទួលការតវ៉ាសុំកែតម្រូវរបស់ប្រជាពលរដ្ឋនៅអធិការដ្ឋាននគរបាលក្រុង ស្រុក ខណ្ឌ ឬនៅសាខាអត្តសញ្ញាណប័ណ្ណសញ្ចាតិខ្មែរផ្សារអ៉ីអន២ ឬនៅនាយកដ្ឋានអត្តសញ្ញាណប័ណ្ណសញ្ជាតិខ្មែរក្រោយវត្តនិរោធ រហូតដល់ថ្ងៃប្រគល់អត្តសញ្ញាណប័ណ្ណសញ្ជាតិខ្មែរដែលបានកែតម្រូវរួចជូនប្រជាពលរដ្ឋ។
ឧត្តមសេនីយ៍ឯក សាយ ម៉េងឈាងបន្ថែមឱ្យដឹងទៀតថា ក្រៅពីកំហុសបច្ចេកទេស រាល់ការកែតម្រូវអត្តសញ្ញាណប័ណ្ណបានលុះត្រាតែមានការកែតម្រូវអត្រានុកូលដ្ឋានជាមុនតាមនីតិវិធី ឬ តាមការសម្រេចរបស់តុលាការ៕