ឯកឧត្តម គៀត ច័ន្ទថារិទ្ធ ចុះទៅពិនិត្យអំពូលភ្លេីងសូឡាតាមដងផ្លូវជាតិលេខ៥៧ ប្រវែង ១០ គីឡូម៉ែត្រក្នុងភូមិសាស្រ្តឃុំស្នឹង ស្រុកបាណន់ ខេត្តបាត់ដំបង
ភ្នំពេញ៖ ឯកឧត្តម គៀត ច័ន្ទថារិទ្ធ អនុប្រធានទី១ ក្រុមការងារគណបក្សប្រជាជនកម្ពុជាចុះជួយស្រុកបាណន់ និងជាប្រធានក្រុមការងារគណបក្សចុះជួយឃុំស្នឹង និងក្រុមការងារ នាព្រឹកថ្ងៃសៅរ៍ ៣រោច ខែចេត្រ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៨ ខែមេសា ឆ្នាំ២០២៣ បានអញ្ជេីញចុះទៅពិនិត្យអំពូលភ្លេីងសូឡាតាមដងផ្លូវជាតិលេខ៥៧ ប្រវែង ១០ គីឡូម៉ែត្រក្នុងភូមិសាស្រ្តឃុំស្នឹង និងជួបសំណេះសំណាលសួរសុខទុកជាមួយបងប្អូនប្រជាពលរដ្ឋចំនួន ១៣៦នាក់ នៅចំនុចអូរស្វាយ ស្ថិតនៅភូមិរំជៃ ឃុំស្នឹង ស្រុកបាណន់ ខេត្តបាត់ដំបង។
ឯកឧត្តម គៀត ច័ន្ទថារិទ្ធ បានគូសបញ្ជាក់ថា ក្រោមម្លប់សន្តិភាព និងការអភិវឌ្ឍ រាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា រក្សាបានយ៉ាងល្អប្រសើរនូវសុខសន្តិភាព ស្ថេរភាព នយោបាយ លទ្ធិប្រជាធិបតេយ្យ ជំរុញដំណើរការអភិវឌ្ឍសង្គម សេដ្ឋកិច្ច និងសម្រេចបានសមិទ្ធផលថ្មីៗ ប្រកបដោយមោទនភាព ទោះបីជាយើងត្រូវជួបប្រទះបញ្ហាប្រឈមជាច្រើន ជាពិសេសការឆ្លងរាតត្បាតនៃជំងឺកូវីដ-១៩ និងការវិវត្តដ៏ស្មុគស្មាញនៃសភាពការណ៍នយោបាយ សេដ្ឋកិច្ចអន្តរជាតិ និងសង្គ្រាមរុស្ស៊ី-អ៊ុយក្រែនក្ដី។
ឯកឧត្តម បានបញ្ជាក់ទៀតថា សមិទ្ធផលទាំងអស់ដែលប្រទេសជាតិសម្រេចបានរហូតមកទល់ពេលនេះ ពិតជាកើតឡើងដោយសារកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី ដែលបានដាក់ចេញយ៉ាងត្រឹមត្រូវនូវកម្មវិធីនយោបាយ យុទ្ធសាស្ត្រ និងកម្មវិធីនានាជាមួយការចាត់តាំងអនុវត្ត ដោយមានការគាំទ្រ និងការចូលរួមពីប្រជាពលរដ្ឋគ្រប់មជ្ឈដ្ឋាននៅទូទាំងប្រទេសទេីបធ្វេីឱ្យប្រទេសជាតិមានសុខសុវត្តិភាព ក្រោមម្លប់សន្តិភាព។ ទន្ទឹមគ្នានឹងនេះដែរ ឃុំស្នឹង ស្រុកបាណន់ ខេត្តបាត់ដំបង នេះក៏ដូចគ្នាដែលមានការអភិវឌ្ឍន៍ទៅមុខគឺដោយសារការខិតខំប្រឹងប្រែងរបស់ក្រុមការងារចុះមូលដ្ឋាន និងបងប្អូនប្រជាលរដ្ឋដែលរស់នៅនៅឃុំស្នឹងគាំទ្រចូលរួមការពាថែរក្សា។
ឯកឧត្តមបានថ្លែងអំណរគុណយ៉ាងជ្រាលជ្រៅជូនចំពោះក្រុមការងាររាជរដ្ឋាភិបាល និងក្រុមការងារចុះមូលដ្ឋានឃុំស្នឹង និងសប្បុរសជនដែលបានបរិច្ចាគនូវធនធាន និងកំលាំង កាយចិត្ត បញ្ញាស្មារតី ជាច្រើនទៀត ដើម្បីអភិវឌ្ឍមូលដ្ឋានឃុំស្នឹង ស្រុកបាណន់ ខេត្តបាត់ដំបងឱ្យមានការរីកចំរេីនដូចមកដល់ពេលបច្ចុប្បននេះ។
នាឱកាសនោះជាការឆ្លេីយតបទៅនូវសំណូរពររបស់ប្រជាពលរដ្ឋដែលរស់នៅភូមិរំជៃ ឃុំស្នឹង ឯកឧត្តមបានចុះទៅត្រួតពិនិត្យទីតាំងសាលាមត្តេយ្យ ដោយឃេីញថាសាលាមានសភាពចាស់ទ្រុឌទ្រោមខ្លាំង ឯកឧត្តមក៏បានសម្រេចផ្ដល់ជូនការសាងសង់អគារ១ខ្នង មានបីបន្ទប់ជូនតាមសំណូមពរ។
ចុងបញ្ចប់ឯកឧត្តម គៀត ច័ន្ទថារិទ្ធ ក៏បានផ្ដាំផ្ញេីរសុំឱ្យបងប្អូនប្រជាពលរដ្ឋទាំងអស់គ្នាដែលរស់ភូមិរំជៃ និងភូមិទាំង១១ដែលរស់នៅឃុំស្នឹងទាំងអស់ចូលរួមថែរក្សាការពារហេដ្ឋារចនាសម្ព័ន្ធរបស់ភូមិឱ្យបានល្អបន្ថែមជាងនេះ។ ឯកឧត្តមក៏បានសំណូមពរប្រពលរដ្ឋទាំងអស់ដែលគ្រប់អាយុបោះឆ្នោតត្រៀមលក្ខណ:ទុកជាមុន សំភារ:ឱ្យបានគ្រប់គ្រាន់ និងអញ្ជេីញចូលរួមទៅបោះឆ្នោតនាពេលខាងមុខនេះឱ្យបានគ្រប់ៗគ្នា ៕