ក្នុងរយៈពេល ៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ខេត្តពោធិ៍សាត់ ទទួលបានភ្ញៀវទេសចរ ប្រមាណជាជាង ១៤ម៉ឺននាក់
ភ្នំពេញ៖ រយៈពេល ៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំថោះ បញ្ចស័ក ពស.២៥៦៧ គស.២០២៣ គិតចាប់ពីថ្ងៃទី១៤-១៥-១៦ ខែមេសា ឆ្នាំ២០២៣ ខេត្តពោធិ៍សាត់ ទទួលបានភ្ញៀវទេសចរ សរុបចំនួនប្រមាណ ១៤១,៣៧០នាក់ ក្នុងនោះ ទេសចរជាតិចំនួន ១៤១,៣៤៦នាក់ និងទេសចរបរទេសចំនួន ២៤នាក់ បើប្រៀបធៀបនឹងឆ្នាំមុន ភ្ញៀវមានការថយចុះជាង៥០%។
បើតាមរបាយការណ៍ របស់មន្ទីរទេសចរណ៍ខេត្តពោធិ៍សាត់ បានឱ្យដឹងថា ស្ថិតិភ្ញៀវទេសចរ ក្នុងខេត្តពោធិ៍សាត់ នាឱកាសពិធីបុណ្យចូលឆ្នាំ ថ្ងៃទី៣ ត្រូវនឹងថ្ងៃទី១៦ ខែមេសា ឆ្នាំ២០២៣ មានភ្ញៀវទេសចរសរុបចំនួន ៦០,៨៩៧នាក់ ក្នុងនោះ ភ្ញៀវទេសចរជាតិចំនួន ៦០,៨៨៥នាក់ និងភ្ញៀវបរទេសចំនួន ១២នាក់។
ប្រភពបន្តថា សម្រាប់រយៈពេល៣ថ្ងៃ គឺថ្ងៃទី១៤-១៥-១៦ ខែមេសា ឆ្នាំ២០២៣ ភ្ញៀវទេសចរមានចំនួនសរុប ១៤១,៣៧០នាក់ ក្នុងនោះទេសចរជាតិចំនួន ១៤១,៣៤៦នាក់ និងទេសចរបរទេសចំនួន ២៤នាក់ បើប្រៀបធៀបនឹងរយៈពេល៣ថ្ងៃដូចគ្នា កាលពីឆ្នាំមុន ភ្ញៀវមានការថយចុះ ៥២,៥៦% (ឆ្នាំមុនភ្ញៀវមានចំនួន ២៩៨,០៣៧នាក់)។
ប្រភពបានបន្ថែមថា ក្រុមការងារមន្ទីរទេសចរណ៍ខេត្ត បានបែងចែកជា៥ក្រុម បានចុះសហការ និងធ្វើការទំនាក់ទំនង ជាមួយមន្ទីរ អង្គភាព អាជ្ញាធរពាក់ពន្ធ័ ពង្រឹងការអនុវត្តវិធានសុវត្ថិភាពទេសចរណ៍ នីតិវិធីស្តង់ដារប្រតិបត្តិអប្បរមា (SOP) តាមគន្លងប្រក្រតីភាពថ្មី និងវិធានការការពារ «៣កុំ ៣ការពារ»។
ជាមួយគ្នានោះ មន្ទីរទេសចរណ៍ខេត្ត បានចុះពង្រឹងគុណភាពផលិតផល រក្សាតម្លៃផលិតផល និងសេវាកម្មទេសចរណ៍ ព្រមទាំងថែរក្សាអនាម័យសុវត្ថិភាពចំណីអាហារ និងបរិស្ថាន។ រាល់តម្លៃសេវាកម្មស្នាក់នៅ ម្ហូបអាហារ និងសេវាផ្សេងៗ ត្រូវបានដាក់បញ្ជាក់ច្បាស់ៗ នៅក្នុងតារាងបញ្ជីតម្លៃ និងបានដាក់ភាសាខ្មែរ នៅខាងលើ ហើយភាសាបរទេសនៅខាងក្រោម។
បន្ថែមពីនោះ មន្ទីរទេសចរណ៍ខេត្ត ក៏បានបញ្ជាក់ពីការថយចុះ ចំនួនភ្ញៀវទេសចរ គឺបណ្តាលមកពី៖
ទី១-ភ្នំ១៥០០(ផ្លូវបុប្ផាលាក់ខ្លួន) ភ្ញៀវមានការធ្លាក់ចុះខ្លាំង ដោយសារឆ្នាំនេះអាកាសធាតុក្តៅខ្លាំង ធ្វើឱ្យទេសភាពមិនសូវស្រស់ស្អា តដូចឆ្នាំមុន។
ទី២-ស្រុកតាលោសែនជ័យ (សួនកម្សាន្តពូរីសត) ឆ្នាំមុនជួលតារាល្បីៗមករាំលេងកម្សាន្ត តែឆ្នាំនេះពុំមានជួលតារាល្បីមកសម្ដែងទេ។
ទី៣-ព្រឹត្តិការណ៍អង្គរសង្ក្រាន្តសៀមរាប
ទី៤-មានការរៀបចំព្រឹត្តិការណ៍សង្ក្រាន្ត តាមមូលដ្ឋានខេត្តនីមួយៗ
ទី៥-ផ្លូវល្បឿនលឿនភ្នំពេញ-ព្រះសីហនុ ជាគោលដៅទេសចរណ៍ថ្មី រហ័សតាមរយៈការវិនិយោគរបស់រដ្ឋ ៕
