ប្រតិភូបេសកជនពិសេស បានដង្ហែព្រះអគ្គីជ័យកីឡា និងភ្លើងគប់ មកដល់ទីក្រុងវៀងច័ន្ទ សាធារណរដ្ឋប្រជាធិបតេយ្យប្រជាមានិតឡាវ

  ភ្នំពេញ៖ បន្ទាប់ពីប្រតិភូបេសកជនពិសេសដឹកនាំដោយឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេសនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី ៣២ និងកីឡាប៉ារ៉ាហ្គេមលើកទី ១២ លោកបណ្ឌិតសាស្ត្រាចារ្យ សេង ប៊ុនសុង តំណាងគណៈកម្មាធិការជាតិកីឡាអូឡាំពិកកម្ពុជា និងសហការី បានធ្វើដំណើរចាកចេញពីទីក្រុងយ៉ាំងហ្គូន សាធារណរដ្ឋសហភាពមីយ៉ាន់ម៉ា តាមច្រក VIP នៃអាកាសយានដ្ឋានអន្តរជាតិយ៉ាំងហ្គូន  នៅព្រឹកថ្ងៃទី២២ ខែមេសា ឆ្នាំ២០២៣ ព្រះអគ្គីជ័យកីឡាបានមកដល់ទីក្រុងវៀងច័ន្ទ សាធារណរដ្ឋប្រជាធិបតេយ្យប្រជាមានិតឡាវ តាមអាកាសយានដ្ឋានអន្តរជាតិ Waatay នៅល្ងាចថ្ងៃទី២២ ខែមេសា ឆ្នាំ២០២៣ ដោយមានការទទួលស្វាគមន៍ បដិសណ្ឋាកិច្ចយ៉ាងកក់ក្តៅ ពីសំណាក់លោកជំទាវ ថោង សុគន្ធារី ឯកអគ្គរាជទូតព្រះរាជាណាចក្រកម្ពុជា ប្រចាំនៅសាធារណរដ្ឋប្រជាធិបតេយ្យប្រជាមានិតឡាវ និងសហការី ឯកឧត្តម  សេង ផន អនុប្រធានគណៈកម្មាធិការជាតិអូឡាំពិកសាធារណរដ្ឋប្រជាធិបតេយ្យប្រជាមានិតឡាវ និងសហការី នៅល្ងាចថ្ងៃទី២២ ខែមេសា ឆ្នាំ២០២៣។

ព្រះអគ្គីជ័យកីឡា ត្រូវបានដង្ហែតាមក្បូនរថយន្តស៊ីរ៉ែន ដង្ហែយកទៅតម្តល់ទុកនៅស្ថានទូតព្រះរាជាណាចក្រកម្ពុជា ដែលមានវេសនដ្ឋាននៅទីក្រុងវៀងច័ន្ទ  សាធារណរដ្ឋប្រជាធិបតេយ្យប្រជាម៉ានិតឡាវ រហូតដល់ថ្ងៃទី ២៥ ខែមេសា ឆ្នាំ២០២៣ ត្រូវជាថ្ងៃប្រារព្ធកម្មវិធីដង្ហែព្រះអគ្គីជ័យកីឡា និងភ្លើងគប់ ។

សូមជម្រាបជូនថា សាធារណរដ្ឋប្រជាធិបតេយ្យប្រជាមានិតឡាវ ជាប្រទេសហើយចុងក្រោយដែលប្រតិភូបេសកជនពិសេស នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និង កីឡាប៉ារ៉ាហ្គេមលើកទី១២ ដឹកនាំដោយឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេស តំណាងCamsoc-Camagoc និងធ្វើការដង្ហែនិវត្តន៍ចូលមាតុប្រទេសវិញនៅព្រឹកថ្ងៃទី២៧ ខែមេសា ឆ្នាំ២០២៣ តាមច្រកព្រំដែនអន្តរជាតិ កម្ពុជា-ឡាវ ត្រពាំងក្រៀល ខេត្តស្ទឹង។