ឯកឧត្តម ហ៊ុន ម៉ានី៖ អត្ថប្រយោជន៍នៃសុខសន្តិភាព នឹងផ្តល់ជូនកូនចៅជំនាន់ក្រោយ នូវភាពសុខស្រួលក្នុងការរស់រាន សិក្សារៀនសូត្រ និងប្រកបការងារចិញ្ចឹមជីវិត

ភ្នំពេញ៖ ឯកឧត្តម ហ៊ុន ម៉ានី បានថ្លែងថា អត្ថប្រយោជន៍នៃសុខសន្តិភាព នឹងផ្តល់ជូនកូនចៅជំនាន់ក្រោយនូវភាពសុខស្រួលក្នុងការរស់រាន សិក្សារៀនសូត្រ និងប្រកបការងារចិញ្ចឹមជីវិត។

ក្នុងពិធីសម្ពោធឆ្លងមហាកុដិធម្មត្រ័យ សមិទ្ធផលនានា និងស្រោចស្រពព្រះសុគន្ធវារី ក្នុងវត្តឧទុម្ភរក្រោម ស្ថិតក្នុងភូមិកំពង់ ឃុំព្រះបាទជាន់ជុំ ស្រុកគិរីវង់ ខេត្តតាកែវ នាថ្ងៃទី២៥ ខែមេសា ឆ្នាំ ២០២៣ នេះ ឯកឧត្តម ហ៊ុន ម៉ានី បានលើកឡើងថា ពាក្យ « អរគុណសន្តិភាព» ស្តាប់ទៅហាក់បីដូចជាសាមញ្ញ ក៏ប៉ុន្តែពេលលឺពាក្យនេះ វាមិនសាមញ្ញពេកនោះទេ ដោយបានគូសបញ្ជាក់ថា ដើម្បីយល់ពីគុណតម្លៃនៃសុខសន្តិភាព យើងគប្បីប្រៀបធៀបពេលដែលគ្មានសុខសន្តិភាព។

ឯកឧត្តមបានរំលេចផងដែរថា សុខសន្តិភាព ជាការទាក់ទាញអ្នកវិនិយោគជាតិ និងអន្តរជាតិ ដែលមានភាពប្រទាក់ក្រឡាគ្នាក្នុងការផ្តល់ឱកាសអោយប្រជាពលរដ្ឋមានឱកាសទទួលបានការងារ និងប្រាក់កំរៃសមរម្យសម្រាប់ទ្រទ្រង់ជីវភាពប្រចាំថ្ងៃ។ ឯកឧត្តមបានបន្តថា អត្ថប្រយោជន៍នៃសុខសន្តិភាព នឹងផ្តល់ជូនកូនចៅជំនាន់ក្រោយនូវភាពសុខស្រួលក្នុងការរស់រាន សិក្សារៀនសូត្រ និងប្រកបការងារចិញ្ចឹមជីវិត។

ឆ្លៀតក្នុងឱកាសនេះ លោកស្រី គា សុភូ អភិបាលរងនៃគណៈអភិបាលខេត្តតាកែវ បានសម្តែងនូវការស្វាគមន៍យ៉ាងកក់ក្តៅចំពោះវត្តមានឯកឧត្តម ហ៊ុន ម៉ានី និងធ្វើរបាយការណ៍អំពីសកម្មភាពក្នុងស្រុកគិរីវង់ ដោយលើកយក សន្តិសុខ សណ្តាប់ធ្នាប់សាធារណៈ ការងារកសិកម្ម ការងារអភិវឌ្ឍន៍ ជាពិសេសនោះគឺការងារធម្មការ និងសាសនា ដែលបច្ចុប្បន្ននេះ ពុទ្ធចក្រ និងអាណាចក្រ បាន និងកំពុង បម្រើអោយ វិស័យ សេដ្ឋកិច្ច សង្គមកិច្ច វប្បធម៌ អប់រំសិក្សា ធិការ ធម្មការ និងសាសនា ជាដើម ៕