អង្គជំនុំជម្រះវិសាមញ្ញក្នុងតុលាការកម្ពុជាចុះអនុស្សរណៈនៃការយោគយល់គ្នាជាមួយគម្រោងអង្គការ GIZ លើការស្រាវជ្រាវ និងការអប់រំប្រវត្តិសាស្ត្រកម្ពុជាប្រជាធិបតេយេ្យ និងការផ្សព្វផ្សាយសមិទ្ធផលរបស់ អ.វ.ត.ក

ភ្នំពេញ៖អនុស្សរណៈទាក់ទងនឹងកិច្ចសហប្រតិបត្តិការ លើការស្រាវជ្រាវនិងអប់រំប្រវត្តិសាស្ត្រ​នៃរបបកម្ពុជាប្រជាធិបតេយ្យ និងការផ្សព្វផ្សាយពីសមិទ្ធផលរបស់អង្កជំនុំ​ជម្រះវិសាមញ្ញក្នុងតុលាការកម្ពុជាលើការ ជំនុំជម្រះក្តីលើឧក្រិដ្ឋកម្មនៃរបបខ្មែរក្រហម ត្រូវបានចុះហត្ថលេខានៅថ្ងៃទី២៨ ខែមេសា ឆ្នាំ២០២៣ នេះរវាងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) តំណាងដោយឯកឧត្តម ក្រាញ់ តូនី រដ្ឋលេខាធិការទីស្តីការគណៈរដ្ឋមន្ត្រីនិងជាប្រធានរដ្ឋបាលស្តីទី និងលោកស្រី Sadie O’Mahoney តំណាងគម្រោងភាពជាដៃគូសាកលវិទ្យាល័យអាស៊ីអាគ្នេយ៍ សេវាសន្តិភាពស៊ីវិលសម្រាប់ការកសាងសន្តិភាព និងដំណោះស្រាយជម្លោះ (Civil Peace Service Southeast Asian University Partnership for Peacebuilding and Conflict Transformation (SAUP) GIZ។

អនុស្សរណៈនេះត្រូវបានកំណត់ និងដាក់ចេញក្នុងគម្រោងមួយចំនួនរួមមាន៖ ១) មេរៀនស្តីពី អ.វ.ត.ក ត្រូវបានដាក់បញ្ចូលទៅក្នុងកម្មវិធីសិក្សាក្នុងមុខវិជ្ជាសិក្សាស្ដីអំពីការសិក្សាសន្តិភាពនិងជម្លោះ។ ២) វិធីសាស្រ្តសិក្សាតាមបែបការចូលរួមនិងមធ្យោបាយលើផ្នែកយុត្តិធម៌អន្តរកាលនឹងត្រូវបានបង្កើតឡើង។ ៣)សមត្ថភាពសម្រាប់ប្រភពចម្បង និងការស្រាវជ្រាវលើផ្នែកបណ្ណសារពីប្រវត្តិសាស្ត្រខ្មែរក្រហមនឹងត្រូវបានបង្កើតឡើង។ ៤) បទពិសោធសិក្សាក្រៅថ្នាក់រៀនស្ដីពីយុត្តិធម៌អន្តរកាលត្រូវបានសម្របសម្រួល។
ឯកឧត្តម ក្រាញ់ តូនី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានរដ្ឋបាលស្តីទី អ.វ.ត.ក បានមានប្រសាសន៍ថា៖« អនុស្សរណៈនៃការយោគយល់នេះគឺជាការចូលរួមអនុវត្ត កិច្ចការ ដែលនៅសល់របស់អ.វ.ត.កដែលរាជរដ្ឋាភិបាលកម្ពុជានិងអង្គការសហប្រជាជាតិ បានយល់ ព្រមលើ «កិច្ចព្រមព្រៀងបន្ថែមស្តីពី ការរៀបចំក្នុងពេលអន្តរកាលនិងការបញ្ចប់ការងាររបស់អង្គជំនុំ ជម្រះវិសាមញ្ញ»សម្រាប់រយៈពេល៣ឆ្នាំបន្ថែមគឺពីឆ្នាំ២០២៣ដល់២០២៥ ដែលរួមមាន៖ (ក) ការងារគតិយុត្តមួយចំនួនរួមទាំងការគ្រប់គ្រង និងការផ្សព្វផ្សាយបណ្ណសារស្តីពីសំណុំរឿងរបស់អ.វ.ត.ក. ឱ្យបានទូលំទូលាយ (ខ) ការអប់រំ និងការ ផ្សព្វផ្សាយស្តីពីសមិទ្ធផលនិងកេរដំណែលរបស់ អ.វ.ត.ក. និងការពិនិត្យតាម ដានការអនុវត្តសំណង ដែលមានលក្ខណះផ្លូវចិត្ត និងសមូហភាពដល់ ដើមបណ្តឹង រដ្ឋប្បវេណី»៕