រដ្ឋមន្ត្រី ថោង ខុន៖ ព្រឹត្តិការណ៍ស៊ីហ្គេម កម្ពុជារំពឹងទទួលបានទេសចរអន្តរជាតិ ៥០ម៉ឺននាក់

ភ្នំពេញ៖ ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ អនុប្រធានអចិន្ត្រៃយ៍គណៈកម្មាធិការជាតិ CAMSOC បានថ្លែងឲ្យដឹងថា កម្ពុជារំពឹងទទួលបានភ្ញៀវទេសចរអន្តរជាតិប្រមាណ ៥០ម៉ឺននាក់ នៅក្នុងព្រឹត្តិការណ៍ស៊ីហ្គេមលើក ទី៣២ ដោយហេតុព្រឹត្តិការណ៍កីឡានេះ ក៏ជាផលិតផលទេសចរដ៏ធំរបស់អាស៊ាន និងតំបន់អាស៊ីអាគ្នេយ៍ផងដែរ។

ក្នុងសន្និសីទសារព័ត៌មាន ស្ដីពីព្រឹត្តិការណ៍កីឡាស៊ីហ្គេម នាថ្ងៃទី២៨ ខែមេសា ឯកឧត្ដម ថោង ខុន បានមានប្រសាសន៍ថា នៅឆ្នាំ២០២២ កម្ពុជាទទួលបានទេសចរអន្តរជាតិប្រមាណ ២.២លាននាក់រួចហើយ ហើយក្នុងត្រីមាសទី១នៃឆ្នាំ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ ១.២លាននាក់រួចហើយដែរ។ នៅឆ្នាំ២០២៣នេះ ប្រសិនជាអត់មានស៊ីហ្គេមក៏កម្ពុជា ទទួលបានទេសចរអន្តរជាតិប្រមាណ ៤លាននាក់ដែរ ហើយនៅពេលមានព្រឹត្តិការណ៍ស៊ីហ្គេមនេះទៀត នោះកម្ពុជានឹងទទួលបានទេសចរអន្តរជាតិច្រើនជាងនេះទៅទៀត។

ឯកឧត្ដមរដ្ឋមន្ត្រីក្រសួងទេសចរណ៍សង្កត់ធ្ងន់ថា ឥទ្ធិពលនៃការរៀបចំព្រឹត្តិការណ៍អង្គរសង្ក្រាន្ត យុទ្ធនាការឆ្នាំទស្សនកម្ពុជា ២០២៣ ព្រមទាំងព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម នឹងរួមចំណែកក្នុងការទាក់ទាញភ្ញៀវទេសចរ រហូតដល់ឆ្នាំ២០២៤ ឆ្នាំ២០២៥ ខាងមុខតទៅទៀតដែរ៕