សម្តេច ម៉ែន សំអន ផ្តាំផ្ញើរដល់មេប៉ុស្តិ៍ ប្រជាការពារភូមិ ចូលរួមថែរក្សា សុវត្ថិភាព ឲ្យបានល្អ ទទួលក្បួនដង្ហែព្រះអគ្គិជ័យកីឡា ឆ្លងកាត់ស្រុកស្គន់

ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នាព្រឹកថ្ងៃព្រហស្បតិ៍​ ១៥កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី៤ ខែឧសភា ឆ្នាំ២០២៣ បានជួបសំណេះសំណាលជាមួយមេប៉ុស្តិ៍នគរបាល រដ្ឋបាលផ្តៅជុំ និងប្រជាការពារ ប្រកបដោយក្តីស្រឡាញ់នៅ ខេត្តកំពង់ចាម។

សម្តេចបានផ្តាំផ្ញើរដល់មេប៉ុស្តិ៍ ក៏ដូចជាប្រជាការពារភូមិ ត្រូវចូលរួមថែរក្សា សុខ សន្តិភាព និងសណ្តាប់ធ្នាប់សង្គមនៅក្នុងមូលដ្ឋានឲ្យបានល្អ ដើម្បីចូលរួមចំណែកក្នុងការអនុវត្តឲ្យមានប្រសិទ្ធិភាព នូវសុវត្ថិភាព ភូមិ-ឃុំ ។ ជាពិសេស ថែរក្សា សុខ សុវត្ថិភាព ក្នុងឱកាសដែលក្បូនដង្ហែព្រះអគ្គិជ័យកីឡា សម្រាប់ព្រឹត្តិការណ៍នៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលនឹងឆ្លងកាត់ទីប្រជុំស្គន់ នឹងបន្តដំណើរឆ្ពោះវិមាន ឈ្នះ ឈ្នះ ដើម្បីចូលរួមក្នុងពិធីបើកព្រឹត្តិការណ៍នៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលនឹងប្រព្រឹត្តទៅនៅថ្ងៃទី០៥ ខែឧសភា ឆ្នាំ២០២៣ ខាងមុខនេះ ៕