សម្តេចតេជោ ហ៊ុន សែន ប្រាប់ដល់បណ្តាមិត្តបរទេស មើលកម្ពុជា ឲ្យផុតពីកម្ពុជា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រាប់ដល់បណ្តាមិត្តបរទេស សូមសម្លឹងមើលកម្ពុជា ឲ្យផុតពីកម្ពុជា ព្រោះកម្ពុជាជាសមាជិកអាស៊ានទាំង ១០ប្រទេស ហើយកម្ពុជាមានសិទ្ធិវេទោ (មិនឯកភាព) បើអាស៊ាននឹងគ្មានកង់សង់ស៉ីស (ការឯកភាពរួម) នោះមិនអាចចេញសេចក្តីថ្លែងការណ៍រួមបានទេ។
ក្នុងឱកាសអញ្ជើញសម្ពោធ អគារព្យាបាលកម្រិតអន្តរជាតិ នៅមន្ទីរពេទ្យកាល់ម៉ែត តម្លៃជាង ៧០លានដុល្លារ នៅថ្ងៃទី២៣ ខែឧសភា ឆ្នាំ២០២៣នេះ សម្តេចតេជោនាយករដ្ឋមន្ត្រី បានបញ្ជាក់ថា «កម្ពុជាអត់ទៅស្នើសុំប្រទេសណា មកជ្រៀតជ្រែកកិច្ចការរបស់ខ្លួនទេ ហើយក៏មិនទទួលដែរ ក្រែងថ្ងៃក្រោយមានការប៉ះពាល់ ទើបនិយាយថ្ងៃនេះតែម្តងទៅ ខ្ញុំធុញទ្រាន់រឿងបញ្ហាជ្រៀតជ្រែកនេះ។ នៅលើគោកសោះ ពន្យល់មិនព្រមយល់ ឥឡូវអ្នកឯងនៅក្នុងទឹក ខ្ញុំក៏មិនព្រមជឿអ្នកឯងដែរ មានសិទ្ធិដូចគ្នា។ ខ្ញុំត្រូវប្រើរូបមន្តតថ្លៃ អ្នកឯកជឿខ្ញុំអត់ បើអ្នកឯងមិនជឿ ខ្ញុំក៏មិនជឿអ្នកឯង ហើយអ្នកទាំងអស់ត្រូវមើលកម្ពុជា ឲ្យផុតពីកម្ពុជា សុំកុំភ្លេចកម្ពុជាជាសមាជិកអាស៊ាន កម្ពុជាមានសិទ្ធិវេទោ កាលណាគ្មានកុងសង់ស៉ីស គឺបានសេចក្តីថាអត់ដោះស្រាយបញ្ហាបានទេ អីចឹងបើគោលដៅរបស់អ្នកឯកចង់បានអី បើខ្ញុំមិនឲ្យ គឺនៅតែអត់»។
សម្តេចតេជោបញ្ជាក់ថា ការលើកឡើងរបស់សម្តេចនេះ គឺគ្រាន់តែជាការពន្យល់ឲ្យទូតមួយចំនួនបានដឹងប៉ុណ្ណោះ ព្រោះទូតខ្លះមកធ្វើការងារទូត ប៉ុន្តែមិនបានយល់ពីអ្វីជារចនាសម្ព័ន្ធអាស៊ាននោះទេ ប្រឹងសង្កត់កម្ពុជា ដែលស្មើនឹងសង្កត់អាស៊ានទាំងមូលដែរ កម្ពុជាជាសមាជិកសកម្មមួយរបស់អាស៊ាន ដែលទើបតែបញ្ចប់ការធ្វើជាម្ចាស់ផ្ទះអាស៊ាន កាលពីឆ្នាំ២០២២។
ជាមួយគ្នានេះ សម្តេចបានបញ្ជាក់ថា សម្តេចបានកាន់ញញួរធ្វើប្រធានអាស៊ាន ៣លើករួមមកហើយ តែសម្តេចមិនប្រាថ្នា ចង់កាន់ញញួរធ្វើជាប្រធានអាស៊ាន លើកទី៤ នៅឆ្នាំ២០៣២នោះទេ៕
