អ្នកបើកបរដឹកកម្មករ និងកម្មករនិយោជិត នៅក្នុងរោងចក្រ HI-TECH APPAREL (CAMBODIA) CO.,LTD ចូលរួមស្វែងយល់ច្បាប់ស្តីពីចរាចរណ៍ផ្លូវគោក សុវត្ថិភាពចរាចរណ៍លើ មធ្យោបាយធ្វើដំណើរ
ភ្នំពេញ៖ លោក យឹម សំណាង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោកស្រី ឧត្តមសេនីយ៍ត្រី លឹម សុខជា អនុប្រធានក្រុមការងារ ស.ផ.ក តំណាងដ៏ខ្ពង់ខ្ពស់ ឯកឧត្តម បណ្ឌិត ហេង សុផាន់ណារិទ្ធ អគ្គនាយករងបេឡាជាតិរបបសន្តិសុខសង្គម និងជាប្រធានក្រុមការងារ ស.ផ.ក បានអញ្ជើញជាអធិបតី ក្នុងពិធីផ្សព្វផ្សាយច្បាប់ស្តីពីចរាចរណ៍ផ្លូវគោក សុវត្ថិភាពចរាចរណ៍លើ មធ្យោបាយធ្វើដំណើរ ជូនអ្នកបើកបរដឹកកម្មករ និងកម្មករនិយោជិត នៅក្នុងរោងចក្រ HI-TECH APPAREL (CAMBODIA) CO.,LTD មានការអញ្ជើញចូលរួម លោក-លោកស្រី ថ្នាក់ដឹកនាំ តំណាងមន្ទីរអង្គភាពពាក់ព័ន្ធជុំវិញខេត្ត និងលោក-លោកស្រី តំណាងតំបន់សេដ្ឋកិច្ចពិសេសប៉ោយប៉ែត-អូរនាង តំណាងរោងចក្រ ហាយថេក និងតំណាងសហជីព ប្រចាំរោងចក្រហាយថេក ធ្វើឡើងនៅក្នុងរោងចក្រ HI-TECH APPAREL (CAMBODIA) CO.,LTD ស្ថឹតនៅសង្កាត់និមិត្ត ក្រុងប៉ោយប៉ែតខេត្តបន្ទាយមានជ័យ ។
លោកស្រី ឧត្តមសេនីយ៍ត្រី លឹម សុខជា អនុប្រធានក្រុមការងារ ស.ផ.ក តំណាងដ៏ខ្ពង់ខ្ពស់ ឯកឧត្តម បណ្ឌិត ហេង សុផាន់ណារិទ្ធ អគ្គនាយករងបេឡាជាតិរបបសន្តិសុខសង្គម និងជាប្រធានក្រុមការងារ ស.ផ.ក មានប្រសាសន៍ថា ៖ បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ តែងតែយកចិត្តទុកដាក់ទៅដល់សុវត្ថិភាពរបស់កម្មករនិយោជិត ដោយធ្វើការជំរុញលើមធ្យោយបាយដឹកជញ្ជូនកម្មករនិយោជិត ឲ្យកាន់តែមានផាសុខភាព និងសុវត្ថិភាពជាងមុន ដោយធ្វើការផ្លាស់ប្តូរពីរថយន្តដឹកទំនិញ មកប្រើប្រាស់រថយន្តដឹកអ្នកដំណើរ សម្រាប់ដឹកកម្មករនិយោជិត និងសហការជាមួយអង្គភាពពាក់ព័ន្ធ ដើម្បីត្រួតពិនិត្យលក្ខណៈបច្ចេកទេសយានយន្ត របស់អ្នកបើកបរដឹកកម្មករនិយោជិតឲ្យស្របទៅតាមច្បាប់ដែលបានកំណត់ ដើម្បីការអនុវត្ត ការងារឲ្យមានប្រសិទ្ធភាព និងទទួលបានលទ្ធផលល្អប្រសើរ។
លោកស្រី ឧត្តមសេនីយ៍ត្រី បន្តថា ៖ ក្រសួងការងារ និងបណ្តុះបណ្ដាល វិជ្ជាជីវៈ បានបង្កើតក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) បេឡាជាតិសន្តិសុខសង្គម ដែលមានសមាសភាពជាក្រុមការងារអន្តរក្រសួង ស្ថាប័ន និងអង្គភាព ពាក់ព័ន្ធ ដើម្បីធ្វើការកំណត់មូលហេតុដែលបណ្តាលឲ្យគ្រោះថ្នាក់ និងធ្វើការអប់រំផ្សព្វផ្សាយ ទៅដល់កម្មករនិយោជិត និងអ្នកបើកបរដឹកកម្មករឲ្យចំគោលដៅ ក្នុងន័យចូលរួមកាត់បន្ថយករណីគ្រោះថ្នាក់ចរាចរណ៍ ទៅលើកម្មករនិយោជិត និងធានានូវសុវត្ថិភាពក្នុងការធ្វើដំណើរប្រកបដោយសុខុមាលភាព។
ថ្លែងក្នុងឱកាសនោះលោក យឹម សំណាង អភិបាលរងខេត្ត បន្ទាយមានជ័យ បានលើកឡើងថា ៖ សង្គមដែលរឹងមាំ គឺអាស្រ័យលើការគ្រប់គ្រងដោយច្បាប់ គោរពច្បាប់ និងការអនុវត្តន៍ច្បាប់ឱ្យបានត្រឹមត្រូវ នោះនឹងនាំមកនូវយុត្តិធម៌ លទ្ធិប្រជាធិបតេយ្យ និងការគោរពសិទ្ធិមនុស្ស ព្រមទាំងធានាបាននូវសន្តិសុខ សុវត្ថិភាព និងការអភិវឌ្ឍន៍សេដ្ឋកិច្ចសង្គមជាតិទាំងមូល។ ក្នុងន័យនេះលោកណែនាំ ដល់អាជ្ញាធរមាន សមត្ថកិច្ចគ្រប់លំដាប់ថ្នាក់ត្រូវខិតខំពង្រឹង និងរឹតបន្តឹងការអនុវត្តន៍ច្បាប់ បទប្បញ្ញត្តិចរាចរណ៍នានាបន្ថែមទៀត ដើម្បីឱ្យក្លាយទៅជាមធ្យោបាយដ៏មានប្រសិទ្ធភាព សម្រាប់ជម្រុញការកាត់បន្ថយគ្រោះថ្នាក់ចរាចរណ៍ ឱ្យនៅកម្រិតទាបបំផុត ដើម្បីចូលរួមការអភិវឌ្ឍន៍សង្គម សំដៅកាត់បន្ថយភាពក្រីក្ររបស់ប្រជាពលរដ្ឋឱ្យបានឆាប់រហ័ស ស្របតាមគោលនយោបាយយុទ្ធសាស្ត្រចតុកោណរបស់រាជរដ្ឋាភិបាល ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕
