អគ្គនាយកដ្ឋានពន្ធដារ គ្មានគោលការណ៍ពន្យារពេល ការអនុវត្តច្បាប់សារពើពន្ធថ្មីទេ ព្រោះច្បាប់ថ្មីក៏ដូចជាច្បាប់ចាស់ គ្រាន់តែប្រមូលផ្តុំមកជុំគ្នាប៉ុណ្ណោះ

ភ្នំពេញ៖ ឯកឧត្ដម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយក នៃអគ្គនាយកដ្ឋានពន្ធដារបានបញ្ជាក់ថា អគ្គនាយកដ្ឋានពន្ធដារ គ្មានគោលការណ៍ ក្នុងការពន្យារពេល ការអនុវត្តច្បាប់សារពើពន្ធថ្មីទេ ព្រោះច្បាប់ថ្មីក៏ដូចជាច្បាប់ចាស់ដែរ គ្រាន់តែប្រមូលផ្តុំមកជុំគ្នាប៉ុណ្ណោះ។

ក្នុងឱកាសអញ្ជើញចូលរួមកម្មវិធីពិសេស ស្តីពី ច្បាប់ស្តីពីសារពើពន្ធ ដែលរៀបចំដោយអគ្គនាយកដ្ឋានពន្ធដារ នាថ្ងៃទី២៥ ខែឧសភា ឆ្នាំ២០២៣នេះ ឯកឧត្ដម គង់ វិបុល បានបញ្ជាក់យ៉ាងដូច្នេះថា «ច្បាប់នេះ (ច្បាប់សារពន្ធថ្មី) បានចេញឲ្យអនុវត្ដជាបន្ទាន់ ខ្ញុំគ្មានសិទ្ធិណាមួយ នឹងពន្យារពេលការអនុវត្ដនោះទេ។ ច្បាប់នេះ អត់មានអ្វីថ្មីនោះទេ ៩០ភាគរយនៃបទបញ្ញាត្ដិដូចច្បាប់មុន គ្រាន់តែកែសម្រួលពាក្យពេចន៍មួយចំនួនប៉ុណ្ណោះ ហើយអត្រាពន្ធក៏នៅដដែល ថ្ងៃប្រកាសបង់ពន្ធក៏នៅដដែល, កាន់បញ្ជីក៏នៅដដែល គឺដដែលទាំងអស់ ដូច្នេះគ្មានការពន្យារពេលអនុវត្ដនោះទេ»។

ឯកឧត្ដម គង់ វិបុល បានឲ្យដឹងថា ច្បាប់សារពើពន្ធចាស់ និងច្បាប់សារពើពន្ធថ្មី គឺដូចគ្នា គ្រាន់តែអ្វីដែលអគ្គនាយកដ្ឋានពន្ធដារ បានចងក្រងប្រមូលផ្ដុំគ្នាតាំងពីក្រម ឬក៏ក្រឹត្យពីមុនៗ ហើយគ្រាន់តែធ្វើការកែសម្រួល និងធ្វើទំនើបកម្មខ្លះៗប៉ុណ្ណោះ ដូច្នេះការកាន់បញ្ជីស្នាមនៅដដែល, ការបង់ពន្ធ និងអត្រាពន្ធនៅដដែលទាំងអស់ គឺគ្មានការផ្លាស់ប្ដូរនោះឡើយ។

សូមជម្រាបថា ច្បាប់ស្ដីពីសារពើពន្ធ ត្រូវបានរដ្ឋសភា បានប្រកាសដាក់ឲ្យអនុម័តកាលពីថ្ងៃទី១៩ ខែមេសា ឆ្នាំ២០២៣ នាសម័យប្រជុំរដ្ឋសភា លើកទី៩ នីតិកាលទី៩ បន្ទាប់ពីព្រឹទ្ធសភា បានពិនិត្យចប់សព្វគ្រប់លើទម្រង់ និងគតិច្បាប់នេះទាំងស្រុង កាលពីថ្ងៃទី០២ ខែឧសភា ឆ្នាំ២០២៣ នាសម័យប្រជុំពេញអង្គលើកទី១០ នីតិកាលទី៤។
ច្បាប់នេះកំណត់អំពីវិធាន នីតិវិធី និងលក្ខខណ្ឌ ព្រមទាំងប្រមូលផ្ដុំនូវបទប្បញ្ញត្ដិ ស្ដីពីពន្ធដារ ក្នុងគោលបំណងដើម្បីគ្រប់គ្រងការប្រមូលពន្ធអាការ សម្រាប់ជាគុណប្រយោជន៍ដល់ថវិការដ្ឋ។ ច្បាប់នេះ មានវិសាលភាពអនុវត្ដលើការគ្រប់គ្រង ការប្រមូលពន្ធអាករគ្រប់ប្រភេទ ដែលមានចែងក្នុងច្បាប់នេះនៅព្រះរាជាណាចក្រកម្ពុជា៕