ក្រសួងពាណិជ្ជកម្ម ប្ដេជ្ញាក្នុងការគាំទ្រការធ្វើពាណិជ្ជកម្មតាមប្រព័ន្ធអេឡិចត្រូនិក តាមរយៈការបង្កើតនូវច្បាប់ និងគោលនយោបាយចាំបាច់
ភ្នំពេញ៖ ក្រសួងពាណិជ្ជកម្ម បានប្ដេជ្ញាចិត្តក្នុងការគាំទ្រដល់វិស័យឯកជនតាមរយៈការ បង្កើតនូវច្បាប់ និងគោលនយោបាយចាំបាច់នានាសម្រាប់ការធ្វើពាណិជ្ជកម្មតាមប្រព័ន្ធ អេឡិចត្រូនិក ដើម្បីលើកកម្ពស់បរិយាកាសវិនិយោគ និងធុរកិច្ចនៅក្នុងប្រទេសកម្ពុជា។
រដ្ឋលេខាធិការក្រសួងពាណិជ្ជកម្ម ឯកឧត្តម សុខ សុភ័ក្រ្ត និងលោកស្រី Jhelum Tini Thomas អ្នកជំនាញជាន់ខ្ពស់ផ្នែកគ្រប់គ្រងសាធារណៈកាលពីពេលថ្មីៗកន្លងទៅនេះ បាន អញ្ជើញផ្តល់សុន្ទរកថាគន្លឹះក្នុងសិក្ខាសាលាពិគ្រោះយោបល់ លើប្រកាសស្តីពីក្រមសីល ធម៌វិជ្ជាជីវៈ សម្រាប់អន្តរការីនិងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិក។
ឯកឧត្តម សុខ សុភ័ក្រ្ត បានលើកឡើងថា ការធ្វើពាណិជ្ជកម្មតាមប្រព័ន្ធអេឡិចត្រូនិក បានចូលរួមចំណែកយ៉ាងសកម្មក្នុងការជំរុញសកម្មភាពសេដ្ឋកិច្ច និងពាណិជ្ជកម្មនៅក្នុង ប្រទេសកម្ពុជា។ ជាពិសេស គឺបានបង្កើតនូវធុរកិច្ចថ្មីៗ ការទាក់ទាញការវិនិយោគ ការបង្កើត ឱកាសការងារ និងការពង្រីកទីផ្សារឱ្យកាន់តែធំទូលាយសម្រាប់ ទំនិញនិងសេវាកម្ម។ឯកឧត្តម បានបន្តថា ក្នុងន័យនេះ វិស័យពាណិជ្ជកម្មតាមប្រព័ន្ធអេឡិចត្រូនិក ទាមទារឱ្យរាជរដ្ឋាភិបាលបង្កើតនូវច្បាប់ លិខិតបទដ្ឋានគតិយុត្ត និងគោលនយោបាយបន្ថែម ទៀតដើម្បីជំរុញ និងគាំទ្រឱ្យកាន់តែខ្លាំងក្លា។ តួយ៉ាង គឺដូចជាប្រកាសស្តីពីក្រមសីល ធម៌វិជ្ជាជីវៈ ដែលក្រសួងពាណិជ្ជកម្ម និងដៃគូអភិវឌ្ឍកំពុងរៀបចំនូវសិក្ខាសាលា ពិគ្រោះយោបល់ ដើម្បីប្រមូលធាតុចូលពីក្រសួង-ស្ថាប័នរដ្ឋ និងវិស័យឯកជន នេះតែម្តង។
ជាមួយគ្នានេះដែរ ឯកឧត្តម បានលើកឡើងថា ការរៀបចំប្រកាសស្តីពីក្រមសីល ធម៌វិជ្ជាជីវៈសម្រាប់អន្តរការី និងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិកនេះ ពោលគឺឆ្លើយតបនឹងបទប្បញ្ញតិមាត្រា២៧ នៃច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក និងដើម្បីគ្រប់គ្រងទៅលើសកម្មភាព និងប្រតិបត្តិការរបស់អន្តរការី និងបុគ្គលផ្តល់សេវា ពាណិជ្ជកម្មតាមប្រព័ន្ធអេឡិចត្រូនិក ក្នុងគោលដៅធានាការពារផលប្រយោជន៍ និងសិទ្ធិរបស់អ្នកប្រើប្រាស់ក្នុងសកម្មភាពពាណិជ្ជកម្មតាមប្រព័ន្ធអេឡិចត្រូនិក និង លើកកម្ពស់ទំនុកចិត្តក្នុងការប្រើប្រាស់និងការធ្វើពាណិជ្ជកម្មតាមប្រព័ន្ធអេឡិចត្រូនិក។
ម៉្យាងវិញទៀត ប្រកាសនេះនឹងកំណត់នូវសិទ្ធិ និងកាតព្វកិច្ច ដែលអន្តរការី និងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិកត្រូវអនុលោមតាម គោលការណ៍ សំខាន់ៗទាក់ទិននឹងតម្លាភាពនិងការការពារទិន្នន័យផ្ទាល់ខ្លួន បទប្បញ្ញតិពាក់ព័ន្ធនឹងការ ផ្សាយពាណិជ្ជកម្មនិងកម្មសិទ្ធិបញ្ញា ការដោះស្រាយវិវាទ។ល។
ឯកឧត្តម ក៏បានបញ្ជាក់ ពីការប្តេជ្ញាចិត្តរបស់ក្រសួងពាណិជ្ជកម្មក្នុងការគាំទ្រ ដល់វិស័យឯកជនតាមរយៈការបង្កើតនូវច្បាប់ និងគោលនយោបាយចាំបាច់នានា ដើម្បីលើកកម្ពស់បរិយាកាសវិនិយោគ និងធុរកិច្ចនៅក្នុងប្រទេសកម្ពុជា៕
