មន្ត្រីជាន់ខ្ពស់ក្រសួងបរិស្ថាន សំណូមពរឲ្យចូលរួមការពារថែរក្សាសត្វព្រៃឱ្យបានគង់វង្ស កុំបរបាញ់ និងដាក់អន្ទាក់
ភ្នំពេញ៖ ឯកឧត្ដម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានសំណូមពរដល់បងប្អូនចូលរួមការពារថែរក្សាសត្វព្រៃឱ្យបានគង់វង្ស កុំបរបាញ់ និងដាក់អន្ទាក់។
ឯកឧត្ដម បានលើកឡើងបែបនេះនៅថ្ងៃទី២ ខែមិថុនា ឆ្នាំ២០២៣ ឯកឧត្ដម នេត្រ ភក្ត្រា ក្នុងពេលធ្វើទស្សនកិច្ចគម្រោងដោះលែងសត្វព្រៃក្នុងព្រៃនៃតំបន់ការពារទេសភាព ឧទ្យានអង្គរ កិច្ចសហការ រវាងអាជ្ញាធរជាតិអប្សរានិងអង្គការសម្ព័ន្ធមិត្តសត្វព្រៃ (WA) រដ្ឋបាលព្រៃឈើ។
ឯកឧត្ដម នេត្រ ភក្ត្រា បានលើកឡើងថា ពិតជាមានសេចក្តីរីករាយដែលបានឃើញ សត្វជាច្រើនប្រភេទរួមមានទោចម្កុដ ស្វាព្រាម ភេខ្លួនរលោង ឈ្លូស កេងកងតូច កេងកងធំ ក្ងោក ព្វាំង ឆ្មាដាវ បានរស់នៅសុខសាន្តក្រោមការការពារនិងអភិរក្សបានយ៉ាងល្អ ហើយក៏បានបន្តពូជកើតបានកូនជាច្រើនក្បាលនៅក្នុងជម្រកធម្មជាតិ។ សត្វព្រៃទាំងនេះបានធ្វើឱ្យគុណតម្លៃនៃ តំបន់អង្គរកាន់តែលេចធ្លោបន្ថែមទៀត។
ឯកឧត្ដមរដ្ឋលេខាធិការ បានសូមសំណូមពរដល់បងប្អូនចូលរួមការពារថែរក្សាសត្វព្រៃដែលបានលែងនេះឱ្យបានគង់វង្ស និងកុំបរបាញ់និងដាក់អន្ទាក់ដើម្បីជាប្រយោជន៍ សម្រាប់មនុស្សរាប់ជំនាន់ទៅមុខទៀត។
ជាមួយគ្នានោះឯកឧត្ដម ក៏បានថ្លែងអំណរគុណអាជ្ញាធរជាតិអប្សរា អង្គការ Wildlife Alliance Cambodia – អង្គការសម្ព័ន្ធមិត្ដសត្វព្រៃជាពិសេសលោក Nick Marx អ្នកជំនាញសត្វព្រៃដែលបានលះបង់កម្លាំងកាយចិត្តបញ្ញាចូលរួមជាមួយរាជរដ្ឋាភិបាលកម្ពុជាអភិរក្សសត្វព្រៃនៅកម្ពុជា៕
