នាយករដ្ឋមន្រ្តីកម្ពុជា លើកទឹកចិត្តឲ្យភាគីអេមីរ៉ាត អារ៉ាប់រួម មានការពិចារណាលើការវិនិយោគលើវិស័យកសិកម្មចំនួន២ ក្នុងប្រទេសកម្ពុជា
ភ្នំពេញ៖ សម្ដេចតេជោ ហ៊ុន សែន នាយករដឋមន្ត្រីនៃកម្ពុជា បានលើកទឹកចិត្តឲ្យភាគីអេមីរ៉ាត អារ៉ាប់រួម មានការពិចារណាលើការវិនិយោគលើវិស័យកសិកម្មចំនួន២ រួមមាន៖
ទី១-វិស័យស្រូវអង្គរ ដែលកម្ពុជាមានស្រូវ ប្រមាណ៦លានតោន ដែលអាចនាំចេញ, ក្នុងន័យនេះ សម្ដេចតេជោបានស្នើឲ្យមានការពិចារណាបង្កើតរោងម៉ាស៊ីនកិនស្រូវ, ឃ្លាំងស្តុក និងបណ្ដាញទិញ ដើម្បីធ្វើការសកែច្នៃស្រូវ សម្រាប់នាំចេញ។
ទី២-លើវិស័យស្វាយចន្ទី ដែលកម្ពុជាមានស្វាយចន្ទី ជាង១លានតោនហើយ, ហើយសព្វថ្ងៃនេះពុំទាន់មានការកែច្នៃសម្រាប់នាំចេញនៅឡើយ ដូច្នេះសម្ដេចតេជោបានស្នើឱ្យមានការពិចារណា ជំរុញការវិនិយោគ មកវិនិយោគលើការកែច្នៃស្វាយចន្ទី សម្រាប់នាំចេញទៅ អេមីរ៉ាត អារ៉ាប់រួមផង ហើយក៏នាំចេញទៅកាន់ប្រទេសដទៃទៀតផងដែរ។
សម្តដេចតេជោ ហ៊ុន សែន បានលើកឡើងបែបនេះក្នុងឱកាសដែរ សម្តេច បានអនុញ្ញាតឱ្យ ឯកឧត្ដម បណ្ឌិត ថានី ប៊ីន អាម៉េត អាល់ ហ្សេយូឌី រដ្ឋមន្ត្រីពាណិជ្ជកម្មអន្តរជាតិ នៃប្រទេសអេមីរ៉ាតអារ៉ាប់រួម ចូលជួបសម្តែងការគួរសម និងពិភាក្សាការងារ នៅវិមានសន្តិភាព នារសៀលថ្ងៃទី០៨ ខែមិថុនា ឆ្នាំ២០២៣។
សម្ដេចតេជោ ហ៊ុន សែន បានសម្ដែងនូវសេចក្ដីរីករាយ ជាមួយកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ហើយសម្តេច បានមានប្រសាសន៍ថា កិច្ចព្រមព្រៀងនេះ នឹងនាំមក នូវផលប្រយោជន៍សម្រាប់ប្រទេសទាំងពីរ ៕
